Utshovঅধ্যায় 27
27.1
বৈশংপায়ন উবাচ
ততঃ শাংতনবো ভীষ্মো ভরতানাং পিতামহঃ
শ্রুতবান্দেশকালজ্ঞস্তত্ত্বজ্ঞঃ সর্বধর্মবিৎ
27.2
আচার্যবাক্যোপরমে তদ্বাক্যমভিসংদধৎ
হিতার্থং স উবাচেমাং ভারতীং ভারতান্প্রতি
27.3
যুধিষ্ঠিরে সমাসক্তাং ধর্মজ্ঞে ধর্মসংশ্রিতাম্
অসত্সু দুর্লভাং নিত্যং সতাং চাভিমতাং সদা
ভীষ্মঃ সমবদত্তত্র গিরং সাধুভিরর্চিতাম্
27.4
যথৈষ ব্রাহ্মণঃ প্রাহ দ্রোণঃ সর্বার্থতত্ত্ববিৎ
সর্বলক্ষণসংপন্না নাশং নার্হন্তি পাণ্ডবাঃ
27.5
শ্রুতবৃত্তোপসংপন্নাঃ সাধুব্রতসমন্বিতাঃ
বৃদ্ধানুশাসনে মগ্নাঃ সত্যব্রতপরায়ণাঃ
27.6
সময়ং সময়জ্ঞাস্তে পালয়ন্তঃ শুচিব্রতাঃ
নাবসীদিতুমর্হন্তি উদ্বহন্তঃ সতাং ধুরম্
27.7
ধর্মতশ্চৈব গুপ্তাস্তে স্ববীর্যেণ চ পাণ্ডবাঃ
ন নাশমধিগচ্ছেয়ুরিতি মে ধীয়তে মতিঃ
27.8
তত্র বুদ্ধিং প্রণেষ্যামি পাণ্ডবান্প্রতি ভারত
ন তু নীতিঃ সুনীতস্য শক্যতেঽন্বেষিতুং পরৈঃ
27.9
যত্তু শক্যমিহাস্মাভিস্তান্বৈ সংচিন্ত্য পাণ্ডবান্
বুদ্ধ্যা প্রবক্তুং ন দ্রোহাত্প্রবক্ষ্যামি নিবোধ তৎ
27.10
সা ত্বিয়ং সাধু বক্তব্যা ন ত্বনীতিঃ কথংচন
বৃদ্ধানুশাসনে তাত তিষ্ঠতঃ সত্যশীলিনঃ
27.11
অবশ্যং ত্বিহ ধীরেণ সতাং মধ্যে বিবক্ষতা
যথামতি বিবক্তব্যং সর্বশো ধর্মলিপ্সয়া
27.12
তত্র নাহং তথা মন্যে যথায়মিতরো জনঃ
পুরে জনপদে বাপি যত্র রাজা যুধিষ্ঠিরঃ
27.13
নাসূয়কো ন চাপীর্ষুর্নাতিবাদী ন মত্সরী
ভবিষ্যতি জনস্তত্র স্বং স্বং ধর্মমনুব্রতঃ
27.14
ব্রহ্মঘোষাশ্চ ভূয়াংসঃ পূর্ণাহুত্যস্তথৈব চ
ক্রতবশ্চ ভবিষ্যন্তি ভূয়াংসো ভূরিদক্ষিণাঃ
27.15
সদা চ তত্র পর্জন্যঃ সম্যগ্বর্ষী ন সংশয়ঃ
সংপন্নসস্যা চ মহী নিরীতীকা ভবিষ্যতি
27.16
রসবন্তি চ ধান্যানি গুণবন্তি ফলানি চ
গন্ধবন্তি চ মাল্যানি শুভশব্দা চ ভারতী
27.17
বায়ুশ্চ সুখসংস্পর্শো নিষ্প্রতীপং চ দর্শনম্
ভয়ং নাভ্যাবিশেত্তত্র যত্র রাজা যুধিষ্ঠিরঃ
27.18
গাবশ্চ বহুলাস্তত্র ন কৃশা ন চ দুর্দুহাঃ
পয়াংসি দধিসর্পীংষি রসবন্তি হিতানি চ
27.19
গুণবন্তি চ পানানি ভোজ্যানি রসবন্তি চ
তত্র দেশে ভবিষ্যন্তি যত্র রাজা যুধিষ্ঠিরঃ
27.20
রসাঃ স্পর্শাশ্চ গন্ধাশ্চ শব্দাশ্চাপি গুণান্বিতাঃ
দৃশ্যানি চ প্রসন্নানি যত্র রাজা যুধিষ্ঠিরঃ
27.21
স্বৈঃ স্বৈর্গুণৈঃ সুসংয়ুক্তাস্তস্মিন্বর্ষে ত্রয়োদশে
দেশে তস্মিন্ভবিষ্যন্তি তাত পাণ্ডবসংয়ুতে
27.22
সংপ্রীতিমাঞ্জনস্তত্র সংতুষ্টঃ শুচিরব্যয়ঃ
দেবতাতিথিপূজাসু সর্বভূতানুরাগবান্
27.23
ইষ্টদানো মহোত্সাহঃ শশ্বদ্ধর্মপরায়ণঃ
অশুভদ্বিট্শুভপ্রেপ্সুর্নিত্যয়জ্ঞঃ শুভব্রতঃ
ভবিষ্যতি জনস্তত্র যত্র রাজা যুধিষ্ঠিরঃ
27.24
ত্যক্তবাক্যানৃতস্তাত শুভকল্যাণমঙ্গলঃ
শুভার্থেপ্সুঃ শুভমতির্যত্র রাজা যুধিষ্ঠিরঃ
ভবিষ্যতি জনস্তত্র নিত্যং চেষ্টপ্রিয়ব্রতঃ
27.25
ধর্মাত্মা স তদাদৃশ্যঃ সোঽপি তাত দ্বিজাতিভিঃ
কিং পুনঃ প্রাকৃতৈঃ পার্থঃ শক্যো বিজ্ঞাতুমন্ততঃ
27.26
যস্মিন্সত্যং ধৃতির্দানং পরা শান্তির্ধ্রুবা ক্ষমা
হ্রীঃ শ্রীঃ কীর্তিঃ পরং তেজ আনৃশংস্যমথার্জবম্
27.27
তস্মাত্তত্র নিবাসং তু ছন্নং সত্রেণ ধীমতঃ
গতিং বা পরমাং তস্য নোত্সহে বক্তুমন্যথা
27.28
এবমেতত্তু সংচিন্ত্য যত্কৃতং মন্যসে হিতম্
তত্ক্ষিপ্রং কুরু কৌরব্য যদ্যেবং শ্রদ্দধাসি মে