Utshovঅধ্যায় 126
126.1
যুধিষ্ঠির উবাচ
মান্ধাতা রাজশার্দূলস্ত্রিষু লোকেষু বিশ্রুতঃ
কথং জাতো মহাব্রহ্মন্যৌবনাশ্বো নৃপোত্তমঃ
কথং চৈতাং পরাং কাষ্ঠাং প্রাপ্তবানমিতদ্যুতিঃ
126.2
যস্য লোকাস্ত্রয়ো বশ্যা বিষ্ণোরিব মহাত্মনঃ
এতদিচ্ছাম্যহং শ্রোতুং চরিতং তস্য ধীমতঃ
126.3
যথা মান্ধাতৃশব্দশ্চ তস্য শক্রসমদ্যুতেঃ
জন্ম চাপ্রতিবীর্যস্য কুশলো হ্যসি ভাষিতুম্
126.4
লোমশ উবাচ
শৃণুষ্বাবহিতো রাজন্রাজ্ঞস্তস্য মহাত্মনঃ
যথা মান্ধাতৃশব্দো বৈ লোকেষু পরিগীয়তে
126.5
ইক্ষ্বাকুবংশপ্রভবো যুবনাশ্বো মহীপতিঃ
সোঽয়জত্পৃথিবীপাল ক্রতুভির্ভূরিদক্ষিণৈঃ
126.6
অশ্বমেধসহস্রং চ প্রাপ্য ধর্মভৃতাং বরঃ
অন্যৈশ্চ ক্রতুভির্মুখ্যৈর্বিবিধৈরাপ্তদক্ষিণৈঃ
126.7
অনপত্যস্তু রাজর্ষিঃ স মহাত্মা দৃঢব্রতঃ
মন্ত্রিষ্বাধায় তদ্রাজ্যং বননিত্যো বভূব হ
126.8
শাস্ত্রদৃষ্টেন বিধিনা সংয়োজ্যাত্মানমাত্মনা
পিপাসাশুষ্কহৃদয়ঃ প্রবিবেশাশ্রমং ভৃগোঃ
126.9
তামেব রাত্রিং রাজেন্দ্র মহাত্মা ভৃগুনন্দনঃ
ইষ্টিং চকার সৌদ্যুম্নের্মহর্ষিঃ পুত্রকারণাৎ
126.10
সংভৃতো মন্ত্রপূতেন বারিণা কলশো মহান্
তত্রাতিষ্ঠত রাজেন্দ্র পূর্বমেব সমাহিতঃ
যত্প্রাশ্য প্রসবেত্তস্য পত্নী শক্রসমং সুতম্
126.11
তং ন্যস্য বেদ্যাং কলশং সুষুপুস্তে মহর্ষয়ঃ
রাত্রিজাগরণশ্রান্তাঃ সৌদ্যুম্নিঃ সমতীত্য তান্
126.12
শুষ্ককণ্ঠঃ পিপাসার্তঃ পানীয়ার্থী ভৃশং নৃপঃ
তং প্রবিশ্যাশ্রমং শ্রান্তঃ পানীয়ং সোঽভ্যয়াচত
126.13
তস্য শ্রান্তস্য শুষ্কেণ কণ্ঠেন ক্রোশতস্তদা
নাশ্রৌষীত্কশ্চন তদা শকুনেরিব বাশিতম্
126.14
ততস্তং কলশং দৃষ্ট্বা জলপূর্ণং স পার্থিবঃ
অভ্যদ্রবত বেগেন পীত্বা চাম্ভো ব্যবাসৃজৎ
126.15
স পীত্বা শীতলং তোয়ং পিপাসার্তো মহীপতিঃ
নির্বাণমগমদ্ধীমান্সুসুখী চাভবত্তদা
126.16
ততস্তে প্রত্যবুধ্যন্ত ঋষয়ঃ সনরাধিপাঃ
নিস্তোয়ং তং চ কলশং দদৃশুঃ সর্ব এব তে
126.17
কস্য কর্মেদমিতি চ পর্যপৃচ্ছন্সমাগতাঃ
যুবনাশ্বো ময়েত্যেব সত্যং সমভিপদ্যত
126.18
ন যুক্তমিতি তং প্রাহ ভগবান্ভার্গবস্তদা
সুতার্থং স্থাপিতা হ্যাপস্তপসা চৈব সংভৃতাঃ
126.19
ময়া হ্যত্রাহিতং ব্রহ্ম তপ আস্থায় দারুণম্
পুত্রার্থং তব রাজর্ষে মহাবলপরাক্রম
126.20
মহাবলো মহাবীর্যস্তপোবলসমন্বিতঃ
যঃ শক্রমপি বীর্যেণ গময়েদ্যমসাদনম্
126.21
অনেন বিধিনা রাজন্ময়ৈতদুপপাদিতম্
অব্ভক্ষণং ত্বয়া রাজন্নয়ুক্তং কৃতমদ্য বৈ
