Chapter 26

26.1

वैशंपायन उवाच
अथाब्रवीन्महावीर्यो द्रोणस्तत्त्वार्थदर्शिवान्
न तादृशा विनश्यन्ति नापि यान्ति पराभवम्

Vaishampayana uvacha
Athabravinmahaviryo dronastattvarthadarshivan
Na tadrisha vinashyanti napi yanti parabhavam

शूराश्च कृतविद्याश्च बुद्धिमन्तो जितेन्द्रियाः
धर्मज्ञाश्च कृतज्ञाश्च धर्मराजमनुव्रताः

Shurashcha kritavidyashcha buddhimanto jitendriyah
Dharmagyashcha kritagyashcha dharmarajamanuvratah

नीतिधर्मार्थतत्त्वज्ञं पितृवच्च समाहितम्
धर्मे स्थितं सत्यधृतिं ज्येष्ठं ज्येष्ठापचायिनम्

Nitidharmarthatattvagyam pitrivachcha samahitam
Dharme sthitam satyadhritim jyeshtham jyeshthapachayinam

अनुव्रता महात्मानं भ्रातरं भ्रातरो नृप
अजातशत्रुं ह्रीमन्तं तं च भ्रातॄननुव्रतम्

Anuvrata mahatmanam bhrataram bhrataro nripa
Ajatashatrum hrimantam tam cha bhratrinanuvratam

तेषां तथा विधेयानां निभृतानां महात्मनाम्
किमर्थं नीतिमान्पार्थः श्रेयो नैषां करिष्यति

Tesham tatha vidheyanam nibhritanam mahatmanam
Kimartham nitimanparthah shreyo naisham karishyati

तस्माद्यत्नात्प्रतीक्षन्ते कालस्योदयमागतम्
न हि ते नाशमृच्छेयुरिति पश्याम्यहं धिया

Tasmadyatnatpratikshante kalasyodayamagatam
Na hi te nashamrichchheyuriti pashyamyaham dhiya

सांप्रतं चैव यत्कार्यं तच्च क्षिप्रमकालिकम्
क्रियतां साधु संचिन्त्य वासश्चैषां प्रचिन्त्यताम्

Sampratam chaiva yatkaryam tachcha kshipramakalikam
Kriyatam sadhu sanchintya vasashchaisham prachintyatam

यथावत्पाण्डुपुत्राणां सर्वार्थेषु धृतात्मनाम्
दुर्ज्ञेयाः खलु शूरास्ते अपापास्तपसा वृताः

Yathavatpanduputranam sarvartheshu dhritatmanam
Durgyeyah khalu shuraste apapastapasa vritah

शुद्धात्मा गुणवान्पार्थः सत्यवान्नीतिमाञ्शुचिः
तेजोराशिरसंख्येयो गृह्णीयादपि चक्षुषी

Shuddhatma gunavanparthah satyavannitimanshuchih
Tejorashirasankhyeyo grihniyadapi chakshushi

विज्ञाय क्रियतां तस्माद्भूयश्च मृगयामहे
ब्राह्मणैश्चारकैः सिद्धैर्ये चान्ये तद्विदो जनाः

Vigyaya kriyatam tasmadbhuyashcha mrigayamahe
Brahmanaishcharakaih siddhairye chanye tadvido janah