UtshovChapter 28
28.1
वैशंपायन उवाच
ततः शारद्वतो वाक्यमित्युवाच कृपस्तदा
युक्तं प्राप्तं च वृद्धेन पाण्डवान्प्रति भाषितम्
Vaishampayana uvacha
Tatah sharadvato vakyamityuvacha kripastada
Yuktam praptam cha vriddhena pandavanprati bhashitam
28.2
धर्मार्थसहितं श्लक्ष्णं तत्त्वतश्च सहेतुमत्
तत्रानुरूपं भीष्मेण ममाप्यत्र गिरं शृणु
Dharmarthasahitam shlakshnam tattvatashcha sahetumat
Tatranurupam bhishmena mamapyatra giram shrinu
28.3
तेषां चैव गतिस्तीर्थैर्वासश्चैषां प्रचिन्त्यताम्
नीतिर्विधीयतां चापि सांप्रतं या हिता भवेत्
Tesham chaiva gatistirthairvasashchaisham prachintyatam
Nitirvidhiyatam chapi sampratam ya hita bhavet
28.4
नावज्ञेयो रिपुस्तात प्राकृतोऽपि बुभूषता
किं पुनः पाण्डवास्तात सर्वास्त्रकुशला रणे
Navagyeyo ripustata prakritopi bubhushata
Kim punah pandavastata sarvastrakushala rane
28.5
तस्मात्सत्रं प्रविष्टेषु पाण्डवेषु महात्मसु
गूढभावेषु छन्नेषु काले चोदयमागते
Tasmatsatram pravishteshu pandaveshu mahatmasu
Gudhabhaveshu chhanneshu kale chodayamagate
28.6
स्वराष्ट्रपरराष्ट्रेषु ज्ञातव्यं बलमात्मनः
उदये पाण्डवानां च प्राप्ते काले न संशयः
Svarashtrapararashtreshu gyatavyam balamatmanah
Udaye pandavanam cha prapte kale na sanshayah
28.7
निवृत्तसमयाः पार्था महात्मानो महाबलाः
महोत्साहा भविष्यन्ति पाण्डवा ह्यतितेजसः
Nivrittasamayah partha mahatmano mahabalah
Mahotsaha bhavishyanti pandava hyatitejasah
28.8
तस्माद्बलं च कोशं च नीतिश्चापि विधीयताम्
यथा कालोदये प्राप्ते सम्यक्तैः संदधामहे
Tasmadbalam cha kosham cha nitishchapi vidhiyatam
Yatha kalodaye prapte samyaktaih sandadhamahe
28.9
तात मन्यामि तत्सर्वं बुध्यस्व बलमात्मनः
नियतं सर्वमित्रेषु बलवत्स्वबलेषु च
Tata manyami tatsarvam budhyasva balamatmanah
Niyatam sarvamitreshu balavatsvabaleshu cha
28.10
उच्चावचं बलं ज्ञात्वा मध्यस्थं चापि भारत
प्रहृष्टमप्रहृष्टं च संदधाम तथा परैः
Uchchavacham balam gyatva madhyastham chapi bharata
Prahrishtamaprahrishtam cha sandadhama tatha paraih
28.11
साम्ना भेदेन दानेन दण्डेन बलिकर्मणा
न्यायेनानम्य च परान्बलाच्चानम्य दुर्बलान्
Samna bhedena danena dandena balikarmana
Nyayenanamya cha paranbalachchanamya durbalan
28.12
सान्त्वयित्वा च मित्राणि बलं चाभाष्यतां सुखम्
सकोशबलसंवृद्धः सम्यक्सिद्धिमवाप्स्यसि
Santvayitva cha mitrani balam chabhashyatam sukham
Sakoshabalasanvriddhah samyaksiddhimavapsyasi
28.13
योत्स्यसे चापि बलिभिररिभिः प्रत्युपस्थितैः
अन्यैस्त्वं पाण्डवैर्वापि हीनस्वबलवाहनैः
Yotsyase chapi balibhiraribhih pratyupasthitaih
Anyaistvam pandavairvapi hinasvabalavahanaih
28.14
एवं सर्वं विनिश्चित्य व्यवसायं स्वधर्मतः
यथाकालं मनुष्येन्द्र चिरं सुखमवाप्स्यसि
Evam sarvam vinishchitya vyavasayam svadharmatah
Yathakalam manushyendra chiram sukhamavapsyasi