Utshovঅধ্যায় 11
11.1
বৈশংপায়ন উবাচ
অথাপরোঽদৃশ্যত পাণ্ডবঃ প্রভু;র্বিরাটরাজ্ঞস্তুরগান্সমীক্ষতঃ
তমাপতন্তং দদৃশে পৃথগ্জনো; বিমুক্তমভ্রাদিব সূর্যমণ্ডলম্
11.2
স বৈ হয়ানৈক্ষত তাংস্ততস্ততঃ; সমীক্ষমাণং চ দদর্শ মত্স্যরাট্
ততোঽব্রবীত্তাননুগানমিত্রহা; কুতোঽয়মায়াতি নরোঽমরপ্রভঃ
11.3
অয়ং হয়ান্বীক্ষতি মামকান্দৃঢং; ধ্রুবং হয়জ্ঞো ভবিতা বিচক্ষণঃ
প্রবেশ্যতামেষ সমীপমাশু মে; বিভাতি বীরো হি যথামরস্তথা
11.4
অভ্যেত্য রাজানমমিত্রহাব্রবী;জ্জয়োঽস্তু তে পার্থিব ভদ্রমস্তু চ
হয়েষু যুক্তো নৃপ সংমতঃ সদা; তবাশ্বসূতো নিপুণো ভবাম্যহম্
11.5
বিরাট উবাচ
দদামি যানানি ধনং নিবেশনং; মমাশ্বসূতো ভবিতুং ত্বমর্হসি
কুতোঽসি কস্যাসি কথং ত্বমাগতঃ; প্রব্রূহি শিল্পং তব বিদ্যতে চ যৎ
11.6
নকুল উবাচ
পঞ্চানাং পাণ্ডুপুত্রাণাং জ্যেষ্ঠো রাজা যুধিষ্ঠিরঃ
তেনাহমশ্বেষু পুরা প্রকৃতঃ শত্রুকর্শন
11.7
অশ্বানাং প্রকৃতিং বেদ্মি বিনয়ং চাপি সর্বশঃ
দুষ্টানাং প্রতিপত্তিং চ কৃত্স্নং চৈব চিকিত্সিতম্
11.8
ন কাতরং স্যান্মম জাতু বাহনং; ন মেঽস্তি দুষ্টা বডবা কুতো হয়াঃ
জনস্তু মামাহ স চাপি পাণ্ডবো; যুধিষ্ঠিরো গ্রন্থিকমেব নামতঃ
11.9
বিরাট উবাচ
যদস্তি কিংচিন্মম বাজিবাহনং; তদস্তু সর্বং ত্বদধীনমদ্য বৈ
যে চাপি কেচিন্মম বাজিয়োজকা;স্ত্বদাশ্রয়াঃ সারথয়শ্চ সন্তু মে
11.10
ইদং তবেষ্টং যদি বৈ সুরোপম; ব্রবীহি যত্তে প্রসমীক্ষিতং বসু
ন তেঽনুরূপং হয়কর্ম বিদ্যতে; প্রভাসি রাজেব হি সংমতো মম
11.11
যুধিষ্ঠিরস্যেব হি দর্শনেন মে; সমং তবেদং প্রিয়দর্শ দর্শনম্
কথং তু ভৃত্যৈঃ স বিনাকৃতো বনে; বসত্যনিন্দ্যো রমতে চ পাণ্ডবঃ
11.12
বৈশংপায়ন উবাচ
তথা স গন্ধর্ববরোপমো যুবা; বিরাটরাজ্ঞা মুদিতেন পূজিতঃ
ন চৈনমন্যেঽপি বিদুঃ কথংচন; প্রিয়াভিরামং বিচরন্তমন্তরা
11.13
এবং হি মত্স্যে ন্যবসন্ত পাণ্ডবা; যথাপ্রতিজ্ঞাভিরমোঘদর্শনাঃ
অজ্ঞাতচর্যাং ব্যচরন্সমাহিতাঃ; সমুদ্রনেমীপতয়োঽতিদুঃখিতাঃ