Utshovঅধ্যায় 21
21.1
ভীমসেন উবাচ
তথা ভদ্রে করিষ্যামি যথা ত্বং ভীরু ভাষসে
অদ্য তং সূদয়িষ্যামি কীচকং সহবান্ধবম্
21.2
অস্যাঃ প্রদোষে শর্বর্যাঃ কুরুষ্বানেন সংগমম্
দুঃখং শোকং চ নির্ধূয় যাজ্ঞসেনি শুচিস্মিতে
21.3
যৈষা নর্তনশালা বৈ মত্স্যরাজেন কারিতা
দিবাত্র কন্যা নৃত্যন্তি রাত্রৌ যান্তি যথাগৃহম্
21.4
তত্রাস্তি শয়নং ভীরু দৃঢাঙ্গং সুপ্রতিষ্ঠিতম্
তত্রাস্য দর্শয়িষ্যামি পূর্বপ্রেতান্পিতামহান্
21.5
যথা চ ত্বাং ন পশ্যেয়ুঃ কুর্বাণাং তেন সংবিদম্
কুর্যাস্তথা ত্বং কল্যাণি যথা সংনিহিতো ভবেৎ
21.6
বৈশংপায়ন উবাচ
তথা তৌ কথয়িত্বা তু বাষ্পমুত্সৃজ্য দুঃখিতৌ
রাত্রিশেষং তদত্যুগ্রং ধারয়ামাসতুর্হৃদা
21.7
তস্যাং রাত্র্যাং ব্যতীতায়াং প্রাতরুত্থায় কীচকঃ
গত্বা রাজকুলায়ৈব দ্রৌপদীমিদমব্রবীৎ
21.8
সভায়াং পশ্যতো রাজ্ঞঃ পাতয়িত্বা পদাহনম্
ন চৈবালভথাস্ত্রাণমভিপন্না বলীয়সা
21.9
প্রবাদেন হি মত্স্যানাং রাজা নাম্নায়মুচ্যতে
অহমেব হি মত্স্যানাং রাজা বৈ বাহিনীপতিঃ
21.10
সা সুখং প্রতিপদ্যস্ব দাসো ভীরু ভবামি তে
অহ্নায় তব সুশ্রোণি শতং নিষ্কান্দদাম্যহম্
21.11
দাসীশতং চ তে দদ্যাং দাসানামপি চাপরম্
রথং চাশ্বতরীয়ুক্তমস্তু নৌ ভীরু সংগমঃ
21.12
দ্রৌপদ্যুবাচ
একং মে সময়ং ত্বদ্য প্রতিপদ্যস্ব কীচক
ন ত্বাং সখা বা ভ্রাতা বা জানীয়াত্সংগতং ময়া
21.13
অববোধাদ্ধি ভীতাস্মি গন্ধর্বাণাং যশস্বিনাম্
এবং মে প্রতিজানীহি ততোঽহং বশগা তব
21.14
কীচক উবাচ
এবমেতত্করিষ্যামি যথা সুশ্রোণি ভাষসে
একো ভদ্রে গমিষ্যামি শূন্যমাবসথং তব
21.15
সমাগমার্থং রম্ভোরু ত্বয়া মদনমোহিতঃ
যথা ত্বাং নাবভোত্স্যন্তি গন্ধর্বাঃ সূর্যবর্চসঃ
21.16
দ্রৌপদ্যুবাচ
যদিদং নর্তনাগারং মত্স্যরাজেন কারিতম্
দিবাত্র কন্যা নৃত্যন্তি রাত্রৌ যান্তি যথাগৃহম্
21.17
তমিস্রে তত্র গচ্ছেথা গন্ধর্বাস্তন্ন জানতে
তত্র দোষঃ পরিহৃতো ভবিষ্যতি ন সংশয়ঃ
21.18
বৈশংপায়ন উবাচ
তমর্থং প্রতিজল্পন্ত্যাঃ কৃষ্ণায়াঃ কীচকেন হ
দিবসার্ধং সমভবন্মাসেনৈব সমং নৃপ
21.19
কীচকোঽথ গৃহং গত্বা ভৃশং হর্ষপরিপ্লুতঃ
সৈরন্ধ্রীরূপিণং মূঢো মৃত্যুং তং নাববুদ্ধবান্
21.20
গন্ধাভরণমাল্যেষু ব্যাসক্তঃ স বিশেষতঃ
অলংচকার সোঽঽত্মানং সত্বরঃ কামমোহিতঃ
21.21
তস্য তত্কুর্বতঃ কর্ম কালো দীর্ঘ ইবাভবৎ
অনুচিন্তয়তশ্চাপি তামেবায়তলোচনাম্
21.22
আসীদভ্যধিকা চাস্য শ্রীঃ শ্রিয়ং প্রমুমুক্ষতঃ