126.22
ন ত্বদ্য শক্যমস্মাভিরেতত্কর্তুমতোঽন্যথা
নূনং দৈবকৃতং হ্যেতদ্যদেবং কৃতবানসি
126.23
পিপাসিতেন যাঃ পীতা বিধিমন্ত্রপুরস্কৃতাঃ
আপস্ত্বয়া মহারাজ মত্তপোবীর্যসংভৃতাঃ
তাভ্যস্ত্বমাত্মনা পুত্রমেবংবীর্যং জনিষ্যসি
126.24
বিধাস্যামো বয়ং তত্র তবেষ্টিং পরমাদ্ভুতাম্
যথা শক্রসমং পুত্রং জনয়িষ্যসি বীর্যবান্
126.25
ততো বর্ষশতে পূর্ণে তস্য রাজ্ঞো মহাত্মনঃ
বামং পার্শ্বং বিনির্ভিদ্য সুতঃ সূর্য ইবাপরঃ
126.26
নিশ্চক্রাম মহাতেজা ন চ তং মৃত্যুরাবিশৎ
যুবনাশ্বং নরপতিং তদদ্ভুতমিবাভবৎ
126.27
ততঃ শক্রো মহাতেজাস্তং দিদৃক্ষুরুপাগমৎ
প্রদেশিনীং ততোঽস্যাস্যে শক্রঃ সমভিসংদধে
126.28
মাময়ং ধাস্যতীত্যেবং পরিভাষ্টঃ স বজ্রিণা
মান্ধাতেতি চ নামাস্য চক্রুঃ সেন্দ্রা দিবৌকসঃ
126.29
প্রদেশিনীং শক্রদত্তামাস্বাদ্য স শিশুস্তদা
অবর্ধত মহীপাল কিষ্কূণাং চ ত্রয়োদশ
126.30
বেদাস্তং সধনুর্বেদা দিব্যান্যস্ত্রাণি চেশ্বরম্
উপতস্থুর্মহারাজ ধ্যাতমাত্রাণি সর্বশঃ
126.31
ধনুরাজগবং নাম শরাঃ শৃঙ্গোদ্ভবাশ্চ যে
অভেদ্যং কবচং চৈব সদ্যস্তমুপসংশ্রয়ন্
126.32
সোঽভিষিক্তো মঘবতা স্বয়ং শক্রেণ ভারত
ধর্মেণ ব্যজয়ল্লোকাংস্ত্রীন্বিষ্ণুরিব বিক্রমৈঃ
126.33
তস্যাপ্রতিহতং চক্রং প্রাবর্তত মহাত্মনঃ
রত্নানি চৈব রাজর্ষিং স্বয়মেবোপতস্থিরে
126.34
তস্যেয়ং বসুসংপূর্ণা বসুধা বসুধাধিপ
তেনেষ্টং বিবিধৈর্যজ্ঞৈর্বহুভিঃ স্বাপ্তদক্ষিণৈঃ
126.35
চিতচৈত্যো মহাতেজা ধর্মং প্রাপ্য চ পুষ্কলম্
শক্রস্যার্ধাসনং রাজঁল্লব্ধবানমিতদ্যুতিঃ
126.36
একাহ্না পৃথিবী তেন ধর্মনিত্যেন ধীমতা
নির্জিতা শাসনাদেব সরত্নাকরপত্তনা
126.37
তস্য চিত্যৈর্মহারাজ ক্রতূনাং দক্ষিণাবতাম্
চতুরন্তা মহী ব্যাপ্তা নাসীত্কিংচিদনাবৃতম্
126.38
তেন পদ্মসহস্রাণি গবাং দশ মহাত্মনা
ব্রাহ্মণেভ্যো মহারাজ দত্তানীতি প্রচক্ষতে
126.39
তেন দ্বাদশবার্ষিক্যামনাবৃষ্ট্যাং মহাত্মনা
বৃষ্টং সস্যবিবৃদ্ধ্যর্থং মিষতো বজ্রপাণিনঃ
126.40
তেন সোমকুলোত্পন্নো গান্ধারাধিপতির্মহান্
গর্জন্নিব মহামেঘঃ প্রমথ্য নিহতঃ শরৈঃ
126.41
প্রজাশ্চতুর্বিধাস্তেন জিতা রাজন্মহাত্মনা
তেনাত্মতপসা লোকাঃ স্থাপিতাশ্চাপি তেজসা
126.42
তস্যৈতদ্দেবয়জনং স্থানমাদিত্যবর্চসঃ
পশ্য পুণ্যতমে দেশে কুরুক্ষেত্রস্য মধ্যতঃ
126.43
এতত্তে সর্বমাখ্যাতং মান্ধাতুশ্চরিতং মহৎ
জন্ম চাগ্র্যং মহীপাল যন্মাং ত্বং পরিপৃচ্ছসি