Utshovঅধ্যায় 22
22.1
বৈশংপায়ন উবাচ
তস্মিন্কালে সমাগম্য সর্বে তত্রাস্য বান্ধবাঃ
রুরুদুঃ কীচকং দৃষ্ট্বা পরিবার্য সমন্ততঃ
22.2
সর্বে সংহৃষ্টরোমাণঃ সংত্রস্তাঃ প্রেক্ষ্য কীচকম্
তথা সর্বাঙ্গসংভুগ্নং কূর্মং স্থল ইবোদ্ধৃতম্
22.3
পোথিতং ভীমসেনেন তমিন্দ্রেণেব দানবম্
সংস্কারয়িতুমিচ্ছন্তো বহির্নেতুং প্রচক্রমুঃ
22.4
দদৃশুস্তে ততঃ কৃষ্ণাং সূতপুত্রাঃ সমাগতাঃ
অদূরাদনবদ্যাঙ্গীং স্তম্ভমালিঙ্গ্য তিষ্ঠতীম্
22.5
সমবেতেষু সূতেষু তানুবাচোপকীচকঃ
হন্যতাং শীঘ্রমসতী যত্কৃতে কীচকো হতঃ
22.6
অথ বা নেহ হন্তব্যা দহ্যতাং কামিনা সহ
মৃতস্যাপি প্রিয়ং কার্যং সূতপুত্রস্য সর্বথা
22.7
ততো বিরাটমূচুস্তে কীচকোঽস্যাঃ কৃতে হতঃ
সহাদ্যানেন দহ্যেত তদনুজ্ঞাতুমর্হসি
22.8
পরাক্রমং তু সূতানাং মত্বা রাজান্বমোদত
সৈরন্ধ্র্যাঃ সূতপুত্রেণ সহ দাহং বিশাং পতে
22.9
তাং সমাসাদ্য বিত্রস্তাং কৃষ্ণাং কমললোচনাম্
মোমুহ্যমানাং তে তত্র জগৃহুঃ কীচকা ভৃশম্
22.10
ততস্তু তাং সমারোপ্য নিবধ্য চ সুমধ্যমাম্
জগ্মুরুদ্যম্য তে সর্বে শ্মশানমভিতস্তদা
22.11
হ্রিয়মাণা তু সা রাজন্সূতপুত্রৈরনিন্দিতা
প্রাক্রোশন্নাথমিচ্ছন্তী কৃষ্ণা নাথবতী সতী
22.12
দ্রৌপদ্যুবাচ
জয়ো জয়ন্তো বিজয়ো জয়ত্সেনো জয়দ্বলঃ
তে মে বাচং বিজানন্তু সূতপুত্রা নয়ন্তি মাম্
22.13
যেষাং জ্যাতলনির্ঘোষো বিস্ফূর্জিতমিবাশনেঃ
ব্যশ্রূয়ত মহায়ুদ্ধে ভীমঘোষস্তরস্বিনাম্
22.14
রথঘোষশ্চ বলবান্গন্ধর্বাণাং যশস্বিনাম্
তে মে বাচং বিজানন্তু সূতপুত্রা নয়ন্তি মাম্
22.15
বৈশংপায়ন উবাচ
তস্যাস্তাঃ কৃপণা বাচঃ কৃষ্ণায়াঃ পরিদেবিতাঃ
শ্রুত্বৈবাভ্যপতদ্ভীমঃ শয়নাদবিচারয়ন্
22.16
ভীমসেন উবাচ
অহং শৃণোমি তে বাচং ত্বয়া সৈরন্ধ্রি ভাষিতাম্
তস্মাত্তে সূতপুত্রেভ্যো ন ভয়ং ভীরু বিদ্যতে
22.17
বৈশংপায়ন উবাচ
ইত্যুক্ত্বা স মহাবাহুর্বিজজৃম্ভে জিঘাংসয়া
ততঃ স ব্যায়তং কৃত্বা বেষং বিপরিবর্ত্য চ
অদ্বারেণাভ্যবস্কন্দ্য নির্জগাম বহিস্তদা
22.18
স ভীমসেনঃ প্রাকারাদারুজ্য তরসা দ্রুমম্
শ্মশানাভিমুখঃ প্রায়াদ্যত্র তে কীচকা গতাঃ
22.19
স তং বৃক্ষং দশব্যামং সস্কন্ধবিটপং বলী
প্রগৃহ্যাভ্যদ্রবত্সূতান্দণ্ডপাণিরিবান্তকঃ
22.20
ঊরুবেগেন তস্যাথ ন্যগ্রোধাশ্বত্থকিংশুকাঃ
ভূমৌ নিপতিতা বৃক্ষাঃ সংঘশস্তত্র শেরতে
22.21
তং সিংহমিব সংক্রুদ্ধং দৃষ্ট্বা গন্ধর্বমাগতম্
বিত্রেসুঃ সর্বতঃ সূতা বিষাদভয়কম্পিতাঃ
22.22
তমন্তকমিবায়ান্তং গন্ধর্বং প্রেক্ষ্য তে তদা
দিধক্ষন্তস্তদা জ্যেষ্ঠং ভ্রাতরং হ্যুপকীচকাঃ
পরস্পরমথোচুস্তে বিষাদভয়কম্পিতাঃ
22.23
গন্ধর্বো বলবানেতি ক্রুদ্ধ উদ্যম্য পাদপম্
সৈরন্ধ্রী মুচ্যতাং শীঘ্রং মহন্নো ভয়মাগতম্
22.24
তে তু দৃষ্ট্বা তমাবিদ্ধং ভীমসেনেন পাদপম্
বিমুচ্য দ্রৌপদীং তত্র প্রাদ্রবন্নগরং প্রতি
22.25
দ্রবতস্তাংস্তু সংপ্রেক্ষ্য স বজ্রী দানবানিব
শতং পঞ্চাধিকং ভীমঃ প্রাহিণোদ্যমসাদনম্
22.26
তত আশ্বাসয়ত্কৃষ্ণাং প্রবিমুচ্য বিশাং পতে
উবাচ চ মহাবাহুঃ পাঞ্চালীং তত্র দ্রৌপদীম্
অশ্রুপূর্ণমুখীং দীনাং দুর্ধর্ষঃ স বৃকোদরঃ
22.27
এবং তে ভীরু বধ্যন্তে যে ত্বাং ক্লিশ্যন্ত্যনাগসম্
প্রৈহি ত্বং নগরং কৃষ্ণে ন ভয়ং বিদ্যতে তব
অন্যেনাহং গমিষ্যামি বিরাটস্য মহানসম্
22.28
পঞ্চাধিকং শতং তচ্চ নিহতং তত্র ভারত
মহাবনমিব ছিন্নং শিশ্যে বিগলিতদ্রুমম্
22.29
এবং তে নিহতা রাজঞ্শতং পঞ্চ চ কীচকাঃ
স চ সেনাপতিঃ পূর্বমিত্যেতত্সূতষট্শতম্
22.30
তদ্দৃষ্ট্বা মহদাশ্চর্যং নরা নার্যশ্চ সংগতাঃ
বিস্ময়ং পরমং গত্বা নোচুঃ কিংচন ভারত