অধ্যায় 123

123.1

লোমশ উবাচ
কস্যচিত্ত্বথ কালস্য সুরাণামশ্বিনৌ নৃপ
কৃতাভিষেকাং বিবৃতাং সুকন্যাং তামপশ্যতাম্

তাং দৃষ্ট্বা দর্শনীয়াঙ্গীং দেবরাজসুতামিব
ঊচতুঃ সমভিদ্রুত্য নাসত্যাবশ্বিনাবিদম্

কস্য ত্বমসি বামোরু কিং বনে বৈ করোষি চ
ইচ্ছাব ভদ্রে জ্ঞাতুং ত্বাং তত্ত্বমাখ্যাহি শোভনে

ততঃ সুকন্যা সংবীতা তাবুবাচ সুরোত্তমৌ
শর্যাতিতনয়াং বিত্তং ভার্যাং চ চ্যবনস্য মাম্

অথাশ্বিনৌ প্রহস্যৈতামব্রূতাং পুনরেব তু
কথং ত্বমসি কল্যাণি পিত্রা দত্তা গতাধ্বনে

ভ্রাজসে বনমধ্যে ত্বং বিদ্যুত্সৌদামিনী যথা
ন দেবেষ্বপি তুল্যাং হি ত্বয়া পশ্যাব ভামিনি

সর্বাভরণসংপন্না পরমাম্বরধারিণী
শোভেথাস্ত্বনবদ্যাঙ্গি ন ত্বেবং মলপঙ্কিনী

কস্মাদেবংবিধা ভূত্বা জরাজর্জরিতং পতিম্
ত্বমুপাস্সে হ কল্যাণি কামভোগবহিষ্কৃতম্

অসমর্থং পরিত্রাণে পোষণে চ শুচিস্মিতে
সাধু চ্যবনমুত্সৃজ্য বরয়স্বৈকমাবয়োঃ
পত্যর্থং দেবগর্ভাভে মা বৃথা যৌবনং কৃথাঃ

এবমুক্তা সুকন্যা তু সুরৌ তাবিদমব্রবীৎ
রতাহং চ্যবনে পত্যৌ মৈবং মা পর্যশঙ্কিথাঃ

তাবব্রূতাং পুনস্ত্বেনামাবাং দেবভিষগ্বরৌ
যুবানং রূপসংপন্নং করিষ্যাবঃ পতিং তব

ততস্তস্যাবয়োশ্চৈব পতিমেকতমং বৃণু
এতেন সময়েনৈনমামন্ত্রয় বরাননে

সা তয়োর্বচনাদ্রাজন্নুপসংগম্য ভার্গবম্
উবাচ বাক্যং যত্তাভ্যামুক্তং ভৃগুসুতং প্রতি

তচ্ছ্রুত্বা চ্যবনো ভার্যামুবাচ ক্রিয়তামিতি
ভর্ত্রা সা সমনুজ্ঞাতা ক্রিয়তামিত্যথাব্রবীৎ

শ্রুত্বা তদশ্বিনৌ বাক্যং তত্তস্যাঃ ক্রিয়তামিতি
ঊচতূ রাজপুত্রীং তাং পতিস্তব বিশত্বপঃ

ততোঽম্ভশ্চ্যবনঃ শীঘ্রং রূপার্থী প্রবিবেশ হ
অশ্বিনাবপি তদ্রাজন্সরঃ প্রবিশতাং প্রভো

ততো মুহূর্তাদুত্তীর্ণাঃ সর্বে তে সরসস্ততঃ
দিব্যরূপধরাঃ সর্বে যুবানো মৃষ্টকুণ্ডলাঃ
তুল্যরূপধরাশ্চৈব মনসঃ প্রীতিবর্ধনাঃ

তেঽব্রুবন্সহিতাঃ সর্বে বৃণীষ্বান্যতমং শুভে
অস্মাকমীপ্সিতং ভদ্রে পতিত্বে বরবর্ণিনি
যত্র বাপ্যভিকামাসি তং বৃণীষ্ব সুশোভনে

সা সমীক্ষ্য তু তান্সর্বাংস্তুল্যরূপধরান্স্থিতান্
নিশ্চিত্য মনসা বুদ্ধ্যা দেবী বব্রে স্বকং পতিম্

লব্ধ্বা তু চ্যবনো ভার্যাং বয়োরূপং চ বাঞ্ছিতম্
হৃষ্টোঽব্রবীন্মহাতেজাস্তৌ নাসত্যাবিদং বচঃ

যথাহং রূপসংপন্নো বয়সা চ সমন্বিতঃ
কৃতো ভবদ্ভ্যাং বৃদ্ধঃ সন্ভার্যাং চ প্রাপ্তবানিমাম্

তস্মাদ্যুবাং করিষ্যামি প্রীত্যাহং সোমপীথিনৌ
মিষতো দেবরাজস্য সত্যমেতদ্ব্রবীমি বাম্

তচ্ছ্রুত্বা হৃষ্টমনসৌ দিবং তৌ প্রতিজগ্মতুঃ
চ্যবনোঽপি সুকন্যা চ সুরাবিব বিজহ্রতুঃ