অধ্যায় 125

125.1

লোমশ উবাচ
তং দৃষ্ট্বা ঘোরবদনং মদং দেবঃ শতক্রতুঃ
আয়ান্তং ভক্ষয়িষ্যন্তং ব্যাত্তাননমিবান্তকম্

ভয়াত্সংস্তম্ভিতভুজঃ সৃক্কিণী লেলিহন্মুহুঃ
ততোঽব্রবীদ্দেবরাজশ্চ্যবনং ভয়পীডিতঃ

সোমার্হাবশ্বিনাবেতাবদ্য প্রভৃতি ভার্গব
ভবিষ্যতঃ সত্যমেতদ্বচো ব্রহ্মন্ব্রবীমি তে

ন তে মিথ্যা সমারম্ভো ভবত্বেষ পরো বিধিঃ
জানামি চাহং বিপ্রর্ষে ন মিথ্যা ত্বং করিষ্যসি

সোমার্হাবশ্বিনাবেতৌ যথৈবাদ্য কৃতৌ ত্বয়া
ভূয় এব তু তে বীর্যং প্রকাশেদিতি ভার্গব

সুকন্যায়াঃ পিতুশ্চাস্য লোকে কীর্তিঃ প্রথেদিতি
অতো ময়ৈতদ্বিহিতং তব বীর্যপ্রকাশনম্
তস্মাত্প্রসাদং কুরু মে ভবত্বেতদ্যথেচ্ছসি

এবমুক্তস্য শক্রেণ চ্যবনস্য মহাত্মনঃ
স মন্যুর্ব্যগমচ্ছীঘ্রং মুমোচ চ পুরংদরম্

মদং চ ব্যভজদ্রাজন্পানে স্ত্রীষু চ বীর্যবান্
অক্ষেষু মৃগয়ায়াং চ পূর্বসৃষ্টং পুনঃ পুনঃ

তথা মদং বিনিক্ষিপ্য শক্রং সংতর্প্য চেন্দুনা
অশ্বিভ্যাং সহিতান্দেবান্যাজয়িত্বা চ তং নৃপম্

বিখ্যাপ্য বীর্যং সর্বেষু লোকেষু বদতাং বরঃ
সুকন্যয়া সহারণ্যে বিজহারানুরক্তয়া

তস্যৈতদ্দ্বিজসংঘুষ্টং সরো রাজন্প্রকাশতে
অত্র ত্বং সহ সোদর্যৈঃ পিতৄন্দেবাংশ্চ তর্পয়

এতদ্দৃষ্ট্বা মহীপাল সিকতাক্ষং চ ভারত
সৈন্ধবারণ্যমাসাদ্য কুল্যানাং কুরু দর্শনম্
পুষ্করেষু মহারাজ সর্বেষু চ জলং স্পৃশ

আর্চীকপর্বতশ্চৈব নিবাসো বৈ মনীষিণাম্
সদাফলঃ সদাস্রোতো মরুতাং স্থানমুত্তমম্
চৈত্যাশ্চৈতে বহুশতাস্ত্রিদশানাং যুধিষ্ঠির

এতচ্চন্দ্রমসস্তীর্থমৃষয়ঃ পর্যুপাসতে
বৈখানসাশ্চ ঋষয়ো বালখিল্যাস্তথৈব চ

শৃঙ্গাণি ত্রীণি পুণ্যাণি ত্রীণি প্রস্রবণানি চ
সর্বাণ্যনুপরিক্রম্য যথাকামমুপস্পৃশ

শংতনুশ্চাত্র কৌন্তেয় শুনকশ্চ নরাধিপ
নরনারায়ণৌ চোভৌ স্থানং প্রাপ্তাঃ সনাতনম্

ইহ নিত্যশয়া দেবাঃ পিতরশ্চ মহর্ষিভিঃ
আর্চীকপর্বতে তেপুস্তান্যজস্ব যুধিষ্ঠির

ইহ তে বৈ চরূন্প্রাশ্নন্নৃষয়শ্চ বিশাং পতে
যমুনা চাক্ষয়স্রোতাঃ কৃষ্ণশ্চেহ তপোরতঃ

যমৌ চ ভীমসেনশ্চ কৃষ্ণা চামিত্রকর্শন
সর্বে চাত্র গমিষ্যামঃ সুকৃশাঃ সুতপস্বিনঃ

এতত্প্রস্রবণং পুণ্যমিন্দ্রস্য মনুজাধিপ
যত্র ধাতা বিধাতা চ বরুণশ্চোর্ধ্বমাগতাঃ

ইহ তে ন্যবসন্রাজন্ক্ষান্তাঃ পরমধর্মিণঃ
মৈত্রাণামৃজুবুদ্ধীনাময়ং গিরিবরঃ শুভঃ

এষা সা যমুনা রাজন্রাজর্ষিগণসেবিতা
নানায়জ্ঞচিতা রাজন্পুণ্যা পাপভয়াপহা

অত্র রাজা মহেষ্বাসো মান্ধাতায়জত স্বয়ম্
সহদেবশ্চ কৌন্তেয় সোমকো দদতাং বরঃ