Utshovঅধ্যায় 12
12.1
জনমেজয় উবাচ
এবং মত্স্যস্য নগরে বসন্তস্তত্র পাণ্ডবাঃ
অত ঊর্ধ্বং মহাবীর্যাঃ কিমকুর্বন্ত বৈ দ্বিজ
12.2
বৈশংপায়ন উবাচ
এবং তে ন্যবসংস্তত্র প্রচ্ছন্নাঃ কুরুনন্দনাঃ
আরাধয়ন্তো রাজানং যদকুর্বন্ত তচ্ছৃণু
12.3
যুধিষ্ঠিরঃ সভাস্তারঃ সভ্যানামভবত্প্রিয়ঃ
তথৈব চ বিরাটস্য সপুত্রস্য বিশাং পতে
12.4
স হ্যক্ষহৃদয়জ্ঞস্তান্ক্রীডয়ামাস পাণ্ডবঃ
অক্ষবত্যাং যথাকামং সূত্রবদ্ধানিব দ্বিজান্
12.5
অজ্ঞাতং চ বিরাটস্য বিজিত্য বসু ধর্মরাট্
ভ্রাতৃভ্যঃ পুরুষব্যাঘ্রো যথার্হং স্ম প্রয়চ্ছতি
12.6
ভীমসেনোঽপি মাংসানি ভক্ষ্যাণি বিবিধানি চ
অতিসৃষ্টানি মত্স্যেন বিক্রীণাতি যুধিষ্ঠিরে
12.7
বাসাংসি পরিজীর্ণানি লব্ধান্যন্তঃপুরেঽর্জুনঃ
বিক্রীণানশ্চ সর্বেভ্যঃ পাণ্ডবেভ্যঃ প্রয়চ্ছতি
12.8
সহদেবোঽপি গোপানাং বেষমাস্থায় পাণ্ডবঃ
দধি ক্ষীরং ঘৃতং চৈব পাণ্ডবেভ্যঃ প্রয়চ্ছতি
12.9
নকুলোঽপি ধনং লব্ধ্বা কৃতে কর্মণি বাজিনাম্
তুষ্টে তস্মিন্নরপতৌ পাণ্ডবেভ্যঃ প্রয়চ্ছতি
12.10
কৃষ্ণাপি সর্বান্ভ্রাতৄংস্তান্নিরীক্ষন্তী তপস্বিনী
যথা পুনরবিজ্ঞাতা তথা চরতি ভামিনী
12.11
এবং সংপাদয়ন্তস্তে তথান্যোন্যং মহারথাঃ
প্রেক্ষমাণাস্তদা কৃষ্ণামূষুশ্ছন্না নরাধিপ
12.12
অথ মাসে চতুর্থে তু ব্রহ্মণঃ সুমহোত্সবঃ
আসীত্সমৃদ্ধো মত্স্যেষু পুরুষাণাং সুসংমতঃ
12.13
তত্র মল্লাঃ সমাপেতুর্দিগ্ভ্যো রাজন্সহস্রশঃ
মহাকায়া মহাবীর্যাঃ কালখঞ্জা ইবাসুরাঃ
12.14
বীর্যোন্নদ্ধা বলোদগ্রা রাজ্ঞা সমভিপূজিতাঃ
সিংহস্কন্ধকটিগ্রীবাঃ স্ববদাতা মনস্বিনঃ
অসকৃল্লব্ধলক্ষাস্তে রঙ্গে পার্থিবসংনিধৌ
12.15
তেষামেকো মহানাসীত্সর্বমল্লান্সমাহ্বয়ৎ
আবল্গমানং তং রঙ্গে নোপতিষ্ঠতি কশ্চন
12.16
যদা সর্বে বিমনসস্তে মল্লা হতচেতসঃ
অথ সূদেন তং মল্লং যোধয়ামাস মত্স্যরাট্
12.17
চোদ্যমানস্ততো ভীমো দুঃখেনৈবাকরোন্মতিম্
ন হি শক্নোতি বিবৃতে প্রত্যাখ্যাতুং নরাধিপম্
12.18
ততঃ স পুরুষব্যাঘ্রঃ শার্দূলশিথিলং চরন্
প্রবিবেশ মহারঙ্গং বিরাটমভিহর্ষয়ন্
12.19
ববন্ধ কক্ষ্যাং কৌন্তেয়স্ততস্তং হর্ষয়ঞ্জনম্
ততস্তং বৃত্রসংকাশং ভীমো মল্লং সমাহ্বয়ৎ
12.20
তাবুভৌ সুমহোত্সাহাবুভৌ তীব্রপরাক্রমৌ
মত্তাবিব মহাকায়ৌ বারণৌ ষষ্টিহায়নৌ
12.21
চকর্ষ দোর্ভ্যামুত্পাট্য ভীমো মল্লমমিত্রহা
বিনদন্তমভিক্রোশঞ্শার্দূল ইব বারণম্
12.22
তমুদ্যম্য মহাবাহুর্ভ্রাময়ামাস বীর্যবান্
ততো মল্লাশ্চ মত্স্যাশ্চ বিস্ময়ং চক্রিরে পরম্
12.23
ভ্রাময়িত্বা শতগুণং গতসত্ত্বমচেতনম্
প্রত্যপিংষন্মহাবাহুর্মল্লং ভুবি বৃকোদরঃ
12.24
তস্মিন্বিনিহতে মল্লে জীমূতে লোকবিশ্রুতে
বিরাটঃ পরমং হর্ষমগচ্ছদ্বান্ধবৈঃ সহ
12.25
সংহর্ষাত্প্রদদৌ বিত্তং বহু রাজা মহামনাঃ
বল্লবায় মহারঙ্গে যথা বৈশ্রবণস্তথা
12.26
এবং স সুবহূন্মল্লান্পুরুষাংশ্চ মহাবলান্
বিনিঘ্নন্মত্স্যরাজস্য প্রীতিমাবহদুত্তমাম্
12.27
যদাস্য তুল্যঃ পুরুষো ন কশ্চিত্তত্র বিদ্যতে
ততো ব্যাঘ্রৈশ্চ সিংহৈশ্চ দ্বিরদৈশ্চাপ্যয়োধয়ৎ
12.28
পুনরন্তঃপুরগতঃ স্ত্রীণাং মধ্যে বৃকোদরঃ
যোধ্যতে স্ম বিরাটেন সিংহৈর্মত্তৈর্মহাবলৈঃ
12.29
বীভত্সুরপি গীতেন সুনৃত্তেন চ পাণ্ডবঃ
বিরাটং তোষয়ামাস সর্বাশ্চান্তঃপুরস্ত্রিয়ঃ
12.30
অশ্বৈর্বিনীতৈর্জবনৈস্তত্র তত্র সমাগতৈঃ
তোষয়ামাস নকুলো রাজানং রাজসত্তম
12.31
তস্মৈ প্রদেয়ং প্রায়চ্ছত্প্রীতো রাজা ধনং বহু
বিনীতান্বৃষভান্দৃষ্ট্বা সহদেবস্য চাভিভো
12.32
এবং তে ন্যবসংস্তত্র প্রচ্ছন্নাঃ পুরুষর্ষভাঃ
কর্মাণি তস্য কুর্বাণা বিরাটনৃপতেস্তদা