অধ্যায় 9

9.1

বৈশংপায়ন উবাচ
সহদেবোঽপি গোপানাং কৃত্বা বেষমনুত্তমম্
ভাষাং চৈষাং সমাস্থায় বিরাটমুপয়াদথ

তমায়ান্তমভিপ্রেক্ষ্য ভ্রাজমানং নরর্ষভম্
সমুপস্থায় বৈ রাজা পপ্রচ্ছ কুরুনন্দনম্

কস্য বা ত্বং কুতো বা ত্বং কিং বা তাত চিকীর্ষসি
ন হি মে দৃষ্টপূর্বস্ত্বং তত্ত্বং ব্রূহি নরর্ষভ

স প্রাপ্য রাজানমমিত্রতাপন;স্ততোঽব্রবীন্মেঘমহৌঘনিঃস্বনঃ
বৈশ্যোঽস্মি নাম্নাহমরিষ্টনেমি;র্গোসংখ্য আসং কুরুপুংগবানাম্

বস্তুং ত্বয়ীচ্ছামি বিশাং বরিষ্ঠ; তান্রাজসিংহান্ন হি বেদ্মি পার্থান্
ন শক্যতে জীবিতুমন্যকর্মণা; ন চ ত্বদন্যো মম রোচতে নৃপঃ

বিরাট উবাচ
ত্বং ব্রাহ্মণো যদি বা ক্ষত্রিয়োঽসি; সমুদ্রনেমীশ্বররূপবানসি
আচক্ষ্ব মে তত্ত্বমমিত্রকর্শন; ন বৈশ্যকর্ম ত্বয়ি বিদ্যতে সমম্

কস্যাসি রাজ্ঞো বিষয়াদিহাগতঃ; কিং চাপি শিল্পং তব বিদ্যতে কৃতম্
কথং ত্বমস্মাসু নিবত্স্যসে সদা; বদস্ব কিং চাপি তবেহ বেতনম্

সহদেব উবাচ
পঞ্চানাং পাণ্ডুপুত্রাণাং জ্যেষ্ঠো রাজা যুধিষ্ঠিরঃ
তস্যাষ্টশতসাহস্রা গবাং বর্গাঃ শতং শতাঃ

অপরে দশসাহস্রা দ্বিস্তাবন্তস্তথাপরে
তেষাং গোসংখ্য আসং বৈ তন্তিপালেতি মাং বিদুঃ

ভূতং ভব্যং ভবিষ্যচ্চ যচ্চ সংখ্যাগতং ক্বচিৎ
ন মেঽস্ত্যবিদিতং কিংচিত্সমন্তাদ্দশয়োজনম্

গুণাঃ সুবিদিতা হ্যাসন্মম তস্য মহাত্মনঃ
আসীচ্চ স ময়া তুষ্টঃ কুরুরাজো যুধিষ্ঠিরঃ

ক্ষিপ্রং হি গাবো বহুলা ভবন্তি; ন তাসু রোগো ভবতীহ কশ্চিৎ
তৈস্তৈরুপায়ৈর্বিদিতং ময়ৈত;দেতানি শিল্পানি ময়ি স্থিতানি

বৃষভাংশ্চাপি জানামি রাজন্পূজিতলক্ষণান্
যেষাং মূত্রমুপাঘ্রায় অপি বন্ধ্যা প্রসূয়তে

বিরাট উবাচ
শতং সহস্রাণি সমাহিতানি; বর্ণস্য বর্ণস্য বিনিশ্চিতা গুণৈঃ
পশূন্সপালান্ভবতে দদাম্যহং; ত্বদাশ্রয়া মে পশবো ভবন্ত্বিহ

বৈশংপায়ন উবাচ
তথা স রাজ্ঞোঽবিদিতো বিশাং পতে; উবাস তত্রৈব সুখং নরেশ্বরঃ
ন চৈনমন্যেঽপি বিদুঃ কথংচন; প্রাদাচ্চ তস্মৈ ভরণং যথেপ্সিতম্