নির্বাণকালে দীপস্য বর্তীমিব দিধক্ষতঃ
21.23
কৃতসংপ্রত্যয়স্তত্র কীচকঃ কামমোহিতঃ
নাজানাদ্দিবসং যান্তং চিন্তয়ানঃ সমাগমম্
21.24
ততস্তু দ্রৌপদী গত্বা তদা ভীমং মহানসে
উপাতিষ্ঠত কল্যাণী কৌরব্যং পতিমন্তিকাৎ
21.25
তমুবাচ সুকেশান্তা কীচকস্য ময়া কৃতঃ
সংগমো নর্তনাগারে যথাবোচঃ পরংতপ
21.26
শূন্যং স নর্তনাগারমাগমিষ্যতি কীচকঃ
একো নিশি মহাবাহো কীচকং তং নিষূদয়
21.27
তং সূতপুত্রং কৌন্তেয় কীচকং মদদর্পিতম্
গত্বা ত্বং নর্তনাগারং নির্জীবং কুরু পাণ্ডব
21.28
দর্পাচ্চ সূতপুত্রোঽসৌ গন্ধর্বানবমন্যতে
তং ত্বং প্রহরতাং শ্রেষ্ঠ নডং নাগ ইবোদ্ধর
21.29
অশ্রু দুঃখাভিভূতায়া মম মার্জস্ব ভারত
আত্মনশ্চৈব ভদ্রং তে কুরু মানং কুলস্য চ
21.30
ভীমসেন উবাচ
স্বাগতং তে বরারোহে যন্মা বেদয়সে প্রিয়ম্
ন হ্যস্য কংচিদিচ্ছামি সহায়ং বরবর্ণিনি
21.31
যা মে প্রীতিস্ত্বয়াখ্যাতা কীচকস্য সমাগমে
হত্বা হিডিম্বং সা প্রীতির্মমাসীদ্বরবর্ণিনি
21.32
সত্যং ভ্রাতৄংশ্চ ধর্মং চ পুরস্কৃত্য ব্রবীমি তে
কীচকং নিহনিষ্যামি বৃত্রং দেবপতির্যথা
21.33
তং গহ্বরে প্রকাশে বা পোথয়িষ্যামি কীচকম্
অথ চেদবভোত্স্যন্তি হংস্যে মত্স্যানপি ধ্রুবম্
21.34
ততো দুর্যোধনং হত্বা প্রতিপত্স্যে বসুংধরাম্
কামং মত্স্যমুপাস্তাং হি কুন্তীপুত্রো যুধিষ্ঠিরঃ
21.35
দ্রৌপদ্যুবাচ
যথা ন সংত্যজেথাস্ত্বং সত্যং বৈ মত্কৃতে বিভো
নিগূঢস্ত্বং তথা বীর কীচকং বিনিপাতয়
21.36
ভীমসেন উবাচ
এবমেতত্করিষ্যামি যথা ত্বং ভীরু ভাষসে
অদৃশ্যমানস্তস্যাদ্য তমস্বিন্যামনিন্দিতে
21.37
নাগো বিল্বমিবাক্রম্য পোথয়িষ্যাম্যহং শিরঃ
অলভ্যামিচ্ছতস্তস্য কীচকস্য দুরাত্মনঃ
21.38
বৈশংপায়ন উবাচ
ভীমোঽথ প্রথমং গত্বা রাত্রৌ ছন্ন উপাবিশৎ
মৃগং হরিরিবাদৃশ্যঃ প্রত্যাকাঙ্ক্ষত্স কীচকম্
21.39
কীচকশ্চাপ্যলংকৃত্য যথাকামমুপাব্রজৎ
তাং বেলাং নর্তনাগারে পাঞ্চালীসংগমাশয়া
21.40
মন্যমানঃ স সংকেতমাগারং প্রাবিশচ্চ তম্
প্রবিশ্য চ স তদ্বেশ্ম তমসা সংবৃতং মহৎ
21.41
পূর্বাগতং ততস্তত্র ভীমমপ্রতিমৌজসম্
একান্তমাস্থিতং চৈনমাসসাদ সুদুর্মতিঃ
21.42
শয়ানং শয়নে তত্র মৃত্যুং সূতঃ পরামৃশৎ
জাজ্বল্যমানং কোপেন কৃষ্ণাধর্ষণজেন হ
21.43
উপসংগম্য চৈবৈনং কীচকঃ কামমোহিতঃ
হর্ষোন্মথিতচিত্তাত্মা স্ময়মানোঽভ্যভাষত
21.44
প্রাপিতং তে ময়া বিত্তং বহুরূপমনন্তকম্
তত্সর্বং ত্বাং সমুদ্দিশ্য সহসা সমুপাগতঃ
21.45
নাকস্মান্মাং প্রশংসন্তি সদা গৃহগতাঃ স্ত্রিয়ঃ
