অধ্যায় 16

16.1

বৈশংপায়ন উবাচ
সা হতা সূতপুত্রেণ রাজপুত্রী সমজ্বলৎ
বধং কৃষ্ণা পরীপ্সন্তী সেনাবাহস্য ভামিনী
জগামাবাসমেবাথ তদা সা দ্রুপদাত্মজা

কৃত্বা শৌচং যথান্যায়ং কৃষ্ণা বৈ তনুমধ্যমা
গাত্রাণি বাসসী চৈব প্রক্ষাল্য সলিলেন সা

চিন্তয়ামাস রুদতী তস্য দুঃখস্য নির্ণয়ম্
কিং করোমি ক্ব গচ্ছামি কথং কার্যং ভবেন্মম

ইত্যেবং চিন্তয়িত্বা সা ভীমং বৈ মনসাগমৎ
নান্যঃ কর্তা ঋতে ভীমান্মমাদ্য মনসঃ প্রিয়ম্

তত উত্থায় রাত্রৌ সা বিহায় শয়নং স্বকম্
প্রাদ্রবন্নাথমিচ্ছন্তী কৃষ্ণা নাথবতী সতী
দুঃখেন মহতা যুক্তা মানসেন মনস্বিনী

সা বৈ মহানসে প্রাপ্য ভীমসেনং শুচিস্মিতা
সর্বশ্বেতেব মাহেয়ী বনে জাতা ত্রিহায়নী
উপাতিষ্ঠত পাঞ্চালী বাশিতেব মহাগজম্

সা লতেব মহাশালং ফুল্লং গোমতিতীরজম্
বাহুভ্যাং পরিরভ্যৈনং প্রাবোধয়দনিন্দিতা
সিংহং সুপ্তং বনে দুর্গে মৃগরাজবধূরিব

বীণেব মধুরাভাষা গান্ধারং সাধু মূর্চ্ছিতা
অভ্যভাষত পাঞ্চালী ভীমসেনমনিন্দিতা

উত্তিষ্ঠোত্তিষ্ঠ কিং শেষে ভীমসেন যথা মৃতঃ
নামৃতস্য হি পাপীয়ান্ভার্যামালভ্য জীবতি

তস্মিঞ্জীবতি পাপিষ্ঠে সেনাবাহে মম দ্বিষি
তত্কর্ম কৃতবত্যদ্য কথং নিদ্রাং নিষেবসে

স সংপ্রহায় শয়নং রাজপুত্র্যা প্রবোধিতঃ
উপাতিষ্ঠত মেঘাভঃ পর্যঙ্কে সোপসংগ্রহে

অথাব্রবীদ্রাজপুত্রীং কৌরব্যো মহিষীং প্রিয়াম্
কেনাস্যর্থেন সংপ্রাপ্তা ত্বরিতেব মমান্তিকম্

ন তে প্রকৃতিমান্বর্ণঃ কৃশা পাণ্ডুশ্চ লক্ষ্যসে
আচক্ষ্ব পরিশেষেণ সর্বং বিদ্যামহং যথা

সুখং বা যদি বা দুঃখং দ্বেষ্যং বা যদি বা প্রিয়ম্
যথাবত্সর্বমাচক্ষ্ব শ্রুত্বা জ্ঞাস্যামি যত্পরম্

অহমেব হি তে কৃষ্ণে বিশ্বাস্যঃ সর্বকর্মসু
অহমাপত্সু চাপি ত্বাং মোক্ষয়ামি পুনঃ পুনঃ

শীঘ্রমুক্ত্বা যথাকামং যত্তে কার্যং বিবক্ষিতম্
গচ্ছ বৈ শয়নায়ৈব পুরা নান্যোঽববুধ্যতে