Utshovঅধ্যায় 18
18.1
দ্রৌপদ্যুবাচ
ইদং তু মে মহদ্দুঃখং যত্প্রবক্ষ্যামি ভারত
ন মেঽভ্যসূয়া কর্তব্যা দুঃখাদেতদ্ব্রবীম্যহম্
18.2
শার্দূলৈর্মহিষৈঃ সিংহৈরাগারে যুধ্যসে যদা
কৈকেয্যাঃ প্রেক্ষমাণায়াস্তদা মে কশ্মলো ভবেৎ
18.3
প্রেক্ষাসমুত্থিতা চাপি কৈকেয়ী তাঃ স্ত্রিয়ো বদেৎ
প্রেক্ষ্য মামনবদ্যাঙ্গী কশ্মলোপহতামিব
18.4
স্নেহাত্সংবাসজান্মন্যে সূদমেষা শুচিস্মিতা
যোধ্যমানং মহাবীর্যৈরিমং সমনুশোচতি
18.5
কল্যাণরূপা সৈরন্ধ্রী বল্লবশ্চাতিসুন্দরঃ
স্ত্রীণাং চ চিত্তং দুর্জ্ঞেয়ং যুক্তরূপৌ চ মে মতৌ
18.6
সৈরন্ধ্রী প্রিয়সংবাসান্নিত্যং করুণবেদিনী
অস্মিন্রাজকুলে চেমৌ তুল্যকালনিবাসিনৌ
18.7
ইতি ব্রুবাণা বাক্যানি সা মাং নিত্যমবেদয়ৎ
ক্রুধ্যন্তীং মাং চ সংপ্রেক্ষ্য সমশঙ্কত মাং ত্বয়ি
18.8
তস্যাং তথা ব্রুবত্যাং তু দুঃখং মাং মহদাবিশৎ
শোকে যৌধিষ্ঠিরে মগ্না নাহং জীবিতুমুত্সহে
18.9
যঃ সদেবান্মনুষ্যাংশ্চ সর্পাংশ্চৈকরথোঽজয়ৎ
সোঽয়ং রাজ্ঞো বিরাটস্য কন্যানাং নর্তকো যুবা
18.10
যোঽতর্পয়দমেয়াত্মা খাণ্ডবে জাতবেদসম্
সোঽন্তঃপুরগতঃ পার্থঃ কূপেঽগ্নিরিব সংবৃতঃ
18.11
যস্মাদ্ভয়মমিত্রাণাং সদৈব পুরুষর্ষভাৎ
স লোকপরিভূতেন বেষেণাস্তে ধনংজয়ঃ
18.12
যস্য জ্যাতলনির্ঘোষাত্সমকম্পন্ত শত্রবঃ
স্ত্রিয়ো গীতস্বনং তস্য মুদিতাঃ পর্যুপাসতে
18.13
কিরীটং সূর্যসংকাশং যস্য মূর্ধনি শোভতে
বেণীবিকৃতকেশান্তঃ সোঽয়মদ্য ধনংজয়ঃ
18.14
যস্মিন্নস্ত্রাণি দিব্যানি সমস্তানি মহাত্মনি
আধারঃ সর্ববিদ্যানাং স ধারয়তি কুণ্ডলে
18.15
যং স্ম রাজসহস্রাণি তেজসাপ্রতিমানি বৈ
সমরে নাতিবর্তন্তে বেলামিব মহার্ণবঃ
18.16
সোঽয়ং রাজ্ঞো বিরাটস্য কন্যানাং নর্তকো যুবা
আস্তে বেষপ্রতিচ্ছন্নঃ কন্যানাং পরিচারকঃ
18.17
যস্য স্ম রথঘোষেণ সমকম্পত মেদিনী
সপর্বতবনা ভীম সহস্থাবরজঙ্গমা
18.18
যস্মিঞ্জাতে মহাভাগে কুন্ত্যাঃ শোকো ব্যনশ্যত
স শোচয়তি মামদ্য ভীমসেন তবানুজঃ
18.19
