Utshovঅধ্যায় 127
127.1
যুধিষ্ঠির উবাচ
কথংবীর্যঃ স রাজাভূত্সোমকো বদতাং বর
কর্মাণ্যস্য প্রভাবং চ শ্রোতুমিচ্ছামি তত্ত্বতঃ
127.2
লোমশ উবাচ
যুধিষ্ঠিরাসীন্নৃপতিঃ সোমকো নাম ধার্মিকঃ
তস্য ভার্যাশতং রাজন্সদৃশীনামভূত্তদা
127.3
স বৈ যত্নেন মহতা তাসু পুত্রং মহীপতিঃ
কংচিন্নাসাদয়ামাস কালেন মহতা অপি
127.4
কদাচিত্তস্য বৃদ্ধস্য যতমানস্য যত্নতঃ
জন্তুর্নাম সুতস্তস্মিন্স্ত্রীশতে সমজায়ত
127.5
তং জাতং মাতরঃ সর্বাঃ পরিবার্য সমাসতে
সততং পৃষ্ঠতঃ কৃত্বা কামভোগান্বিশাং পতে
127.6
ততঃ পিপীলিকা জন্তুং কদাচিদদশত্স্ফিজি
স দষ্টো ব্যনদদ্রাজংস্তেন দুঃখেন বালকঃ
127.7
ততস্তা মাতরঃ সর্বাঃ প্রাক্রোশন্ভৃশদুঃখিতাঃ
পরিবার্য জন্তুং সহিতাঃ স শব্দস্তুমুলোঽভবৎ
127.8
তমার্তনাদং সহসা শুশ্রাব স মহীপতিঃ
অমাত্যপরিষন্মধ্যে উপবিষ্টঃ সহর্ত্বিজৈঃ
127.9
ততঃ প্রস্থাপয়ামাস কিমেতদিতি পার্থিবঃ
তস্মৈ ক্ষত্তা যথাবৃত্তমাচচক্ষে সুতং প্রতি
127.10
ত্বরমাণঃ স চোত্থায় সোমকঃ সহ মন্ত্রিভিঃ
প্রবিশ্যান্তঃপুরং পুত্রমাশ্বাসয়দরিংদমঃ
127.11
সান্ত্বয়িত্বা তু তং পুত্রং নিষ্ক্রম্যান্তঃপুরান্নৃপঃ
ঋত্বিজৈঃ সহিতো রাজন্সহামাত্য উপাবিশৎ
127.12
সোমক উবাচ
ধিগস্ত্বিহৈকপুত্রত্বমপুত্রত্বং বরং ভবেৎ
নিত্যাতুরত্বাদ্ভূতানাং শোক এবৈকপুত্রতা
127.13
ইদং ভার্যাশতং ব্রহ্মন্পরীক্ষ্যোপচিতং প্রভো
পুত্রার্থিনা ময়া বোঢং ন চাসাং বিদ্যতে প্রজা
127.14
একঃ কথংচিদুত্পন্নঃ পুত্রো জন্তুরয়ং মম
যতমানস্য সর্বাসু কিং নু দুঃখমতঃ পরম্
127.15
বয়শ্চ সমতীতং মে সভার্যস্য দ্বিজোত্তম
আসাং প্রাণাঃ সমায়ত্তা মম চাত্রৈকপুত্রকে
127.16
স্যান্নু কর্ম তথা যুক্তং যেন পুত্রশতং ভবেৎ
মহতা লঘুনা বাপি কর্মণা দুষ্করেণ বা
127.17
ঋত্বিগুবাচ
অস্তি বৈ তাদৃশং কর্ম যেন পুত্রশতং ভবেৎ
যদি শক্নোষি তত্কর্তুমথ বক্ষ্যামি সোমক
127.18
সোমক উবাচ
কার্যং বা যদি বাকার্যং যেন পুত্রশতং ভবেৎ
কৃতমেব হি তদ্বিদ্ধি ভগবান্প্রব্রবীতু মে
127.19
ঋত্বিগুবাচ
যজস্ব জন্তুনা রাজংস্ত্বং ময়া বিততে ক্রতৌ
ততঃ পুত্রশতং শ্রীমদ্ভবিষ্যত্যচিরেণ তে
127.20
বপায়াং হূয়মানায়াং ধূমমাঘ্রায় মাতরঃ
ততস্তাঃ সুমহাবীর্যাঞ্জনয়িষ্যন্তি তে সুতান্
127.21
তস্যামেব তু তে জন্তুর্ভবিতা পুনরাত্মজঃ
উত্তরে চাস্য সৌবর্ণং লক্ষ্ম পার্শ্বে ভবিষ্যতি