Utshovঅধ্যায় 23
23.1
বৈশংপায়ন উবাচ
তে দৃষ্ট্বা নিহতান্সূতান্রাজ্ঞে গত্বা ন্যবেদয়ন্
গন্ধর্বৈর্নিহতা রাজন্সূতপুত্রাঃ পরঃশতাঃ
23.2
যথা বজ্রেণ বৈ দীর্ণং পর্বতস্য মহচ্ছিরঃ
বিনিকীর্ণং প্রদৃশ্যেত তথা সূতা মহীতলে
23.3
সৈরন্ধ্রী চ বিমুক্তাসৌ পুনরায়াতি তে গৃহম্
সর্বং সংশয়িতং রাজন্নগরং তে ভবিষ্যতি
23.4
তথারূপা হি সৈরন্ধ্রী গন্ধর্বাশ্চ মহাবলাঃ
পুংসামিষ্টশ্চ বিষয়ো মৈথুনায় ন সংশয়ঃ
23.5
যথা সৈরন্ধ্রিবেষেণ ন তে রাজন্নিদং পুরম্
বিনাশমেতি বৈ ক্ষিপ্রং তথা নীতির্বিধীয়তাম্
23.6
তেষাং তদ্বচনং শ্রুত্বা বিরাটো বাহিনীপতিঃ
অব্রবীত্ক্রিয়তামেষাং সূতানাং পরমক্রিয়া
23.7
একস্মিন্নেব তে সর্বে সুসমিদ্ধে হুতাশনে
দহ্যন্তাং কীচকাঃ শীঘ্রং রত্নৈর্গন্ধৈশ্চ সর্বশঃ
23.8
সুদেষ্ণাং চাব্রবীদ্রাজা মহিষীং জাতসাধ্বসঃ
সৈরন্ধ্রীমাগতাং ব্রূয়া মমৈব বচনাদিদম্
23.9
গচ্ছ সৈরন্ধ্রি ভদ্রং তে যথাকামং চরাবলে
বিভেতি রাজা সুশ্রোণি গন্ধর্বেভ্যঃ পরাভবাৎ
23.10
ন হি তামুত্সহে বক্তুং স্বয়ং গন্ধর্বরক্ষিতাম্
স্ত্রিয়স্ত্বদোষাস্তাং বক্তুমতস্ত্বাং প্রব্রবীম্যহম্
23.11
অথ মুক্তা ভয়াত্কৃষ্ণা সূতপুত্রান্নিরস্য চ
মোক্ষিতা ভীমসেনেন জগাম নগরং প্রতি
23.12
ত্রাসিতেব মৃগী বালা শার্দূলেন মনস্বিনী
গাত্রাণি বাসসী চৈব প্রক্ষাল্য সলিলেন সা
23.13
তাং দৃষ্ট্বা পুরুষা রাজন্প্রাদ্রবন্ত দিশো দশ
গন্ধর্বাণাং ভয়ত্রস্তাঃ কেচিদ্দৃষ্টীর্ন্যমীলয়ন্
23.14
ততো মহানসদ্বারি ভীমসেনমবস্থিতম্
দদর্শ রাজন্পাঞ্চালী যথা মত্তং মহাদ্বিপম্
23.15
তং বিস্ময়ন্তী শনকৈঃ সংজ্ঞাভিরিদমব্রবীৎ
গন্ধর্বরাজায় নমো যেনাস্মি পরিমোচিতা
23.16
ভীমসেন উবাচ
যে যস্যা বিচরন্তীহ পুরুষা বশবর্তিনঃ
তস্যাস্তে বচনং শ্রুত্বা অনৃণা বিচরন্ত্যুত
23.17
বৈশংপায়ন উবাচ
ততঃ সা নর্তনাগারে ধনংজয়মপশ্যত
রাজ্ঞঃ কন্যা বিরাটস্য নর্তয়ানং মহাভুজম্
23.18
ততস্তা নর্তনাগারাদ্বিনিষ্ক্রম্য সহার্জুনাঃ
কন্যা দদৃশুরায়ান্তীং কৃষ্ণাং ক্লিষ্টামনাগসম্
23.19
কন্যা ঊচুঃ
দিষ্ট্যা সৈরন্ধ্রি মুক্তাসি দিষ্ট্যাসি পুনরাগতা
দিষ্ট্যা বিনিহতাঃ সূতা যে ত্বাং ক্লিশ্যন্ত্যনাগসম্
23.20
বৃহন্নডোবাচ
কথং সৈরন্ধ্রি মুক্তাসি কথং পাপাশ্চ তে হতাঃ
ইচ্ছামি বৈ তব শ্রোতুং সর্বমেব যথাতথম্
23.21
সৈরন্ধ্র্যুবাচ
বৃহন্নডে কিং নু তব সৈরন্ধ্র্যা কার্যমদ্য বৈ
যা ত্বং বসসি কল্যাণি সদা কন্যাপুরে সুখম্
23.22
ন হি দুঃখং সমাপ্নোষি সৈরন্ধ্রী যদুপাশ্নুতে
তেন মাং দুঃখিতামেবং পৃচ্ছসে প্রহসন্নিব
23.23
বৃহন্নডোবাচ
বৃহন্নডাপি কল্যাণি দুঃখমাপ্নোত্যনুত্তমম্
তির্যগ্যোনিগতা বালে ন চৈনামববুধ্যসে
23.24
বৈশংপায়ন উবাচ
ততঃ সহৈব কন্যাভির্দ্রৌপদী রাজবেশ্ম তৎ
প্রবিবেশ সুদেষ্ণায়াঃ সমীপমপলায়িনী
23.25
তামব্রবীদ্রাজপুত্রী বিরাটবচনাদিদম্
সৈরন্ধ্রি গম্যতাং শীঘ্রং যত্র কাময়সে গতিম্
23.26
রাজা বিভেতি ভদ্রং তে গন্ধর্বেভ্যঃ পরাভবাৎ
ত্বং চাপি তরুণী সুভ্রু রূপেণাপ্রতিমা ভুবি
23.27
সৈরন্ধ্র্যুবাচ
ত্রয়োদশাহমাত্রং মে রাজা ক্ষমতু ভামিনি
কৃতকৃত্যা ভবিষ্যন্তি গন্ধর্বাস্তে ন সংশয়ঃ
23.28
ততো মাং তেঽপনেষ্যন্তি করিষ্যন্তি চ তে প্রিয়ম্
ধ্রুবং চ শ্রেয়সা রাজা যোক্ষ্যতে সহ বান্ধবৈঃ