Utshovঅধ্যায় 15
15.1
কীচক উবাচ
স্বাগতং তে সুকেশান্তে সুব্যুষ্টা রজনী মম
স্বামিনী ত্বমনুপ্রাপ্তা প্রকুরুষ্ব মম প্রিয়ম্
15.2
সুবর্ণমালাঃ কম্বূশ্চ কুণ্ডলে পরিহাটকে
আহরন্তু চ বস্ত্রাণি কৌশিকান্যজিনানি চ
15.3
অস্তি মে শয়নং শুভ্রং ত্বদর্থমুপকল্পিতম্
এহি তত্র ময়া সার্ধং পিবস্ব মধুমাধবীম্
15.4
দ্রৌপদ্যুবাচ
অপ্রৈষীদ্রাজপুত্রী মাং সুরাহারীং তবান্তিকম্
পানমানয় মে ক্ষিপ্রং পিপাসা মেতি চাব্রবীৎ
15.5
কীচক উবাচ
অন্যা ভদ্রে নয়িষ্যন্তি রাজপুত্র্যাঃ পরিস্রুতম্
15.6
বৈশংপায়ন উবাচ
ইত্যেনাং দক্ষিণে পাণৌ সূতপুত্রঃ পরামৃশৎ
সা গৃহীতা বিধুন্বানা ভূমাবাক্ষিপ্য কীচকম্
সভাং শরণমাধাবদ্যত্র রাজা যুধিষ্ঠিরঃ
15.7
তাং কীচকঃ প্রধাবন্তীং কেশপক্ষে পরামৃশৎ
অথৈনাং পশ্যতো রাজ্ঞঃ পাতয়িত্বা পদাবধীৎ
15.8
ততো যোঽসৌ তদার্কেণ রাক্ষসঃ সংনিয়োজিতঃ
স কীচকমপোবাহ বাতবেগেন ভারত
15.9
স পপাত ততো ভূমৌ রক্ষোবলসমাহতঃ
বিঘূর্ণমানো নিশ্চেষ্টশ্ছিন্নমূল ইব দ্রুমঃ
15.10
তাং চাসীনৌ দদৃশতুর্ভীমসেনয়ুধিষ্ঠিরৌ
অমৃষ্যমাণৌ কৃষ্ণায়াঃ কীচকেন পদা বধম্
15.11
তস্য ভীমো বধপ্রেপ্সুঃ কীচকস্য দুরাত্মনঃ
দন্তৈর্দন্তাংস্তদা রোষান্নিষ্পিপেষ মহামনাঃ
15.12
অথাঙ্গুষ্ঠেনাবমৃদ্নাদঙ্গুষ্ঠং তস্য ধর্মরাট্
প্রবোধনভয়াদ্রাজন্ভীমস্য প্রত্যষেধয়ৎ
15.13
সা সভাদ্বারমাসাদ্য রুদতী মত্স্যমব্রবীৎ
অবেক্ষমাণা সুশ্রোণী পতীংস্তান্দীনচেতসঃ
15.14
আকারমভিরক্ষন্তী প্রতিজ্ঞাং ধর্মসংহিতাম্
দহ্যমানেব রৌদ্রেণ চক্ষুষা দ্রুপদাত্মজা
15.15
দ্রৌপদ্যুবাচ
যেষাং বৈরী ন স্বপিতি পদা ভূমিমুপস্পৃশন্
তেষাং মাং মানিনীং ভার্যাং সূতপুত্রঃ পদাবধীৎ
15.16
যে দদ্যুর্ন চ যাচেয়ুর্ব্রহ্মণ্যাঃ সত্যবাদিনঃ
তেষাং মাং মানিনীং ভার্যাং সূতপুত্রঃ পদাবধীৎ
15.17
যেষাং দুন্দুভিনির্ঘোষো জ্যাঘোষঃ শ্রূয়তেঽনিশম্
তেষাং মাং মানিনীং ভার্যাং সূতপুত্রঃ পদাবধীৎ
15.18
যে তে তেজস্বিনো দান্তা বলবন্তোঽভিমানিনঃ
তেষাং মাং মানিনীং ভার্যাং সূতপুত্রঃ পদাবধীৎ
15.19
সর্বলোকমিমং হন্যুর্ধর্মপাশসিতাস্তু যে
তেষাং মাং মানিনীং ভার্যাং সূতপুত্রঃ পদাবধীৎ
15.20
শরণং যে প্রপন্নানাং ভবন্তি শরণার্থিনাম্
চরন্তি লোকে প্রচ্ছন্নাঃ ক্ব নু তেঽদ্য মহারথাঃ
15.21
কথং তে সূতপুত্রেণ বধ্যমানাং প্রিয়াং সতীম্
মর্ষয়ন্তি যথা ক্লীবা বলবন্তোঽমিতৌজসঃ
15.22
ক্ব নু তেষামমর্ষশ্চ বীর্যং তেজশ্চ বর্ততে
