Utshovঅধ্যায় 20
20.1
ভীমসেন উবাচ
ধিগস্তু মে বাহুবলং গাণ্ডীবং ফল্গুনস্য চ
যত্তে রক্তৌ পুরা ভূত্বা পাণী কৃতকিণাবুভৌ
20.2
সভায়াং স্ম বিরাটস্য করোমি কদনং মহৎ
তত্র মাং ধর্মরাজস্তু কটাক্ষেণ ন্যবারয়ৎ
তদহং তস্য বিজ্ঞায় স্থিত এবাস্মি ভামিনি
20.3
যচ্চ রাষ্ট্রাত্প্রচ্যবনং কুরূণামবধশ্চ যঃ
সুয়োধনস্য কর্ণস্য শকুনেঃ সৌবলস্য চ
20.4
দুঃশাসনস্য পাপস্য যন্ময়া ন হৃতং শিরঃ
তন্মে দহতি কল্যাণি হৃদি শল্যমিবার্পিতম্
মা ধর্মং জহি সুশ্রোণি ক্রোধং জহি মহামতে
20.5
ইমং চ সমুপালম্ভং ত্বত্তো রাজা যুধিষ্ঠিরঃ
শৃণুয়াদ্যদি কল্যাণি কৃত্স্নং জহ্যাত্স জীবিতম্
20.6
ধনংজয়ো বা সুশ্রোণি যমৌ বা তনুমধ্যমে
লোকান্তরগতেষ্বেষু নাহং শক্ষ্যামি জীবিতুম্
20.7
সুকন্যা নাম শার্যাতী ভার্গবং চ্যবনং বনে
বল্মীকভূতং শাম্যন্তমন্বপদ্যত ভামিনী
20.8
নাডায়নী চেন্দ্রসেনা রূপেণ যদি তে শ্রুতা
পতিমন্বচরদ্বৃদ্ধং পুরা বর্ষসহস্রিণম্
20.9
দুহিতা জনকস্যাপি বৈদেহী যদি তে শ্রুতা
পতিমন্বচরত্সীতা মহারণ্যনিবাসিনম্
20.10
রক্ষসা নিগ্রহং প্রাপ্য রামস্য মহিষী প্রিয়া
ক্লিশ্যমানাপি সুশ্রোণী রামমেবান্বপদ্যত
20.11
লোপামুদ্রা তথা ভীরু বয়োরূপসমন্বিতা
অগস্ত্যমন্বয়াদ্ধিত্বা কামান্সর্বানমানুষান্
20.12
যথৈতাঃ কীর্তিতা নার্যো রূপবত্যঃ পতিব্রতাঃ
তথা ত্বমপি কল্যাণি সর্বৈঃ সমুদিতা গুণৈঃ
20.13
মাদীর্ঘং ক্ষম কালং ত্বং মাসমধ্যর্ধসংমিতম্
পূর্ণে ত্রয়োদশে বর্ষে রাজ্ঞো রাজ্ঞী ভবিষ্যসি
20.14
দ্রৌপদ্যুবাচ
আর্তয়ৈতন্ময়া ভীম কৃতং বাষ্পবিমোক্ষণম্
অপারয়ন্ত্যা দুঃখানি ন রাজানমুপালভে
20.15
বিমুক্তেন ব্যতীতেন ভীমসেন মহাবল
প্রত্যুপস্থিতকালস্য কার্যস্যানন্তরো ভব
20.16
মমেহ ভীম কৈকেয়ী রূপাভিভবশঙ্কয়া
নিত্যমুদ্বিজতে রাজা কথং নেয়াদিমামিতি
20.17
তস্যা বিদিত্বা তং ভাবং স্বয়ং চানৃতদর্শনঃ
কীচকোঽয়ং সুদুষ্টাত্মা সদা প্রার্থয়তে হি মাম্
20.18
