Utshovঅধ্যায় 17
17.1
দ্রৌপদ্যুবাচ
অশোচ্যং নু কুতস্তস্যা যস্যা ভর্তা যুধিষ্ঠিরঃ
জানন্সর্বাণি দুঃখানি কিং মাং ত্বং পরিপৃচ্ছসি
17.2
যন্মাং দাসীপ্রবাদেন প্রাতিকামী তদানয়ৎ
সভায়াং পার্ষদো মধ্যে তন্মাং দহতি ভারত
17.3
পার্থিবস্য সুতা নাম কা নু জীবেত মাদৃশী
অনুভূয় ভৃশং দুঃখমন্যত্র দ্রৌপদীং প্রভো
17.4
বনবাসগতায়াশ্চ সৈন্ধবেন দুরাত্মনা
পরামর্শং দ্বিতীয়ং চ সোঢুমুত্সহতে নু কা
17.5
মত্স্যরাজ্ঞঃ সমক্ষং চ তস্য ধূর্তস্য পশ্যতঃ
কীচকেন পদা স্পৃষ্টা কা নু জীবেত মাদৃশী
17.6
এবং বহুবিধৈঃ ক্লেশৈঃ ক্লিশ্যমানাং চ ভারত
ন মাং জানাসি কৌন্তেয় কিং ফলং জীবিতেন মে
17.7
যোঽয়ং রাজ্ঞো বিরাটস্য কীচকো নাম ভারত
সেনানীঃ পুরুষব্যাঘ্র স্যালঃ পরমদুর্মতিঃ
17.8
স মাং সৈরন্ধ্রিবেষেণ বসন্তীং রাজবেশ্মনি
নিত্যমেবাহ দুষ্টাত্মা ভার্যা মম ভবেতি বৈ
17.9
তেনোপমন্ত্র্যমাণায়া বধার্হেণ সপত্নহন্
কালেনেব ফলং পক্বং হৃদয়ং মে বিদীর্যতে
17.10
ভ্রাতরং চ বিগর্হস্ব জ্যেষ্ঠং দুর্দ্যূতদেবিনম্
যস্যাস্মি কর্মণা প্রাপ্তা দুঃখমেতদনন্তকম্
17.11
কো হি রাজ্যং পরিত্যজ্য সর্বস্বং চাত্মনা সহ
প্রব্রজ্যায়ৈব দীব্যেত বিনা দুর্দ্যূতদেবিনম্
17.12
যদি নিষ্কসহস্রেণ যচ্চান্যত্সারবদ্ধনম্
সায়ংপ্রাতরদেবিষ্যদপি সংবত্সরান্বহূন্
17.13
রুক্মং হিরণ্যং বাসাংসি যানং যুগ্যমজাবিকম্
অশ্বাশ্বতরসংঘাংশ্চ ন জাতু ক্ষয়মাবহেৎ
17.14
সোঽয়ং দ্যূতপ্রবাদেন শ্রিয়া প্রত্যবরোপিতঃ
তূষ্ণীমাস্তে যথা মূঢঃ স্বানি কর্মাণি চিন্তয়ন্
17.15
দশ নাগসহস্রাণি পদ্মিনাং হেমমালিনাম্
যং যান্তমনুয়ান্তীহ সোঽয়ং দ্যূতেন জীবতি
17.16
তথা শতসহস্রাণি নৃণামমিততেজসাম্
উপাসতে মহারাজমিন্দ্রপ্রস্থে যুধিষ্ঠিরম্
17.17
শতং দাসীসহস্রাণি যস্য নিত্যং মহানসে
পাত্রীহস্তং দিবারাত্রমতিথীন্ভোজয়ন্ত্যুত
17.18
এষ নিষ্কসহস্রাণি প্রদায় দদতাং বরঃ
দ্যূতজেন হ্যনর্থেন মহতা সমুপাবৃতঃ
17.19
এনং হি স্বরসংপন্না বহবঃ সূতমাগধাঃ
সায়ংপ্রাতরুপাতিষ্ঠন্সুমৃষ্টমণিকুণ্ডলাঃ
17.20
সহস্রমৃষয়ো যস্য নিত্যমাসন্সভাসদঃ
তপঃশ্রুতোপসংপন্নাঃ সর্বকামৈরুপস্থিতাঃ
17.21
অন্ধান্বৃদ্ধাংস্তথানাথান্সর্বান্রাষ্ট্রেষু দুর্গতান্
বিভর্ত্যবিমনা নিত্যমানৃশংস্যাদ্যুধিষ্ঠিরঃ
17.22
স এষ নিরয়ং প্রাপ্তো মত্স্যস্য পরিচারকঃ
সভায়াং দেবিতা রাজ্ঞঃ কঙ্কো ব্রূতে যুধিষ্ঠিরঃ
17.23
ইন্দ্রপ্রস্থে নিবসতঃ সময়ে যস্য পার্থিবাঃ
আসন্বলিভৃতঃ সর্বে সোঽদ্যান্যৈর্ভৃতিমিচ্ছতি
17.24
পার্থিবাঃ পৃথিবীপালা যস্যাসন্বশবর্তিনঃ
স বশে বিবশো রাজা পরেষামদ্য বর্ততে
17.25
প্রতাপ্য পৃথিবীং সর্বাং রশ্মিবানিব তেজসা
সোঽয়ং রাজ্ঞো বিরাটস্য সভাস্তারো যুধিষ্ঠিরঃ
17.26
যমুপাসন্ত রাজানঃ সভায়ামৃষিভিঃ সহ
তমুপাসীনমদ্যান্যং পশ্য পাণ্ডব পাণ্ডবম্
17.27
অতদর্হং মহাপ্রাজ্ঞং জীবিতার্থেঽভিসংশ্রিতম্
দৃষ্ট্বা কস্য ন দুঃখং স্যাদ্ধর্মাত্মানং যুধিষ্ঠিরম্
17.28
উপাস্তে স্ম সভায়াং যং কৃত্স্না বীর বসুংধরা
তমুপাসীনমদ্যান্যং পশ্য ভারত ভারতম্
17.29
এবং বহুবিধৈর্দুঃখৈঃ পীড্যমানামনাথবৎ
শোকসাগরমধ্যস্থাং কিং মাং ভীম ন পশ্যসি