ভূষিতং তমলংকারৈঃ কুণ্ডলৈঃ পরিহাটকৈঃ
কম্বুপাণিনমায়ান্তং দৃষ্ট্বা সীদতি মে মনঃ
18.20
তং বেণীকৃতকেশান্তং ভীমধন্বানমর্জুনম্
কন্যাপরিবৃতং দৃষ্ট্বা ভীম সীদতি মে মনঃ
18.21
যদা হ্যেনং পরিবৃতং কন্যাভির্দেবরূপিণম্
প্রভিন্নমিব মাতঙ্গং পরিকীর্ণং করেণুভিঃ
18.22
মত্স্যমর্থপতিং পার্থং বিরাটং সমুপস্থিতম্
পশ্যামি তূর্যমধ্যস্থং দিশো নশ্যন্তি মে তদা
18.23
নূনমার্যা ন জানাতি কৃচ্ছ্রং প্রাপ্তং ধনংজয়ম্
অজাতশত্রুং কৌরব্যং মগ্নং দুর্দ্যূতদেবিনম্
18.24
তথা দৃষ্ট্বা যবীয়াংসং সহদেবং যুধাং পতিম্
গোষু গোবেষমায়ান্তং পাণ্ডুভূতাস্মি ভারত
18.25
সহদেবস্য বৃত্তানি চিন্তয়ন্তী পুনঃ পুনঃ
ন বিন্দামি মহাবাহো সহদেবস্য দুষ্কৃতম্
যস্মিন্নেবংবিধং দুঃখং প্রাপ্নুয়াত্সত্যবিক্রমঃ
18.26
দূয়ামি ভরতশ্রেষ্ঠ দৃষ্ট্বা তে ভ্রাতরং প্রিয়ম্
গোষু গোবৃষসংকাশং মত্স্যেনাভিনিবেশিতম্
18.27
সংরব্ধং রক্তনেপথ্যং গোপালানাং পুরোগমম্
বিরাটমভিনন্দন্তমথ মে ভবতি জ্বরঃ
18.28
সহদেবং হি মে বীরং নিত্যমার্যা প্রশংসতি
মহাভিজনসংপন্নো বৃত্তবাঞ্শীলবানিতি
18.29
হ্রীনিষেধো মধুরবাগ্ধার্মিকশ্চ প্রিয়শ্চ মে
স তেঽরণ্যেষু বোদ্ধব্যো যাজ্ঞসেনি ক্ষপাস্বপি
18.30
তং দৃষ্ট্বা ব্যাপৃতং গোষু বত্সচর্মক্ষপাশয়ম্
সহদেবং যুধাং শ্রেষ্ঠং কিং নু জীবামি পাণ্ডব
18.31
যস্ত্রিভির্নিত্যসংপন্নো রূপেণাস্ত্রেণ মেধয়া
সোঽশ্ববন্ধো বিরাটস্য পশ্য কালস্য পর্যয়ম্
18.32
অভ্যকীর্যন্ত বৃন্দানি দামগ্রন্থিমুদীক্ষতাম্
বিনয়ন্তং জবেনাশ্বান্মহারাজস্য পশ্যতঃ
18.33
অপশ্যমেনং শ্রীমন্তং মত্স্যং ভ্রাজিষ্ণুমুত্তমম্
বিরাটমুপতিষ্ঠন্তং দর্শয়ন্তং চ বাজিনঃ
18.34
কিং নু মাং মন্যসে পার্থ সুখিতেতি পরংতপ
এবং দুঃখশতাবিষ্টা যুধিষ্ঠিরনিমিত্ততঃ
18.35
অতঃ প্রতিবিশিষ্টানি দুঃখান্যন্যানি ভারত
বর্তন্তে ময়ি কৌন্তেয় বক্ষ্যামি শৃণু তান্যপি
18.36
যুষ্মাসু ধ্রিয়মাণেষু দুঃখানি বিবিধান্যুত
শোষয়ন্তি শরীরং মে কিং নু দুঃখমতঃ পরম্