তমহং কুপিতা ভীম পুনঃ কোপং নিয়ম্য চ
অব্রুবং কামসংমূঢমাত্মানং রক্ষ কীচক
20.19
গন্ধর্বাণামহং ভার্যা পঞ্চানাং মহিষী প্রিয়া
তে ত্বাং নিহন্যুর্দুর্ধর্ষাঃ শূরাঃ সাহসকারিণঃ
20.20
এবমুক্তঃ স দুষ্টাত্মা কীচকঃ প্রত্যুবাচ হ
নাহং বিভেমি সৈরন্ধ্রি গন্ধর্বাণাং শুচিস্মিতে
20.21
শতং সহস্রমপি বা গন্ধর্বাণামহং রণে
সমাগতং হনিষ্যামি ত্বং ভীরু কুরু মে ক্ষণম্
20.22
ইত্যুক্তে চাব্রুবং সূতং কামাতুরমহং পুনঃ
ন ত্বং প্রতিবলস্তেষাং গন্ধর্বাণাং যশস্বিনাম্
20.23
ধর্মে স্থিতাস্মি সততং কুলশীলসমন্বিতা
নেচ্ছামি কংচিদ্বধ্যন্তং তেন জীবসি কীচক
20.24
এবমুক্তঃ স দুষ্টাত্মা প্রহস্য স্বনবত্তদা
ন তিষ্ঠতি স্ম সন্মার্গে ন চ ধর্মং বুভূষতি
20.25
পাপাত্মা পাপভাবশ্চ কামরাগবশানুগঃ
অবিনীতশ্চ দুষ্টাত্মা প্রত্যাখ্যাতঃ পুনঃ পুনঃ
দর্শনে দর্শনে হন্যাত্তথা জহ্যাং চ জীবিতম্
20.26
তদ্ধর্মে যতমানানাং মহান্ধর্মো নশিষ্যতি
সময়ং রক্ষমাণানাং ভার্যা বো ন ভবিষ্যতি
20.27
ভার্যায়াং রক্ষ্যমাণায়াং প্রজা ভবতি রক্ষিতা
প্রজায়াং রক্ষ্যমাণায়ামাত্মা ভবতি রক্ষিতঃ
20.28
বদতাং বর্ণধর্মাংশ্চ ব্রাহ্মণানাং হি মে শ্রুতম্
ক্ষত্রিয়স্য সদা ধর্মো নান্যঃ শত্রুনিবর্হণাৎ
20.29
পশ্যতো ধর্মরাজস্য কীচকো মাং পদাবধীৎ
তব চৈব সমক্ষং বৈ ভীমসেন মহাবল
20.30
ত্বয়া হ্যহং পরিত্রাতা তস্মাদ্ঘোরাজ্জটাসুরাৎ
জয়দ্রথং তথৈব ত্বমজৈষীর্ভ্রাতৃভিঃ সহ
20.31
জহীমমপি পাপং ত্বং যোঽয়ং মামবমন্যতে
কীচকো রাজবাল্লভ্যাচ্ছোককৃন্মম ভারত
20.32
তমেবং কামসংমত্তং ভিন্ধি কুম্ভমিবাশ্মনি
যো নিমিত্তমনর্থানাং বহূনাং মম ভারত
20.33
তং চেজ্জীবন্তমাদিত্যঃ প্রাতরভ্যুদয়িষ্যতি
বিষমালোড্য পাস্যামি মা কীচকবশং গমম্
শ্রেয়ো হি মরণং মহ্যং ভীমসেন তবাগ্রতঃ
20.34
বৈশংপায়ন উবাচ
ইত্যুক্ত্বা প্রারুদত্কৃষ্ণা ভীমস্যোরঃ সমাশ্রিতা
ভীমশ্চ তাং পরিষ্বজ্য মহত্সান্ত্বং প্রয়ুজ্য চ
কীচকং মনসাগচ্ছত্সৃক্কিণী পরিসংলিহন্