অধ্যায় 128

128.1

সোমক উবাচ
ব্রহ্মন্যদ্যদ্যথা কার্যং তত্তত্কুরু তথা তথা
পুত্রকামতয়া সর্বং করিষ্যামি বচস্তব

লোমশ উবাচ
ততঃ স যাজয়ামাস সোমকং তেন জন্তুনা
মাতরস্তু বলাত্পুত্রমপাকর্ষুঃ কৃপান্বিতাঃ

হা হতাঃ স্মেতি বাশন্ত্যস্তীব্রশোকসমন্বিতাঃ
তং মাতরঃ প্রত্যকর্ষন্গৃহীত্বা দক্ষিণে করে
সব্যে পাণৌ গৃহীত্বা তু যাজকোঽপি স্ম কর্ষতি

কুররীণামিবার্তানামপাকৃষ্য তু তং সুতম্
বিশস্য চৈনং বিধিনা বপামস্য জুহাব সঃ

বপায়াং হূয়মানায়াং গন্ধমাঘ্রায় মাতরঃ
আর্তা নিপেতুঃ সহসা পৃথিব্যাং কুরুনন্দন
সর্বাশ্চ গর্ভানলভংস্ততস্তাঃ পার্থিবাঙ্গনাঃ

ততো দশসু মাসেষু সোমকস্য বিশাং পতে
জজ্ঞে পুত্রশতং পূর্ণং তাসু সর্বাসু ভারত

জন্তুর্জ্যেষ্ঠঃ সমভবজ্জনিত্র্যামেব ভারত
স তাসামিষ্ট এবাসীন্ন তথান্যে নিজাঃ সুতাঃ

তচ্চ লক্ষণমস্যাসীত্সৌবর্ণং পার্শ্ব উত্তরে
তস্মিন্পুত্রশতে চাগ্র্যঃ স বভূব গুণৈর্যুতঃ

ততঃ স লোকমগমত্সোমকস্য গুরুঃ পরম্
অথ কালে ব্যতীতে তু সোমকোঽপ্যগমত্পরম্

অথ তং নরকে ঘোরে পচ্যমানং দদর্শ সঃ
তমপৃচ্ছত্কিমর্থং ত্বং নরকে পচ্যসে দ্বিজ

তমব্রবীদ্গুরুঃ সোঽথ পচ্যমানোঽগ্নিনা ভৃশম্
ত্বং ময়া যাজিতো রাজংস্তস্যেদং কর্মণঃ ফলম্

এতচ্ছ্রুত্বা স রাজর্ষির্ধর্মরাজানমব্রবীৎ
অহমত্র প্রবেক্ষ্যামি মুচ্যতাং মম যাজকঃ
মত্কৃতে হি মহাভাগঃ পচ্যতে নরকাগ্নিনা

ধর্ম উবাচ
নান্যঃ কর্তুঃ ফলং রাজন্নুপভুঙ্ক্তে কদাচন
ইমানি তব দৃশ্যন্তে ফলানি দদতাং বর

সোমক উবাচ
পুণ্যান্ন কাময়ে লোকানৃতেঽহং ব্রহ্মবাদিনম্
ইচ্ছাম্যহমনেনৈব সহ বস্তুং সুরালয়ে

নরকে বা ধর্মরাজ কর্মণাস্য সমো হ্যহম্
পুণ্যাপুণ্যফলং দেব সমমস্ত্বাবয়োরিদম্

ধর্ম উবাচ
যদ্যেবমীপ্সিতং রাজন্ভুঙ্ক্ষ্বাস্য সহিতঃ ফলম্
তুল্যকালং সহানেন পশ্চাত্প্রাপ্স্যসি সদ্গতিম্

লোমশ উবাচ
স চকার তথা সর্বং রাজা রাজীবলোচনঃ
পুনশ্চ লেভে লোকান্স্বান্কর্মণা নির্জিতাঞ্শুভান্
সহ তেনৈব বিপ্রেণ গুরুণা স গুরুপ্রিয়ঃ

এষ তস্যাশ্রমঃ পুণ্যো য এষোঽগ্রে বিরাজতে
ক্ষান্ত উষ্যাত্র ষড্রাত্রং প্রাপ্নোতি সুগতিং নরঃ

এতস্মিন্নপি রাজেন্দ্র বত্স্যামো বিগতজ্বরাঃ
ষড্রাত্রং নিয়তাত্মানঃ সজ্জীভব কুরূদ্বহ