Utshovঅধ্যায় 124
124.1
লোমশ উবাচ
ততঃ শ্রুত্বা তু শর্যাতির্বয়ঃস্থং চ্যবনং কৃতম্
সংহৃষ্টঃ সেনয়া সার্ধমুপায়াদ্ভার্গবাশ্রমম্
124.2
চ্যবনং চ সুকন্যাং চ দৃষ্ট্বা দেবসুতাবিব
রেমে মহীপঃ শর্যাতিঃ কৃত্স্নাং প্রাপ্য মহীমিব
124.3
ঋষিণা সত্কৃতস্তেন সভার্যঃ পৃথিবীপতিঃ
উপোপবিষ্টঃ কল্যাণীঃ কথাশ্চক্রে মহামনাঃ
124.4
অথৈনং ভার্গবো রাজন্নুবাচ পরিসান্ত্বয়ন্
যাজয়িষ্যামি রাজংস্ত্বাং সংভারানুপকল্পয়
124.5
ততঃ পরমসংহৃষ্টঃ শর্যাতিঃ পৃথিবীপতিঃ
চ্যবনস্য মহারাজ তদ্বাক্যং প্রত্যপূজয়ৎ
124.6
প্রশস্তেঽহনি যজ্ঞীয়ে সর্বকামসমৃদ্ধিমৎ
কারয়ামাস শর্যাতির্যজ্ঞায়তনমুত্তমম্
124.7
তত্রৈনং চ্যবনো রাজন্যাজয়ামাস ভার্গবঃ
অদ্ভুতানি চ তত্রাসন্যানি তানি নিবোধ মে
124.8
অগৃহ্ণাচ্চ্যবনঃ সোমমশ্বিনোর্দেবয়োস্তদা
তমিন্দ্রো বারয়ামাস গৃহ্যমাণং তয়োর্গ্রহম্
124.9
ইন্দ্র উবাচ
উভাবেতৌ ন সোমার্হৌ নাসত্যাবিতি মে মতিঃ
ভিষজৌ দেবপুত্রাণাং কর্মণা নৈবমর্হতঃ
124.10
চ্যবন উবাচ
মাবমংস্থা মহাত্মানৌ রূপদ্রবিণবত্তরৌ
যৌ চক্রতুর্মাং মঘবন্বৃন্দারকমিবাজরম্
124.11
ঋতে ত্বাং বিবুধাংশ্চান্যান্কথং বৈ নার্হতঃ সবম্
অশ্বিনাবপি দেবেন্দ্র দেবৌ বিদ্ধি পুরংদর
124.12
ইন্দ্র উবাচ
চিকিত্সকৌ কর্মকরৌ কামরূপসমন্বিতৌ
লোকে চরন্তৌ মর্ত্যানাং কথং সোমমিহার্হতঃ
124.13
লোমশ উবাচ
এতদেব যদা বাক্যমাম্রেডয়তি বাসবঃ
অনাদৃত্য ততঃ শক্রং গ্রহং জগ্রাহ ভার্গবঃ
124.14
গ্রহীষ্যন্তং তু তং সোমমশ্বিনোরুত্তমং তদা
সমীক্ষ্য বলভিদ্দেব ইদং বচনমব্রবীৎ
124.15
আভ্যামর্থায় সোমং ত্বং গ্রহীষ্যসি যদি স্বয়ম্
বজ্রং তে প্রহরিষ্যামি ঘোররূপমনুত্তমম্
124.16
এবমুক্তঃ স্ময়ন্নিন্দ্রমভিবীক্ষ্য স ভার্গবঃ
জগ্রাহ বিধিবত্সোমমশ্বিভ্যামুত্তমং গ্রহম্
124.17
ততোঽস্মৈ প্রাহরদ্বজ্রং ঘোররূপং শচীপতিঃ
তস্য প্রহরতো বাহুং স্তম্ভয়ামাস ভার্গবঃ
124.18
সংস্তম্ভয়িত্বা চ্যবনো জুহুবে মন্ত্রতোঽনলম্
কৃত্যার্থী সুমহাতেজা দেবং হিংসিতুমুদ্যতঃ
124.19
ততঃ কৃত্যা সমভবদৃষেস্তস্য তপোবলাৎ
মদো নাম মহাবীর্যো বৃহত্কায়ো মহাসুরঃ
শরীরং যস্য নির্দেষ্টুমশক্যং তু সুরাসুরৈঃ
124.20
তস্যাস্যমভবদ্ঘোরং তীক্ষ্ণাগ্রদশনং মহৎ
হনুরেকা স্থিতা তস্য ভূমাবেকা দিবং গতা
124.21
চতস্র আয়তা দংষ্ট্রা যোজনানাং শতং শতম্
ইতরে ত্বস্য দশনা বভূবুর্দশয়োজনাঃ
প্রাকারসদৃশাকারাঃ শূলাগ্রসমদর্শনাঃ
124.22
বাহূ পর্বতসংকাশাবায়তাবয়ুতং সমৌ
নেত্রে রবিশশিপ্রখ্যে বক্ত্রমন্তকসংনিভম্
124.23
লেলিহঞ্জিহ্বয়া বক্ত্রং বিদ্যুচ্চপললোলয়া
ব্যাত্তাননো ঘোরদৃষ্টির্গ্রসন্নিব জগদ্বলাৎ
124.24
স ভক্ষয়িষ্যন্সংক্রুদ্ধঃ শতক্রতুমুপাদ্রবৎ
মহতা ঘোররূপেণ লোকাঞ্শব্দেন নাদয়ন্