অধ্যায় 14

14.1

বৈশংপায়ন উবাচ
প্রত্যাখ্যাতো রাজপুত্র্যা সুদেষ্ণাং কীচকোঽব্রবীৎ
অমর্যাদেন কামেন ঘোরেণাভিপরিপ্লুতঃ

যথা কৈকেয়ি সৈরন্ধ্র্যা সমেয়াং তদ্বিধীয়তাম্
তাং সুদেষ্ণে পরীপ্সস্ব মাহং প্রাণান্প্রহাসিষম্

তস্য তাং বহুশঃ শ্রুত্বা বাচং বিলপতস্তদা
বিরাটমহিষী দেবী কৃপাং চক্রে মনস্বিনী

স্বমর্থমভিসংধায় তস্যার্থমনুচিন্ত্য চ
উদ্বেগং চৈব কৃষ্ণায়াঃ সুদেষ্ণা সূতমব্রবীৎ

পর্বিণীং ত্বং সমুদ্দিশ্য সুরামন্নং চ কারয়
তত্রৈনাং প্রেষয়িষ্যামি সুরাহারীং তবান্তিকম্

তত্র সংপ্রেষিতামেনাং বিজনে নিরবগ্রহাম্
সান্ত্বয়েথা যথাকামং সান্ত্ব্যমানা রমেদ্যদি

কীচকস্তু গৃহং গত্বা ভগিন্যা বচনাত্তদা
সুরামাহারয়ামাস রাজার্হাং সুপরিস্রুতাম্

আজৌরভ্রং চ সুভৃশং বহূংশ্চোচ্চাবচান্মৃগান্
কারয়ামাস কুশলৈরন্নপানং সুশোভনম্

তস্মিন্কৃতে তদা দেবী কীচকেনোপমন্ত্রিতা
সুদেষ্ণা প্রেষয়ামাস সৈরন্ধ্রীং কীচকালয়ম্

সুদেষ্ণোবাচ
উত্তিষ্ঠ গচ্ছ সৈরন্ধ্রি কীচকস্য নিবেশনম্
পানমানয় কল্যাণি পিপাসা মাং প্রবাধতে

দ্রৌপদ্যুবাচ
ন গচ্ছেয়মহং তস্য রাজপুত্রি নিবেশনম্
ত্বমেব রাজ্ঞি জানাসি যথা স নিরপত্রপঃ

ন চাহমনবদ্যাঙ্গি তব বেশ্মনি ভামিনি
কামবৃত্তা ভবিষ্যামি পতীনাং ব্যভিচারিণী

ত্বং চৈব দেবি জানাসি যথা স সময়ঃ কৃতঃ
প্রবিশন্ত্যা ময়া পূর্বং তব বেশ্মনি ভামিনি

কীচকশ্চ সুকেশান্তে মূঢো মদনদর্পিতঃ
সোঽবমংস্যতি মাং দৃষ্ট্বা ন যাস্যে তত্র শোভনে

সন্তি বহ্ব্যস্তব প্রেষ্যা রাজপুত্রি বশানুগাঃ
অন্যাং প্রেষয় ভদ্রং তে স হি মামবমংস্যতে

সুদেষ্ণোবাচ
নৈব ত্বাং জাতু হিংস্যাত্স ইতঃ সংপ্রেষিতাং ময়া

বৈশংপায়ন উবাচ
ইত্যস্যাঃ প্রদদৌ কাংস্যং সপিধানং হিরণ্ময়ম্
সা শঙ্কমানা রুদতী দৈবং শরণমীয়ুষী
প্রাতিষ্ঠত সুরাহারী কীচকস্য নিবেশনম্

দ্রৌপদ্যুবাচ
যথাহমন্যং পাণ্ডুভ্যো নাভিজানামি কংচন
তেন সত্যেন মাং প্রাপ্তাং কীচকো মা বশে কৃথাঃ

বৈশংপায়ন উবাচ
উপাতিষ্ঠত সা সূর্যং মুহূর্তমবলা ততঃ
স তস্যাস্তনুমধ্যায়াঃ সর্বং সূর্যোঽববুদ্ধবান্

অন্তর্হিতং ততস্তস্যা রক্ষো রক্ষার্থমাদিশৎ
তচ্চৈনাং নাজহাত্তত্র সর্বাবস্থাস্বনিন্দিতাম্

তাং মৃগীমিব বিত্রস্তাং দৃষ্ট্বা কৃষ্ণাং সমীপগাম্
উদতিষ্ঠন্মুদা সূতো নাবং লব্ধ্বেব পারগঃ