ন পরীপ্সন্তি যে ভার্যাং বধ্যমানাং দুরাত্মনা
15.23
ময়াত্র শক্যং কিং কর্তুং বিরাটে ধর্মদূষণম্
যঃ পশ্যন্মাং মর্ষয়তি বধ্যমানামনাগসম্
15.24
ন রাজন্রাজবত্কিংচিত্সমাচরসি কীচকে
দস্যূনামিব ধর্মস্তে ন হি সংসদি শোভতে
15.25
ন কীচকঃ স্বধর্মস্থো ন চ মত্স্যঃ কথংচন
সভাসদোঽপ্যধর্মজ্ঞা য ইমং পর্যুপাসতে
15.26
নোপালভে ত্বাং নৃপতে বিরাট জনসংসদি
নাহমেতেন যুক্তা বৈ হন্তুং মত্স্য তবান্তিকে
সভাসদস্তু পশ্যন্তু কীচকস্য ব্যতিক্রমম্
15.27
বিরাট উবাচ
পরোক্ষং নাভিজানামি বিগ্রহং যুবয়োরহম্
অর্থতত্ত্বমবিজ্ঞায় কিং নু স্যাত্কুশলং মম
15.28
বৈশংপায়ন উবাচ
ততস্তু সভ্যা বিজ্ঞায় কৃষ্ণাং ভূয়োঽভ্যপূজয়ন্
সাধু সাধ্বিতি চাপ্যাহুঃ কীচকং চ ব্যগর্হয়ন্
15.29
সভ্যা ঊচুঃ
যস্যেয়ং চারুসর্বাঙ্গী ভার্যা স্যাদায়তেক্ষণা
পরো লাভশ্চ তস্য স্যান্ন স শোচেত্কদাচন
15.30
বৈশংপায়ন উবাচ
এবং সংপূজয়ংস্তত্র কৃষ্ণাং প্রেক্ষ্য সভাসদঃ
যুধিষ্ঠিরস্য কোপাত্তু ললাটে স্বেদ আসজৎ
15.31
অথাব্রবীদ্রাজপুত্রীং কৌরব্যো মহিষীং প্রিয়াম্
গচ্ছ সৈরন্ধ্রি মাত্র স্থাঃ সুদেষ্ণায়া নিবেশনম্
15.32
ভর্তারমনুরুধ্যন্ত্যঃ ক্লিশ্যন্তে বীরপত্নয়ঃ
শুশ্রূষয়া ক্লিশ্যমানাঃ পতিলোকং জয়ন্ত্যুত
15.33
মন্যে ন কালং ক্রোধস্য পশ্যন্তি পতয়স্তব
তেন ত্বাং নাভিধাবন্তি গন্ধর্বাঃ সূর্যবর্চসঃ
15.34
অকালজ্ঞাসি সৈরন্ধ্রি শৈলূষীব বিধাবসি
বিঘ্নং করোষি মত্স্যানাং দীব্যতাং রাজসংসদি
গচ্ছ সৈরন্ধ্রি গন্ধর্বাঃ করিষ্যন্তি তব প্রিয়ম্
15.35
দ্রৌপদ্যুবাচ
অতীব তেষাং ঘৃণিনামর্থেঽহং ধর্মচারিণী
তস্য তস্যেহ তে বধ্যা যেষাং জ্যেষ্ঠোঽক্ষদেবিতা
15.36
বৈশংপায়ন উবাচ
ইত্যুক্ত্বা প্রাদ্রবত্কৃষ্ণা সুদেষ্ণায়া নিবেশনম্
কেশান্মুক্ত্বা তু সুশ্রোণী সংরম্ভাল্লোহিতেক্ষণা
15.37
শুশুভে বদনং তস্যা রুদন্ত্যা বিরতং তদা
মেঘলেখাবিনির্মুক্তং দিবীব শশিমণ্ডলম্
15.38
সুদেষ্ণোবাচ
কস্ত্বাবধীদ্বরারোহে কস্মাদ্রোদিষি শোভনে
কস্যাদ্য ন সুখং ভদ্রে কেন তে বিপ্রিয়ং কৃতম্
15.39
দ্রৌপদ্যুবাচ
কীচকো মাবধীত্তত্র সুরাহারীং গতাং তব
সভায়াং পশ্যতো রাজ্ঞো যথৈব বিজনে তথা
15.40
সুদেষ্ণোবাচ
ঘাতয়ামি সুকেশান্তে কীচকং যদি মন্যসে
যোঽসৌ ত্বাং কামসংমত্তো দুর্লভামভিমন্যতে
15.41
দ্রৌপদ্যুবাচ
অন্যে বৈ তং বধিষ্যন্তি যেষামাগঃ করোতি সঃ
মন্যে চাদ্যৈব সুব্যক্তং পরলোকং গমিষ্যতি