অধ্যায় 7

7.1

বৈশংপায়ন উবাচ
অথাপরো ভীমবলঃ শ্রিয়া জ্বল;ন্নুপায়য়ৌ সিংহবিলাসবিক্রমঃ
খজং চ দর্বীং চ করেণ ধারয়;ন্নসিং চ কালাঙ্গমকোশমব্রণম্

স সূদরূপঃ পরমেণ বর্চসা; রবির্যথা লোকমিমং প্রভাসয়ন্
সুকৃষ্ণবাসা গিরিরাজসারবা;ন্স মত্স্যরাজং সমুপেত্য তস্থিবান্

তং প্রেক্ষ্য রাজা বরয়ন্নুপাগতং; ততোঽব্রবীজ্জানপদান্সমাগতান্
সিংহোন্নতাংসোঽয়মতীব রূপবা;ন্প্রদৃশ্যতে কো নু নরর্ষভো যুবা

অদৃষ্টপূর্বঃ পুরুষো রবির্যথা; বিতর্কয়ন্নাস্য লভামি সংপদম্
তথাস্য চিত্তং হ্যপি সংবিতর্কয়;ন্নরর্ষভস্যাদ্য ন যামি তত্ত্বতঃ

ততো বিরাটং সমুপেত্য পাণ্ডবঃ; সুদীনরূপো বচনং মহামনাঃ
উবাচ সূদোঽস্মি নরেন্দ্র বল্লবো; ভজস্ব মাং ব্যঞ্জনকারমুত্তমম্

বিরাট উবাচ
ন সূদতাং মানদ শ্রদ্দধামি তে; সহস্রনেত্রপ্রতিমো হি দৃশ্যসে
শ্রিয়া চ রূপেণ চ বিক্রমেণ চ; প্রভাসি তাতানবরো নরেষ্বিহ

ভীম উবাচ
নরেন্দ্র সূদঃ পরিচারকোঽস্মি তে; জানামি সূপান্প্রথমেন কেবলান্
আস্বাদিতা যে নৃপতে পুরাভব;ন্যুধিষ্ঠিরেণাপি নৃপেণ সর্বশঃ

বলেন তুল্যশ্চ ন বিদ্যতে ময়া; নিয়ুদ্ধশীলশ্চ সদৈব পার্থিব
গজৈশ্চ সিংহৈশ্চ সমেয়িবানহং; সদা করিষ্যামি তবানঘ প্রিয়ম্

বিরাট উবাচ
দদামি তে হন্ত বরং মহানসে; তথা চ কুর্যাঃ কুশলং হি ভাষসে
ন চৈব মন্যে তব কর্ম তত্সমং; সমুদ্রনেমিং পৃথিবীং ত্বমর্হসি

যথা হি কামস্তব তত্তথা কৃতং; মহানসে ত্বং ভব মে পুরস্কৃতঃ
নরাশ্চ যে তত্র মমোচিতাঃ পুরা; ভবস্ব তেষামধিপো ময়া কৃতঃ

বৈশংপায়ন উবাচ
তথা স ভীমো বিহিতো মহানসে; বিরাটরাজ্ঞো দয়িতোঽভবদ্দৃঢম্
উবাস রাজন্ন চ তং পৃথগ্জনো; বুবোধ তত্রানুচরশ্চ কশ্চন