অধ্যায় 25

25.1

বৈশংপায়ন উবাচ
ততো দুর্যোধনো রাজা শ্রুত্বা তেষাং বচস্তদা
চিরমন্তর্মনা ভূত্বা প্রত্যুবাচ সভাসদঃ

সুদুঃখা খলু কার্যাণাং গতির্বিজ্ঞাতুমন্ততঃ
তস্মাত্সর্বে উদীক্ষধ্বং ক্ব নু স্যুঃ পাণ্ডবা গতাঃ

অল্পাবশিষ্টং কালস্য গতভূয়িষ্ঠমন্ততঃ
তেষামজ্ঞাতচর্যায়ামস্মিন্বর্ষে ত্রয়োদশে

অস্য বর্ষস্য শেষং চেদ্ব্যতীয়ুরিহ পাণ্ডবাঃ
নিবৃত্তসময়াস্তে হি সত্যব্রতপরায়ণাঃ

ক্ষরন্ত ইব নাগেন্দ্রাঃ সর্ব আশীবিষোপমাঃ
দুঃখা ভবেয়ুঃ সংরব্ধাঃ কৌরবান্প্রতি তে ধ্রুবম্

অর্বাক্কালস্য বিজ্ঞাতাঃ কৃচ্ছ্ররূপধরাঃ পুনঃ
প্রবিশেয়ুর্জিতক্রোধাস্তাবদেব পুনর্বনম্

তস্মাত্ক্ষিপ্রং বুভুত্সধ্বং যথা নোঽত্যন্তমব্যয়ম্
রাজ্যং নির্দ্বন্দ্বমব্যগ্রং নিঃসপত্নং চিরং ভবেৎ

অথাব্রবীত্ততঃ কর্ণঃ ক্ষিপ্রং গচ্ছন্তু ভারত
অন্যে ধূর্ততরা দক্ষা নিভৃতাঃ সাধুকারিণঃ

চরন্তু দেশান্সংবীতাঃ স্ফীতাঞ্জনপদাকুলান্
তত্র গোষ্ঠীষ্বথান্যাসু সিদ্ধপ্রব্রজিতেষু চ

পরিচারেষু তীর্থেষু বিবিধেষ্বাকরেষু চ
বিজ্ঞাতব্যা মনুষ্যৈস্তৈস্তর্কয়া সুবিনীতয়া

বিবিধৈস্তত্পরৈঃ সম্যক্তজ্জ্ঞৈর্নিপুণসংবৃতৈঃ
অন্বেষ্টব্যাশ্চ নিপুণং পাণ্ডবাশ্ছন্নবাসিনঃ

নদীকুঞ্জেষু তীর্থেষু গ্রামেষু নগরেষু চ
আশ্রমেষু চ রম্যেষু পর্বতেষু গুহাসু চ

অথাগ্রজানন্তরজঃ পাপভাবানুরাগিণম্
জ্যেষ্ঠং দুঃশাসনস্তত্র ভ্রাতা ভ্রাতরমব্রবীৎ

এতচ্চ কর্ণো যত্প্রাহ সর্বমীক্ষামহে তথা
যথোদ্দিষ্টং চরাঃ সর্বে মৃগয়ন্তু ততস্ততঃ
এতে চান্যে চ ভূয়াংসো দেশাদ্দেশং যথাবিধি

ন তু তেষাং গতির্বাসঃ প্রবৃত্তিশ্চোপলভ্যতে
অত্যাহিতং বা গূঢাস্তে পারং বোর্মিমতো গতাঃ

ব্যালৈর্বাপি মহারণ্যে ভক্ষিতাঃ শূরমানিনঃ
অথ বা বিষমং প্রাপ্য বিনষ্টাঃ শাশ্বতীঃ সমাঃ

তস্মান্মানসমব্যগ্রং কৃত্বা ত্বং কুরুনন্দন
কুরু কার্যং যথোত্সাহং মন্যসে যন্নরাধিপ