Utshovঅধ্যায় 8
8.1
বৈশংপায়ন উবাচ
ততঃ কেশান্সমুত্ক্ষিপ্য বেল্লিতাগ্রাননিন্দিতান্
জুগূহ দক্ষিণে পার্শ্বে মৃদূনসিতলোচনা
8.2
বাসশ্চ পরিধায়ৈকং কৃষ্ণং সুমলিনং মহৎ
কৃত্বা বেষং চ সৈরন্ধ্র্যাঃ কৃষ্ণা ব্যচরদার্তবৎ
8.3
তাং নরাঃ পরিধাবন্তীং স্ত্রিয়শ্চ সমুপাদ্রবন্
অপৃচ্ছংশ্চৈব তাং দৃষ্ট্বা কা ত্বং কিং চ চিকীর্ষসি
8.4
সা তানুবাচ রাজেন্দ্র সৈরন্ধ্র্যহমুপাগতা
কর্ম চেচ্ছামি বৈ কর্তুং তস্য যো মাং পুপুক্ষতি
8.5
তস্যা রূপেণ বেষেণ শ্লক্ষ্ণয়া চ তথা গিরা
নাশ্রদ্দধত তাং দাসীমন্নহেতোরুপস্থিতাম্
8.6
বিরাটস্য তু কৈকেয়ী ভার্যা পরমসংমতা
অবলোকয়ন্তী দদৃশে প্রাসাদাদ্দ্রুপদাত্মজাম্
8.7
সা সমীক্ষ্য তথারূপামনাথামেকবাসসম্
সমাহূয়াব্রবীদ্ভদ্রে কা ত্বং কিং চ চিকীর্ষসি
8.8
সা তামুবাচ রাজেন্দ্র সৈরন্ধ্র্যহমুপাগতা
কর্ম চেচ্ছাম্যহং কর্তুং তস্য যো মাং পুপুক্ষতি
8.9
সুদেষ্ণোবাচ
নৈবংরূপা ভবন্ত্যেবং যথা বদসি ভামিনি
প্রেষয়ন্তি চ বৈ দাসীর্দাসাংশ্চৈবংবিধান্বহূন্
8.10
গূঢগুল্ফা সংহতোরুস্ত্রিগম্ভীরা ষডুন্নতা
রক্তা পঞ্চসু রক্তেষু হংসগদ্গদভাষিণী
8.11
সুকেশী সুস্তনী শ্যামা পীনশ্রোণিপয়োধরা
তেন তেনৈব সংপন্না কাশ্মীরীব তুরংগমা
8.12
স্বরালপক্ষ্মনয়না বিম্বোষ্ঠী তনুমধ্যমা
কম্বুগ্রীবা গূঢসিরা পূর্ণচন্দ্রনিভাননা
8.13
কা ত্বং ব্রূহি যথা ভদ্রে নাসি দাসী কথংচন
যক্ষী বা যদি বা দেবী গন্ধর্বী যদি বাপ্সরাঃ
8.14
অলম্বুসা মিশ্রকেশী পুণ্ডরীকাথ মালিনী
ইন্দ্রাণী বারুণী বা ত্বং ত্বষ্টুর্ধাতুঃ প্রজাপতেঃ
দেব্যো দেবেষু বিখ্যাতাস্তাসাং ত্বং কতমা শুভে
8.15
দ্রৌপদ্যুবাচ
নাস্মি দেবী ন গন্ধর্বী নাসুরী ন চ রাক্ষসী
সৈরন্ধ্রী তু ভুজিষ্যাস্মি সত্যমেতদ্ব্রবীমি তে
8.16
কেশাঞ্জানাম্যহং কর্তুং পিংষে সাধু বিলেপনম্
গ্রথয়িষ্যে বিচিত্রাশ্চ স্রজঃ পরমশোভনাঃ
8.17
আরাধয়ং সত্যভামাং কৃষ্ণস্য মহিষীং প্রিয়াম্
কৃষ্ণাং চ ভার্যাং পাণ্ডূনাং কুরূণামেকসুন্দরীম্
8.18
তত্র তত্র চরাম্যেবং লভমানা সুশোভনম্
বাসাংসি যাবচ্চ লভে তাবত্তাবদ্রমে তথা
8.19
মালিনীত্যেব মে নাম স্বয়ং দেবী চকার সা
সাহমভ্যাগতা দেবি সুদেষ্ণে ত্বন্নিবেশনম্
8.20
সুদেষ্ণোবাচ
মূর্ধ্নি ত্বাং বাসয়েয়ং বৈ সংশয়ো মে ন বিদ্যতে
নো চেদিহ তু রাজা ত্বাং গচ্ছেত্সর্বেণ চেতসা
8.21
স্ত্রিয়ো রাজকুলে পশ্য যাশ্চেমা মম বেশ্মনি
প্রসক্তাস্ত্বাং নিরীক্ষন্তে পুমাংসং কং ন মোহয়েঃ
8.22
বৃক্ষাংশ্চাবস্থিতান্পশ্য য ইমে মম বেশ্মনি
তেঽপি ত্বাং সংনমন্তীব পুমাংসং কং ন মোহয়েঃ
8.23
রাজা বিরাটঃ সুশ্রোণি দৃষ্ট্বা বপুরমানুষম্
বিহায় মাং বরারোহে ত্বাং গচ্ছেত্সর্বচেতসা
8.24
যং হি ত্বমনবদ্যাঙ্গি নরমায়তলোচনে
প্রসক্তমভিবীক্ষেথাঃ স কামবশগো ভবেৎ
8.25
যশ্চ ত্বাং সততং পশ্যেত্পুরুষশ্চারুহাসিনি
এবং সর্বানবদ্যাঙ্গি স চানঙ্গবশো ভবেৎ
8.26
যথা কর্কটকী গর্ভমাধত্তে মৃত্যুমাত্মনঃ
তথাবিধমহং মন্যে বাসং তব শুচিস্মিতে
8.27
দ্রৌপদ্যুবাচ
নাস্মি লভ্যা বিরাটেন ন চান্যেন কথংচন
গন্ধর্বাঃ পতয়ো মহ্যং যুবানঃ পঞ্চ ভামিনি
8.28
পুত্রা গন্ধর্বরাজস্য মহাসত্ত্বস্য কস্যচিৎ
রক্ষন্তি তে চ মাং নিত্যং দুঃখাচারা তথা ন্বহম্
8.29
যো মে ন দদ্যাদুচ্ছিষ্টং ন চ পাদৌ প্রধাবয়েৎ
প্রীয়েয়ুস্তেন বাসেন গন্ধর্বাঃ পতয়ো মম
8.30
যো হি মাং পুরুষো গৃধ্যেদ্যথান্যাঃ প্রাকৃতস্ত্রিয়ঃ
তামেব স ততো রাত্রিং প্রবিশেদপরাং তনুম্
8.31
ন চাপ্যহং চালয়িতুং শক্যা কেনচিদঙ্গনে
দুঃখশীলা হি গন্ধর্বাস্তে চ মে বলবত্তরাঃ
8.32
সুদেষ্ণোবাচ
এবং ত্বাং বাসয়িষ্যামি যথা ত্বং নন্দিনীচ্ছসি
ন চ পাদৌ ন চোচ্ছিষ্টং স্প্রক্ষ্যসি ত্বং কথংচন
8.33
বৈশংপায়ন উবাচ
এবং কৃষ্ণা বিরাটস্য ভার্যয়া পরিসান্ত্বিতা
ন চৈনাং বেদ তত্রান্যস্তত্ত্বেন জনমেজয়