অধ্যায় 5

5.1

বৈশংপায়ন উবাচ
তে বীরা বদ্ধনিস্ত্রিংশাস্ততায়ুধকলাপিনঃ
বদ্ধগোধাঙ্গুলিত্রাণাঃ কালিন্দীমভিতো যয়ুঃ

5.2

ততস্তে দক্ষিণং তীরমন্বগচ্ছন্পদাতয়ঃ
বসন্তো গিরিদুর্গেষু বনদুর্গেষু ধন্বিনঃ

5.3

বিধ্যন্তো মৃগজাতানি মহেষ্বাসা মহাবলাঃ
উত্তরেণ দশার্ণাংস্তে পাঞ্চালান্দক্ষিণেন তু

5.4

অন্তরেণ যকৃল্লোমাঞ্শূরসেনাংশ্চ পাণ্ডবাঃ
লুব্ধা ব্রুবাণা মত্স্যস্য বিষয়ং প্রাবিশন্বনাৎ

5.5

ততো জনপদং প্রাপ্য কৃষ্ণা রাজানমব্রবীৎ
পশ্যৈকপদ্যো দৃশ্যন্তে ক্ষেত্রাণি বিবিধানি চ

5.6

ব্যক্তং দূরে বিরাটস্য রাজধানী ভবিষ্যতি
বসামেহ পরাং রাত্রিং বলবান্মে পরিশ্রমঃ

5.7

যুধিষ্ঠির উবাচ
ধনংজয় সমুদ্যম্য পাঞ্চালীং বহ ভারত
রাজধান্যাং নিবত্স্যামো বিমুক্তাশ্চ বনাদিতঃ

5.8

বৈশংপায়ন উবাচ
তামাদায়ার্জুনস্তূর্ণং দ্রৌপদীং গজরাডিব
সংপ্রাপ্য নগরাভ্যাশমবতারয়দর্জুনঃ

5.9

স রাজধানীং সংপ্রাপ্য কৌন্তেয়োঽর্জুনমব্রবীৎ
ক্বায়ুধানি সমাসজ্য প্রবেক্ষ্যামঃ পুরং বয়ম্

5.10

সায়ুধাশ্চ বয়ং তাত প্রবেক্ষ্যামঃ পুরং যদি
সমুদ্বেগং জনস্যাস্য করিষ্যামো ন সংশয়ঃ

5.11

ততো দ্বাদশ বর্ষাণি প্রবেষ্টব্যং বনং পুনঃ
একস্মিন্নপি বিজ্ঞাতে প্রতিজ্ঞাতং হি নস্তথা

5.12

অর্জুন উবাচ
ইয়ং কূটে মনুষ্যেন্দ্র গহনা মহতী শমী
ভীমশাখা দুরারোহা শ্মশানস্য সমীপতঃ

5.13

ন চাপি বিদ্যতে কশ্চিন্মনুষ্য ইহ পার্থিব
উত্পথে হি বনে জাতা মৃগব্যালনিষেবিতে

5.14

সমাসজ্যায়ুধান্যস্যাং গচ্ছামো নগরং প্রতি
এবমত্র যথাজোষং বিহরিষ্যাম ভারত

5.15

বৈশংপায়ন উবাচ
এবমুক্ত্বা স রাজানং ধর্মাত্মানং যুধিষ্ঠিরম্
প্রচক্রমে নিধানায় শস্ত্রাণাং ভরতর্ষভ

5.16

যেন দেবান্মনুষ্যাংশ্চ সর্পাংশ্চৈকরথোঽজয়ৎ
স্ফীতাঞ্জনপদাংশ্চান্যানজয়ত্কুরুনন্দনঃ

5.17

তদুদারং মহাঘোষং সপত্নগণসূদনম্
অপজ্যমকরোত্পার্থো গাণ্ডীবমভয়ংকরম্

5.18

যেন বীরঃ কুরুক্ষেত্রমভ্যরক্ষত্পরংতপঃ
অমুঞ্চদ্ধনুষস্তস্য জ্যামক্ষয্যাং যুধিষ্ঠিরঃ

5.19

পাঞ্চালান্যেন সংগ্রামে ভীমসেনোঽজয়ত্প্রভুঃ
প্রত্যষেধদ্বহূনেকঃ সপত্নাংশ্চৈব দিগ্জয়ে

5.20

নিশম্য যস্য বিস্ফারং ব্যদ্রবন্ত রণে পরে
পর্বতস্যেব দীর্ণস্য বিস্ফোটমশনেরিব

5.21

সৈন্ধবং যেন রাজানং পরামৃষত চানঘ
জ্যাপাশং ধনুষস্তস্য ভীমসেনোঽবতারয়ৎ

5.22

অজয়ত্পশ্চিমামাশাং ধনুষা যেন পাণ্ডবঃ
তস্য মৌর্বীমপাকর্ষচ্ছূরঃ সংক্রন্দনো যুধি

5.23

দক্ষিণাং দক্ষিণাচারো দিশং যেনাজয়ত্প্রভুঃ
অপজ্যমকরোদ্বীরঃ সহদেবস্তদায়ুধম্

5.24

খড্গাংশ্চ পীতান্দীর্ঘাংশ্চ কলাপাংশ্চ মহাধনান্
বিপাঠান্ক্ষুরধারাংশ্চ ধনুর্ভির্নিদধুঃ সহ

5.25

তামুপারুহ্য নকুলো ধনূংষি নিদধত্স্বয়ম্
যানি তস্যাবকাশানি দৃঢরূপাণ্যমন্যত

5.26

যত্র চাপশ্যত স বৈ তিরো বর্ষাণি বর্ষতি
তত্র তানি দৃঢৈঃ পাশৈঃ সুগাঢং পর্যবন্ধত

5.27

শরীরং চ মৃতস্যৈকং সমবধ্নন্ত পাণ্ডবাঃ
বিবর্জয়িষ্যন্তি নরা দূরাদেব শমীমিমাম্
আবদ্ধং শবমত্রেতি গন্ধমাঘ্রায় পূতিকম্

5.28

অশীতিশতবর্ষেয়ং মাতা ন ইতি বাদিনঃ
কুলধর্মোঽয়মস্মাকং পূর্বৈরাচরিতোঽপি চ
সমাসজানা বৃক্ষেঽস্মিন্নিতি বৈ ব্যাহরন্তি তে

5.29

আ গোপালাবিপালেভ্য আচক্ষাণাঃ পরংতপাঃ
আজগ্মুর্নগরাভ্যাশং পার্থাঃ শত্রুনিবর্হণাঃ

5.30

জয়ো জয়ন্তো বিজয়ো জয়ত্সেনো জয়দ্বলঃ
ইতি গুহ্যানি নামানি চক্রে তেষাং যুধিষ্ঠিরঃ

5.31

ততো যথাপ্রতিজ্ঞাভিঃ প্রাবিশন্নগরং মহৎ
অজ্ঞাতচর্যাং বত্স্যন্তো রাষ্ট্রে বর্ষং ত্রয়োদশম্

Contains text from DharmicData, made available under the Open Database License (ODbL). Simple meanings are written by AI and can contain mistakes.