অধ্যায় 13

13.1

বৈশংপায়ন উবাচ
বসমানেষু পার্থেষু মত্স্যস্য নগরে তদা
মহারথেষু ছন্নেষু মাসা দশ সমত্যয়ুঃ

যাজ্ঞসেনী সুদেষ্ণাং তু শুশ্রূষন্তী বিশাং পতে
অবসত্পরিচারার্হা সুদুঃখং জনমেজয়

তথা চরন্তীং পাঞ্চালীং সুদেষ্ণায়া নিবেশনে
সেনাপতির্বিরাটস্য দদর্শ জলজাননাম্

তাং দৃষ্ট্বা দেবগর্ভাভাং চরন্তীং দেবতামিব
কীচকঃ কাময়ামাস কামবাণপ্রপীডিতঃ

স তু কামাগ্নিসংতপ্তঃ সুদেষ্ণামভিগম্য বৈ
প্রহসন্নিব সেনানীরিদং বচনমব্রবীৎ

নেয়ং পুরা জাতু ময়েহ দৃষ্টা; রাজ্ঞো বিরাটস্য নিবেশনে শুভা
রূপেণ চোন্মাদয়তীব মাং ভৃশং; গন্ধেন জাতা মদিরেব ভামিনী

কা দেবরূপা হৃদয়ংগমা শুভে; আচক্ষ্ব মে কা চ কুতশ্চ শোভনা
চিত্তং হি নির্মথ্য করোতি মাং বশে; ন চান্যদত্রৌষধমদ্য মে মতম্

অহো তবেয়ং পরিচারিকা শুভা; প্রত্যগ্ররূপা প্রতিভাতি মামিয়ম্
অয়ুক্তরূপং হি করোতি কর্ম তে; প্রশাস্তু মাং যচ্চ মমাস্তি কিংচন

প্রভূতনাগাশ্বরথং মহাধনং; সমৃদ্ধিয়ুক্তং বহুপানভোজনম্
মনোহরং কাঞ্চনচিত্রভূষণং; গৃহং মহচ্ছোভয়তামিয়ং মম

ততঃ সুদেষ্ণামনুমন্ত্র্য কীচক;স্ততঃ সমভ্যেত্য নরাধিপাত্মজাম্
উবাচ কৃষ্ণামভিসান্ত্বয়ংস্তদা; মৃগেন্দ্রকন্যামিব জম্বুকো বনে

ইদং চ রূপং প্রথমং চ তে বয়ো; নিরর্থকং কেবলমদ্য ভামিনি
অধার্যমাণা স্রগিবোত্তমা যথা; ন শোভসে সুন্দরি শোভনা সতী

ত্যজামি দারান্মম যে পুরাতনা; ভবন্তু দাস্যস্তব চারুহাসিনি
অহং চ তে সুন্দরি দাসবত্স্থিতঃ; সদা ভবিষ্যে বশগো বরাননে

দ্রৌপদ্যুবাচ
অপ্রার্থনীয়ামিহ মাং সূতপুত্রাভিমন্যসে
বিহীনবর্ণাং সৈরন্ধ্রীং বীভত্সাং কেশকারিকাম্

পরদারাস্মি ভদ্রং তে ন যুক্তং ত্বয়ি সাংপ্রতম্
দয়িতাঃ প্রাণিনাং দারা ধর্মং সমনুচিন্তয়

পরদারে ন তে বুদ্ধির্জাতু কার্যা কথংচন
বিবর্জনং হ্যকার্যাণামেতত্সত্পুরুষব্রতম্

মিথ্যাভিগৃধ্নো হি নরঃ পাপাত্মা মোহমাস্থিতঃ
অয়শঃ প্রাপ্নুয়াদ্ঘোরং সুমহত্প্রাপ্নুয়াদ্ভয়ম্

মা সূতপুত্র হৃষ্যস্ব মাদ্য ত্যক্ষ্যসি জীবিতম্
দুর্লভামভিমন্বানো মাং বীরৈরভিরক্ষিতাম্

ন চাপ্যহং ত্বয়া শক্যা গন্ধর্বাঃ পতয়ো মম
তে ত্বাং নিহন্যুঃ কুপিতাঃ সাধ্বলং মা ব্যনীনশঃ

অশক্যরূপৈঃ পুরুষৈরধ্বানং গন্তুমিচ্ছসি
যথা নিশ্চেতনো বালঃ কূলস্থঃ কূলমুত্তরম্
তর্তুমিচ্ছতি মন্দাত্মা তথা ত্বং কর্তুমিচ্ছসি

অন্তর্মহীং বা যদি বোর্ধ্বমুত্পতেঃ; সমুদ্রপারং যদি বা প্রধাবসি
তথাপি তেষাং ন বিমোক্ষমর্হসি; প্রমাথিনো দেবসুতা হি মে বরাঃ

ত্বং কালরাত্রীমিব কশ্চিদাতুরঃ; কিং মাং দৃঢং প্রার্থয়সেঽদ্য কীচক
কিং মাতুরঙ্কে শয়িতো যথা শিশু;শ্চন্দ্রং জিঘৃক্ষুরিব মন্যসে হি মাম্