অধ্যায় 129

129.1

লোমশ উবাচ
অস্মিন্কিল স্বয়ং রাজন্নিষ্টবান্বৈ প্রজাপতিঃ
সত্রমিষ্টীকৃতং নাম পুরা বর্ষসহস্রিকম্

অম্বরীষশ্চ নাভাগ ইষ্টবান্যমুনামনু
যজ্ঞৈশ্চ তপসা চৈব পরাং সিদ্ধিমবাপ সঃ

দেশো নাহুষয়জ্ঞানাময়ং পুণ্যতমো নৃপ
যত্রেষ্ট্বা দশ পদ্মানি সদস্যেভ্যো নিসৃষ্টবান্

সার্বভৌমস্য কৌন্তেয় যয়াতেরমিতৌজসঃ
স্পর্ধমানস্য শক্রেণ পশ্যেদং যজ্ঞবাস্ত্বিহ

পশ্য নানাবিধাকারৈরগ্নিভির্নিচিতাং মহীম্
মজ্জন্তীমিব চাক্রান্তাং যয়াতের্যজ্ঞকর্মভিঃ

এষা শম্যেকপত্রা সা শরকং চৈতদুত্তমম্
পশ্য রামহ্রদানেতান্পশ্য নারায়ণাশ্রমম্

এতদার্চীকপুত্রস্য যোগৈর্বিচরতো মহীম্
অপসর্পণং মহীপাল রৌপ্যায়ামমিতৌজসঃ

অত্রানুবংশং পঠতঃ শৃণু মে কুরুনন্দন
উলূখলৈরাভরণৈঃ পিশাচী যদভাষত

যুগংধরে দধি প্রাশ্য উষিত্বা চাচ্যুতস্থলে
তদ্বদ্ভূতিলয়ে স্নাত্বা সপুত্রা বস্তুমিচ্ছসি

একরাত্রমুষিত্বেহ দ্বিতীয়ং যদি বত্স্যসি
এতদ্বৈ তে দিবা বৃত্তং রাত্রৌ বৃত্তমতোঽন্যথা

অত্রাদ্যাহো নিবত্স্যামঃ ক্ষপাং ভরতসত্তম
দ্বারমেতদ্ধি কৌন্তেয় কুরুক্ষেত্রস্য ভারত

অত্রৈব নাহুষো রাজা রাজন্ক্রতুভিরিষ্টবান্
যয়াতির্বহুরত্নাঢ্যৈর্যত্রেন্দ্রো মুদমভ্যগাৎ

এতত্প্লক্ষাবতরণং যমুনাতীর্থমুচ্যতে
এতদ্বৈ নাকপৃষ্ঠস্য দ্বারমাহুর্মনীষিণঃ

অত্র সারস্বতৈর্যজ্ঞৈরীজানাঃ পরমর্ষয়ঃ
যূপোলূখলিনস্তাত গচ্ছন্ত্যবভৃথাপ্লবম্

অত্রৈব ভরতো রাজা মেধ্যমশ্বমবাসৃজৎ
অসকৃত্কৃষ্ণসারঙ্গং ধর্মেণাবাপ্য মেদিনীম্

অত্রৈব পুরুষব্যাঘ্র মরুত্তঃ সত্রমুত্তমম্
আস্তে দেবর্ষিমুখ্যেন সংবর্তেনাভিপালিতঃ

অত্রোপস্পৃশ্য রাজেন্দ্র সর্বাঁল্লোকান্প্রপশ্যতি
পূয়তে দুষ্কৃতাচ্চৈব সমুপস্পৃশ্য ভারত

বৈশংপায়ন উবাচ
তত্র সভ্রাতৃকঃ স্নাত্বা স্তূয়মানো মহর্ষিভিঃ
লোমশং পাণ্ডবশ্রেষ্ঠ ইদং বচনমব্রবীৎ

সর্বাঁল্লোকান্প্রপশ্যামি তপসা সত্যবিক্রম
ইহস্থঃ পাণ্ডবশ্রেষ্ঠং পশ্যামি শ্বেতবাহনম্

লোমশ উবাচ
এবমেতন্মহাবাহো পশ্যন্তি পরমর্ষয়ঃ
সরস্বতীমিমাং পুণ্যাং পশ্যৈকশরণাবৃতাম্

যত্র স্নাত্বা নরশ্রেষ্ঠ ধূতপাপ্মা ভবিষ্যতি
ইহ সারস্বতৈর্যজ্ঞৈরিষ্টবন্তঃ সুরর্ষয়ঃ
ঋষয়শ্চৈব কৌন্তেয় তথা রাজর্ষয়োঽপি চ

বেদী প্রজাপতেরেষা সমন্তাত্পঞ্চয়োজনা
কুরোর্বৈ যজ্ঞশীলস্য ক্ষেত্রমেতন্মহাত্মনঃ