অধ্যায় 26

26.1

বৈশংপায়ন উবাচ
অথাব্রবীন্মহাবীর্যো দ্রোণস্তত্ত্বার্থদর্শিবান্
ন তাদৃশা বিনশ্যন্তি নাপি যান্তি পরাভবম্

শূরাশ্চ কৃতবিদ্যাশ্চ বুদ্ধিমন্তো জিতেন্দ্রিয়াঃ
ধর্মজ্ঞাশ্চ কৃতজ্ঞাশ্চ ধর্মরাজমনুব্রতাঃ

নীতিধর্মার্থতত্ত্বজ্ঞং পিতৃবচ্চ সমাহিতম্
ধর্মে স্থিতং সত্যধৃতিং জ্যেষ্ঠং জ্যেষ্ঠাপচায়িনম্

অনুব্রতা মহাত্মানং ভ্রাতরং ভ্রাতরো নৃপ
অজাতশত্রুং হ্রীমন্তং তং চ ভ্রাতৄননুব্রতম্

তেষাং তথা বিধেয়ানাং নিভৃতানাং মহাত্মনাম্
কিমর্থং নীতিমান্পার্থঃ শ্রেয়ো নৈষাং করিষ্যতি

তস্মাদ্যত্নাত্প্রতীক্ষন্তে কালস্যোদয়মাগতম্
ন হি তে নাশমৃচ্ছেয়ুরিতি পশ্যাম্যহং ধিয়া

সাংপ্রতং চৈব যত্কার্যং তচ্চ ক্ষিপ্রমকালিকম্
ক্রিয়তাং সাধু সংচিন্ত্য বাসশ্চৈষাং প্রচিন্ত্যতাম্

যথাবত্পাণ্ডুপুত্রাণাং সর্বার্থেষু ধৃতাত্মনাম্
দুর্জ্ঞেয়াঃ খলু শূরাস্তে অপাপাস্তপসা বৃতাঃ

শুদ্ধাত্মা গুণবান্পার্থঃ সত্যবান্নীতিমাঞ্শুচিঃ
তেজোরাশিরসংখ্যেয়ো গৃহ্ণীয়াদপি চক্ষুষী

বিজ্ঞায় ক্রিয়তাং তস্মাদ্ভূয়শ্চ মৃগয়ামহে
ব্রাহ্মণৈশ্চারকৈঃ সিদ্ধৈর্যে চান্যে তদ্বিদো জনাঃ