অধ্যায় 10

10.1

বৈশংপায়ন উবাচ
অথাপরোঽদৃশ্যত রূপসংপদা; স্ত্রীণামলংকারধরো বৃহত্পুমান্
প্রাকারবপ্রে প্রতিমুচ্য কুণ্ডলে; দীর্ঘে চ কম্বূ পরিহাটকে শুভে

বহূংশ্চ দীর্ঘাংশ্চ বিকীর্য মূর্ধজা;ন্মহাভুজো বারণমত্তবিক্রমঃ
গতেন ভূমিমভিকম্পয়ংস্তদা; বিরাটমাসাদ্য সভাসমীপতঃ

তং প্রেক্ষ্য রাজোপগতং সভাতলে; সত্রপ্রতিচ্ছন্নমরিপ্রমাথিনম্
বিরাজমানং পরমেণ বর্চসা; সুতং মহেন্দ্রস্য গজেন্দ্রবিক্রমম্

সর্বানপৃচ্ছচ্চ সমীপচারিণঃ; কুতোঽয়মায়াতি ন মে পুরা শ্রুতঃ
ন চৈনমূচুর্বিদিতং তদা নরাঃ; সবিস্মিতং বাক্যমিদং নৃপোঽব্রবীৎ

সর্বোপপন্নঃ পুরুষো মনোরমঃ; শ্যামো যুবা বারণয়ূথপোপমঃ
বিমুচ্য কম্বূ পরিহাটকে শুভে; বিমুচ্য বেণীমপিনহ্য কুণ্ডলে

শিখী সুকেশঃ পরিধায় চান্যথা; ভবস্ব ধন্বী কবচী শরী তথা
আরুহ্য যানং পরিধাবতাং ভবা;ন্সুতৈঃ সমো মে ভব বা ময়া সমঃ

বৃদ্ধো হ্যহং বৈ পরিহারকামঃ; সর্বান্মত্স্যাংস্তরসা পালয়স্ব
নৈবংবিধাঃ ক্লীবরূপা ভবন্তি; কথংচনেতি প্রতিভাতি মে মনঃ

অর্জুন উবাচ
গায়ামি নৃত্যাম্যথ বাদয়ামি; ভদ্রোঽস্মি নৃত্তে কুশলোঽস্মি গীতে
ত্বমুত্তরায়াঃ পরিদত্স্ব মাং স্বয়ং; ভবামি দেব্যা নরদেব নর্তকঃ

ইদং তু রূপং মম যেন কিং নু ত;ত্প্রকীর্তয়িত্বা ভৃশশোকবর্ধনম্
বৃহন্নডাং বৈ নরদেব বিদ্ধি মাং; সুতং সুতাং বা পিতৃমাতৃবর্জিতাম্

বিরাট উবাচ
দদামি তে হন্ত বরং বৃহন্নডে; সুতাং চ মে নর্তয় যাশ্চ তাদৃশীঃ
ইদং তু তে কর্ম সমং ন মে মতং; সমুদ্রনেমিং পৃথিবীং ত্বমর্হসি

বৈশংপায়ন উবাচ
বৃহন্নডাং তামভিবীক্ষ্য মত্স্যরা;ট্কলাসু নৃত্তে চ তথৈব বাদিতে
অপুংস্ত্বমপ্যস্য নিশম্য চ স্থিরং; ততঃ কুমারীপুরমুত্সসর্জ তম্

স শিক্ষয়ামাস চ গীতবাদিতং; সুতাং বিরাটস্য ধনংজয়ঃ প্রভুঃ
সখীশ্চ তস্যাঃ পরিচারিকাস্তথা; প্রিয়শ্চ তাসাং স বভূব পাণ্ডবঃ

তথা স সত্রেণ ধনংজয়োঽবস;ত্প্রিয়াণি কুর্বন্সহ তাভিরাত্মবান্
তথাগতং তত্র ন জজ্ঞিরে জনা; বহিশ্চরা বাপ্যথ বান্তরেচরাঃ