অধ্যায় 24

24.1

বৈশংপায়ন উবাচ
কীচকস্য তু ঘাতেন সানুজস্য বিশাং পতে
অত্যাহিতং চিন্তয়িত্বা ব্যস্ময়ন্ত পৃথগ্জনাঃ

তস্মিন্পুরে জনপদে সংজল্পোঽভূচ্চ সর্বশঃ
শৌর্যাদ্ধি বল্লভো রাজ্ঞো মহাসত্ত্বশ্চ কীচকঃ

আসীত্প্রহর্তা চ নৃণাং দারামর্শী চ দুর্মতিঃ
স হতঃ খলু পাপাত্মা গন্ধর্বৈর্দুষ্টপূরুষঃ

ইত্যজল্পন্মহারাজ পরানীকবিশাতনম্
দেশে দেশে মনুষ্যাশ্চ কীচকং দুষ্প্রধর্ষণম্

অথ বৈ ধার্তরাষ্ট্রেণ প্রয়ুক্তা যে বহিশ্চরাঃ
মৃগয়িত্বা বহূন্গ্রামান্রাষ্ট্রাণি নগরাণি চ

সংবিধায় যথাদিষ্টং যথাদেশপ্রদর্শনম্
কৃতচিন্তা ন্যবর্তন্ত তে চ নাগপুরং প্রতি

তত্র দৃষ্ট্বা তু রাজানং কৌরব্যং ধৃতরাষ্ট্রজম্
দ্রোণকর্ণকৃপৈঃ সার্ধং ভীষ্মেণ চ মহাত্মনা

সংগতং ভ্রাতৃভিশ্চাপি ত্রিগর্তৈশ্চ মহারথৈঃ
দুর্যোধনং সভামধ্যে আসীনমিদমব্রুবন্

কৃতোঽস্মাভিঃ পরো যত্নস্তেষামন্বেষণে সদা
পাণ্ডবানাং মনুষ্যেন্দ্র তস্মিন্মহতি কাননে

নির্জনে মৃগসংকীর্ণে নানাদ্রুমলতাবৃতে
লতাপ্রতানবহুলে নানাগুল্মসমাবৃতে

ন চ বিদ্মো গতা যেন পার্থাঃ স্যুর্দৃঢবিক্রমাঃ
মার্গমাণাঃ পদন্যাসং তেষু তেষু তথা তথা

গিরিকূটেষু তুঙ্গেষু নানাজনপদেষু চ
জনাকীর্ণেষু দেশেষু খর্বটেষু পুরেষু চ

নরেন্দ্র বহুশোঽন্বিষ্টা নৈব বিদ্মশ্চ পাণ্ডবান্
অত্যন্তভাবং নষ্টাস্তে ভদ্রং তুভ্যং নরর্ষভ

বর্ত্মান্যন্বিষ্যমাণাস্তু রথানাং রথসত্তম
কংচিত্কালং মনুষ্যেন্দ্র সূতানামনুগা বয়ম্

মৃগয়িত্বা যথান্যায়ং বিদিতার্থাঃ স্ম তত্ত্বতঃ
প্রাপ্তা দ্বারবতীং সূতা ঋতে পার্থৈঃ পরংতপ

ন তত্র পাণ্ডবা রাজন্নাপি কৃষ্ণা পতিব্রতা
সর্বথা বিপ্রনষ্টাস্তে নমস্তে ভরতর্ষভ

ন হি বিদ্মো গতিং তেষাং বাসং বাপি মহাত্মনাম্
পাণ্ডবানাং প্রবৃত্তিং বা বিদ্মঃ কর্মাপি বা কৃতম্
স নঃ শাধি মনুষ্যেন্দ্র অত ঊর্ধ্বং বিশাং পতে

অন্বেষণে পাণ্ডবানাং ভূয়ঃ কিং করবামহে
ইমাং চ নঃ প্রিয়ামীক্ষ বাচং ভদ্রবতীং শুভাম্

যেন ত্রিগর্তা নিকৃতা বলেন মহতা নৃপ
সূতেন রাজ্ঞো মত্স্যস্য কীচকেন মহাত্মনা

স হতঃ পতিতঃ শেতে গন্ধর্বৈর্নিশি ভারত
অদৃশ্যমানৈর্দুষ্টাত্মা সহ ভ্রাতৃভিরচ্যুত

প্রিয়মেতদুপশ্রুত্য শত্রূণাং তু পরাভবম্
কৃতকৃত্যশ্চ কৌরব্য বিধত্স্ব যদনন্তরম্