Utshovঅধ্যায় 122
122.1
লোমশ উবাচ
ভৃগোর্মহর্ষেঃ পুত্রোঽভূচ্চ্যবনো নাম ভার্গবঃ
সমীপে সরসঃ সোঽস্য তপস্তেপে মহাদ্যুতিঃ
122.2
স্থাণুভূতো মহাতেজা বীরস্থানেন পাণ্ডব
অতিষ্ঠত্সুবহূন্কালানেকদেশে বিশাং পতে
122.3
স বল্মীকোঽভবদৃষির্লতাভিরভিসংবৃতঃ
কালেন মহতা রাজন্সমাকীর্ণঃ পিপীলিকৈঃ
122.4
তথা স সংবৃতো ধীমান্মৃত্পিণ্ড ইব সর্বশঃ
তপ্যতি স্ম তপো রাজন্বল্মীকেন সমাবৃতঃ
122.5
অথ দীর্ঘস্য কালস্য শর্যাতির্নাম পার্থিবঃ
আজগাম সরো রম্যং বিহর্তুমিদমুত্তমম্
122.6
তস্য স্ত্রীণাং সহস্রাণি চত্বার্যাসন্পরিগ্রহঃ
একৈব চ সুতা শুভ্রা সুকন্যা নাম ভারত
122.7
সা সখীভিঃ পরিবৃতা সর্বাভরণভূষিতা
চঙ্ক্রম্যমাণা বল্মীকং ভার্গবস্য সমাসদৎ
122.8
সা চৈব সুদতী তত্র পশ্যমানা মনোরমান্
বনস্পতীন্বিচিন্বন্তী বিজহার সখীবৃতা
122.9
রূপেণ বয়সা চৈব মদনেন মদেন চ
বভঞ্জ বনবৃক্ষাণাং শাখাঃ পরমপুষ্পিতাঃ
122.10
তাং সখীরহিতামেকামেকবস্ত্রামলংকৃতাম্
দদর্শ ভার্গবো ধীমাংশ্চরন্তীমিব বিদ্যুতম্
122.11
তাং পশ্যমানো বিজনে স রেমে পরমদ্যুতিঃ
ক্ষামকণ্ঠশ্চ ব্রহ্মর্ষিস্তপোবলসমন্বিতঃ
তামাবভাষে কল্যাণীং সা চাস্য ন শৃণোতি বৈ
122.12
ততঃ সুকন্যা বল্মীকে দৃষ্ট্বা ভার্গবচক্ষুষী
কৌতূহলাত্কণ্টকেন বুদ্ধিমোহবলাত্কৃতা
122.13
কিং নু খল্বিদমিত্যুক্ত্বা নির্বিভেদাস্য লোচনে
অক্রুধ্যত্স তয়া বিদ্ধে নেত্রে পরমমন্যুমান্
ততঃ শর্যাতিসৈন্যস্য শকৃন্মূত্রং সমাবৃণোৎ
122.14
ততো রুদ্ধে শকৃন্মূত্রে সৈন্যমানাহদুঃখিতম্
তথাগতমভিপ্রেক্ষ্য পর্যপৃচ্ছত্স পার্থিবঃ
122.15
তপোনিত্যস্য বৃদ্ধস্য রোষণস্য বিশেষতঃ
কেনাপকৃতমদ্যেহ ভার্গবস্য মহাত্মনঃ
জ্ঞাতং বা যদি বাজ্ঞাতং তদৃতং ব্রূত মাচিরম্
122.16
তমূচুঃ সৈনিকাঃ সর্বে ন বিদ্মোঽপকৃতং বয়ম্
সর্বোপায়ৈর্যথাকামং ভবাংস্তদধিগচ্ছতু
122.17
ততঃ স পৃথিবীপালঃ সাম্না চোগ্রেণ চ স্বয়ম্
পর্যপৃচ্ছত্সুহৃদ্বর্গং প্রত্যজানন্ন চৈব তে
122.18
আনাহার্তং ততো দৃষ্ট্বা তত্সৈন্যমসুখার্দিতম্
পিতরং দুঃখিতং চাপি সুকন্যেদমথাব্রবীৎ
122.19
ময়াটন্ত্যেহ বল্মীকে দৃষ্টং সত্ত্বমভিজ্বলৎ
খদ্যোতবদভিজ্ঞাতং তন্ময়া বিদ্ধমন্তিকাৎ
122.20
এতচ্ছ্রুত্বা তু শর্যাতির্বল্মীকং তূর্ণমাদ্রবৎ
তত্রাপশ্যত্তপোবৃদ্ধং বয়োবৃদ্ধং চ ভার্গবম্
122.21
অয়াচদথ সৈন্যার্থং প্রাঞ্জলিঃ পৃথিবীপতিঃ
অজ্ঞানাদ্বালয়া যত্তে কৃতং তত্ক্ষন্তুমর্হসি
122.22
ততোঽব্রবীন্মহীপালং চ্যবনো ভার্গবস্তদা
রূপৌদার্যসমায়ুক্তাং লোভমোহবলাত্কৃতাম্
122.23
তামেব প্রতিগৃহ্যাহং রাজন্দুহিতরং তব
ক্ষমিষ্যামি মহীপাল সত্যমেতদ্ব্রবীমি তে
122.24
ঋষের্বচনমাজ্ঞায় শর্যাতিরবিচারয়ন্
দদৌ দুহিতরং তস্মৈ চ্যবনায় মহাত্মনে
122.25
প্রতিগৃহ্য চ তাং কন্যাং চ্যবনঃ প্রসসাদ হ
প্রাপ্তপ্রসাদো রাজা স সসৈন্যঃ পুনরাব্রজৎ
122.26
সুকন্যাপি পতিং লব্ধ্বা তপস্বিনমনিন্দিতা
নিত্যং পর্যচরত্প্রীত্যা তপসা নিয়মেন চ
122.27
অগ্নীনামতিথীনাং চ শুশ্রূষুরনসূয়িকা
সমারাধয়ত ক্ষিপ্রং চ্যবনং সা শুভাননা