সুবাসা দর্শনীয়শ্চ নান্যোঽস্তি ত্বাদৃশঃ পুমান্
21.46
ভীমসেন উবাচ
দিষ্ট্যা ত্বং দর্শনীয়োঽসি দিষ্ট্যাত্মানং প্রশংসসি
ঈদৃশস্তু ত্বয়া স্পর্শঃ স্পৃষ্টপূর্বো ন কর্হিচিৎ
21.47
বৈশংপায়ন উবাচ
ইত্যুক্ত্বা তং মহাবাহুর্ভীমো ভীমপরাক্রমঃ
সমুত্পত্য চ কৌন্তেয়ঃ প্রহস্য চ নরাধমম্
ভীমো জগ্রাহ কেশেষু মাল্যবত্সু সুগন্ধিষু
21.48
স কেশেষু পরামৃষ্টো বলেন বলিনাং বরঃ
আক্ষিপ্য কেশান্বেগেন বাহ্বোর্জগ্রাহ পাণ্ডবম্
21.49
বাহুয়ুদ্ধং তয়োরাসীত্ক্রুদ্ধয়োর্নরসিংহয়োঃ
বসন্তে বাশিতাহেতোর্বলবদ্গজয়োরিব
21.50
ঈষদাগলিতং চাপি ক্রোধাচ্চলপদং স্থিতম্
কীচকো বলবান্ভীমং জানুভ্যামাক্ষিপদ্ভুবি
21.51
পাতিতো ভুবি ভীমস্তু কীচকেন বলীয়সা
উত্পপাতাথ বেগেন দণ্ডাহত ইবোরগঃ
21.52
স্পর্ধয়া চ বলোন্মত্তৌ তাবুভৌ সূতপাণ্ডবৌ
নিশীথে পর্যকর্ষেতাং বলিনৌ নিশি নির্জনে
21.53
ততস্তদ্ভবনশ্রেষ্ঠং প্রাকম্পত মুহুর্মুহুঃ
বলবচ্চাপি সংক্রুদ্ধাবন্যোন্যং তাবগর্জতাম্
21.54
তলাভ্যাং তু স ভীমেন বক্ষস্যভিহতো বলী
কীচকো রোষসংতপ্তঃ পদান্ন চলিতঃ পদম্
21.55
মুহূর্তং তু স তং বেগং সহিত্বা ভুবি দুঃসহম্
বলাদহীয়ত তদা সূতো ভীমবলার্দিতঃ
21.56
তং হীয়মানং বিজ্ঞায় ভীমসেনো মহাবলঃ
বক্ষস্যানীয় বেগেন মমন্থৈনং বিচেতসম্
21.57
ক্রোধাবিষ্টো বিনিঃশ্বস্য পুনশ্চৈনং বৃকোদরঃ
জগ্রাহ জয়তাং শ্রেষ্ঠঃ কেশেষ্বেব তদা ভৃশম্
21.58
গৃহীত্বা কীচকং ভীমো বিরুরাব মহাবলঃ
শার্দূলঃ পিশিতাকাঙ্ক্ষী গৃহীত্বেব মহামৃগম্
21.59
তস্য পাদৌ চ পাণী চ শিরো গ্রীবাং চ সর্বশঃ
কায়ে প্রবেশয়ামাস পশোরিব পিনাকধৃক্
21.60
তং সংমথিতসর্বাঙ্গং মাংসপিণ্ডোপমং কৃতম্
কৃষ্ণায়ৈ দর্শয়ামাস ভীমসেনো মহাবলঃ
21.61
উবাচ চ মহাতেজা দ্রৌপদীং পাণ্ডুনন্দনঃ
পশ্যৈনমেহি পাঞ্চালি কামুকোঽয়ং যথা কৃতঃ
21.62
তথা স কীচকং হত্বা গত্বা রোষস্য বৈ শমম্
আমন্ত্র্য দ্রৌপদীং কৃষ্ণাং ক্ষিপ্রমায়ান্মহানসম্
21.63
কীচকং ঘাতয়িত্বা তু দ্রৌপদী যোষিতাং বরা
প্রহৃষ্টা গতসংতাপা সভাপালানুবাচ হ
21.64
কীচকোঽয়ং হতঃ শেতে গন্ধর্বৈঃ পতিভির্মম
পরস্ত্রীকামসংমত্তঃ সমাগচ্ছত পশ্যত
21.65
তচ্ছ্রুত্বা ভাষিতং তস্যা নর্তনাগাররক্ষিণঃ
সহসৈব সমাজগ্মুরাদায়োল্কাঃ সহস্রশঃ
21.66
ততো গত্বাথ তদ্বেশ্ম কীচকং বিনিপাতিতম্
গতাসুং দদৃশুর্ভূমৌ রুধিরেণ সমুক্ষিতম্
21.67
ক্বাস্য গ্রীবা ক্ব চরণৌ ক্ব পাণী ক্ব শিরস্তথা
ইতি স্ম তং পরীক্ষন্তে গন্ধর্বেণ হতং তদা