Utshovঅধ্যায় 19
19.1
দ্রৌপদ্যুবাচ
অহং সৈরন্ধ্রিবেষেণ চরন্তী রাজবেশ্মনি
শৌচদাস্মি সুদেষ্ণায়া অক্ষধূর্তস্য কারণাৎ
19.2
বিক্রিয়াং পশ্য মে তীব্রাং রাজপুত্র্যাঃ পরংতপ
আসে কালমুপাসীনা সর্বং দুঃখং কিলার্তবৎ
19.3
অনিত্যা কিল মর্ত্যানামর্থসিদ্ধির্জয়াজয়ৌ
ইতি কৃত্বা প্রতীক্ষামি ভর্তৄণামুদয়ং পুনঃ
19.4
য এব হেতুর্ভবতি পুরুষস্য জয়াবহঃ
পরাজয়ে চ হেতুঃ স ইতি চ প্রতিপালয়ে
19.5
দত্ত্বা যাচন্তি পুরুষা হত্বা বধ্যন্তি চাপরে
পাতয়িত্বা চ পাত্যন্তে পরৈরিতি চ মে শ্রুতম্
19.6
ন দৈবস্যাতিভারোঽস্তি ন দৈবস্যাতিবর্তনম্
ইতি চাপ্যাগমং ভূয়ো দৈবস্য প্রতিপালয়ে
19.7
স্থিতং পূর্বং জলং যত্র পুনস্তত্রৈব তিষ্ঠতি
ইতি পর্যায়মিচ্ছন্তী প্রতীক্ষাম্যুদয়ং পুনঃ
19.8
দৈবেন কিল যস্যার্থঃ সুনীতোঽপি বিপদ্যতে
দৈবস্য চাগমে যত্নস্তেন কার্যো বিজানতা
19.9
যত্তু মে বচনস্যাস্য কথিতস্য প্রয়োজনম্
পৃচ্ছ মাং দুঃখিতাং তত্ত্বমপৃষ্টা বা ব্রবীমি তে
19.10
মহিষী পাণ্ডুপুত্রাণাং দুহিতা দ্রুপদস্য চ
ইমামবস্থাং সংপ্রাপ্তা কা মদন্যা জিজীবিষেৎ
19.11
কুরূন্পরিভবন্সর্বান্পাঞ্চালানপি ভারত
পাণ্ডবেয়াংশ্চ সংপ্রাপ্তো মম ক্লেশো হ্যরিংদম
19.12
ভ্রাতৃভিঃ শ্বশুরৈঃ পুত্রৈর্বহুভিঃ পরবীরহন্
এবং সমুদিতা নারী কা ন্বন্যা দুঃখিতা ভবেৎ
19.13
নূনং হি বালয়া ধাতুর্ময়া বৈ বিপ্রিয়ং কৃতম্
যস্য প্রসাদাদ্দুর্নীতং প্রাপ্তাস্মি ভরতর্ষভ
19.14
বর্ণাবকাশমপি মে পশ্য পাণ্ডব যাদৃশম্
যাদৃশো মে ন তত্রাসীদ্দুঃখে পরমকে তদা
19.15
ত্বমেব ভীম জানীষে যন্মে পার্থ সুখং পুরা
সাহং দাসত্বমাপন্না ন শান্তিমবশা লভে
19.16
নাদৈবিকমিদং মন্যে যত্র পার্থো ধনংজয়ঃ
ভীমধন্বা মহাবাহুরাস্তে শান্ত ইবানলঃ
19.17
অশক্যা বেদিতুং পার্থ প্রাণিনাং বৈ গতির্নরৈঃ
বিনিপাতমিমং মন্যে যুষ্মাকমবিচিন্তিতম্
19.18
যস্যা মম মুখপ্রেক্ষা যূয়মিন্দ্রসমাঃ সদা
সা প্রেক্ষে মুখমন্যাসামবরাণাং বরা সতী
19.19
পশ্য পাণ্ডব মেঽবস্থাং যথা নার্হামি বৈ তথা
যুষ্মাসু ধ্রিয়মাণেষু পশ্য কালস্য পর্যয়ম্
19.20
যস্যাঃ সাগরপর্যন্তা পৃথিবী বশবর্তিনী
আসীত্সাদ্য সুদেষ্ণায়া ভীতাহং বশবর্তিনী
19.21
যস্যাঃ পুরঃসরা আসন্পৃষ্ঠতশ্চানুগামিনঃ
সাহমদ্য সুদেষ্ণায়াঃ পুরঃ পশ্চাচ্চ গামিনী
ইদং তু দুঃখং কৌন্তেয় মমাসহ্যং নিবোধ তৎ
19.22
যা ন জাতু স্বয়ং পিংষে গাত্রোদ্বর্তনমাত্মনঃ
অন্যত্র কুন্ত্যা ভদ্রং তে সাদ্য পিংষামি চন্দনম্
পশ্য কৌন্তেয় পাণী মে নৈবং যৌ ভবতঃ পুরা
19.23
বৈশংপায়ন উবাচ
ইত্যস্য দর্শয়ামাস কিণবদ্ধৌ করাবুভৌ
19.24
দ্রৌপদ্যুবাচ
বিভেমি কুন্ত্যা যা নাহং যুষ্মাকং বা কদাচন
সাদ্যাগ্রতো বিরাটস্য ভীতা তিষ্ঠামি কিংকরী
19.25
কিং নু বক্ষ্যতি সম্রাণ্মাং বর্ণকঃ সুকৃতো ন বা
নান্যপিষ্টং হি মত্স্যস্য চন্দনং কিল রোচতে
19.26
বৈশংপায়ন উবাচ
সা কীর্তয়ন্তী দুঃখানি ভীমসেনস্য ভামিনী
রুরোদ শনকৈঃ কৃষ্ণা ভীমসেনমুদীক্ষতী
19.27
সা বাষ্পকলয়া বাচা নিঃশ্বসন্তী পুনঃ পুনঃ
হৃদয়ং ভীমসেনস্য ঘট্টয়ন্তীদমব্রবীৎ
19.28
নাল্পং কৃতং ময়া ভীম দেবানাং কিল্বিষং পুরা
অভাগ্যা যত্তু জীবামি মর্তব্যে সতি পাণ্ডব
19.29
ততস্তস্যাঃ করৌ শূনৌ কিণবদ্ধৌ বৃকোদরঃ
মুখমানীয় বেপন্ত্যা রুরোদ পরবীরহা
19.30
তৌ গৃহীত্বা চ কৌন্তেয়ো বাষ্পমুত্সৃজ্য বীর্যবান্
ততঃ পরমদুঃখার্ত ইদং বচনমব্রবীৎ