Utshovঅধ্যায় 6
6.1
বৈশংপায়ন উবাচ
ততো বিরাটং প্রথমং যুধিষ্ঠিরো; রাজা সভায়ামুপবিষ্টমাব্রজৎ
বৈডূর্যরূপান্প্রতিমুচ্য কাঞ্চনা;নক্ষান্স কক্ষে পরিগৃহ্য বাসসা
6.2
নরাধিপো রাষ্ট্রপতিং যশস্বিনং; মহায়শাঃ কৌরববংশবর্ধনঃ
মহানুভাবো নররাজসত্কৃতো; দুরাসদস্তীক্ষ্ণবিষো যথোরগঃ
6.3
বলেন রূপেণ নরর্ষভো মহা;নথার্চিরূপেণ যথামরস্তথা
মহাভ্রজালৈরিব সংবৃতো রবি;র্যথানলো ভস্মবৃতশ্চ বীর্যবান্
6.4
তমাপতন্তং প্রসমীক্ষ্য পাণ্ডবং; বিরাটরাডিন্দুমিবাভ্রসংবৃতম্
মন্ত্রিদ্বিজান্সূতমুখান্বিশস্তথা; যে চাপি কেচিত্পরিষত্সমাসতে
পপ্রচ্ছ কোঽয়ং প্রথমং সমেয়িবা;ননেন যোঽয়ং প্রসমীক্ষতে সভাম্
6.5
ন তু দ্বিজোঽয়ং ভবিতা নরোত্তমঃ; পতিঃ পৃথিব্যা ইতি মে মনোগতম্
ন চাস্য দাসো ন রথো ন কুণ্ডলে; সমীপতো ভ্রাজতি চায়মিন্দ্রবৎ
6.6
শরীরলিঙ্গৈরুপসূচিতো হ্যয়ং; মূর্ধাভিষিক্তোঽয়মিতীব মানসম্
সমীপমায়াতি চ মে গতব্যথো; যথা গজস্তামরসীং মদোত্কটঃ
6.7
বিতর্কয়ন্তং তু নরর্ষভস্তদা; যুধিষ্ঠিরোঽভ্যেত্য বিরাটমব্রবীৎ
সম্রাড্বিজানাত্বিহ জীবিতার্থিনং; বিনষ্টসর্বস্বমুপাগতং দ্বিজম্
6.8
ইহাহমিচ্ছামি তবানঘান্তিকে; বস্তুং যথা কামচরস্তথা বিভো
তমব্রবীত্স্বাগতমিত্যনন্তরং; রাজা প্রহৃষ্টঃ প্রতিসংগৃহাণ চ
6.9
কামেন তাতাভিবদাম্যহং ত্বাং; কস্যাসি রাজ্ঞো বিষয়াদিহাগতঃ
গোত্রং চ নামাপি চ শংস তত্ত্বতঃ; কিং চাপি শিল্পং তব বিদ্যতে কৃতম্
6.10
যুধিষ্ঠির উবাচ
যুধিষ্ঠিরস্যাসমহং পুরা সখা; বৈয়াঘ্রপদ্যঃ পুনরস্মি ব্রাহ্মণঃ
অক্ষান্প্রবপ্তুং কুশলোঽস্মি দেবিতা; কঙ্কেতি নাম্নাস্মি বিরাট বিশ্রুতঃ
6.11
বিরাট উবাচ
দদামি তে হন্ত বরং যমিচ্ছসি; প্রশাধি মত্স্যান্বশগো হ্যহং তব
প্রিয়া হি ধূর্তা মম দেবিনঃ সদা; ভবাংশ্চ দেবোপম রাজ্যমর্হতি
6.12
যুধিষ্ঠির উবাচ
আপ্তো বিবাদঃ পরমো বিশাং পতে; ন বিদ্যতে কিংচন মত্স্য হীনতঃ
ন মে জিতঃ কশ্চন ধারয়েদ্ধনং; বরো মমৈষোঽস্তু তব প্রসাদতঃ
6.13
বিরাট উবাচ
হন্যামবধ্যং যদি তেঽপ্রিয়ং চরে;ত্প্রব্রাজয়েয়ং বিষয়াদ্দ্বিজাংস্তথা
শৃণ্বন্তু মে জানপদাঃ সমাগতাঃ; কঙ্কো যথাহং বিষয়ে প্রভুস্তথা
6.14
সমানয়ানো ভবিতাসি মে সখা; প্রভূতবস্ত্রো বহুপানভোজনঃ
পশ্যেস্ত্বমন্তশ্চ বহিশ্চ সর্বদা; কৃতং চ তে দ্বারমপাবৃতং ময়া
6.15
যে ত্বানুবাদেয়ুরবৃত্তিকর্শিতা; ব্রূয়াশ্চ তেষাং বচনেন মে সদা
দাস্যামি সর্বং তদহং ন সংশয়ো; ন তে ভয়ং বিদ্যতি সংনিধৌ মম
6.16
বৈশংপায়ন উবাচ
এবং স লব্ধ্বা তু বরং সমাগমং; বিরাটরাজেন নরর্ষভস্তদা
উবাস বীরঃ পরমার্চিতঃ সুখী; ন চাপি কশ্চিচ্চরিতং বুবোধ তৎ