অধ্যায় 121

121.1

লোমশ উবাচ
নৃগেণ যজমানেন সোমেনেহ পুরংদরঃ
তর্পিতঃ শ্রূয়তে রাজন্স তৃপ্তো মদমভ্যগাৎ

ইহ দেবৈঃ সহেন্দ্রৈর্হি প্রজাপতিভিরেব চ
ইষ্টং বহুবিধৈর্যজ্ঞৈর্মহদ্ভির্ভূরিদক্ষিণৈঃ

আমূর্তরয়সশ্চেহ রাজা বজ্রধরং প্রভুম্
তর্পয়ামাস সোমেন হয়মেধেষু সপ্তসু

তস্য সপ্তসু যজ্ঞেষু সর্বমাসীদ্ধিরণ্ময়ম্
বানস্পত্যং চ ভৌমং চ যদ্দ্রব্যং নিয়তং মখে

তেষ্বেব চাস্য যজ্ঞেষু প্রয়োগাঃ সপ্ত বিশ্রুতাঃ
সপ্তৈকৈকস্য যূপস্য চষালাশ্চোপরি স্থিতাঃ

তস্য স্ম যূপান্যজ্ঞেষু ভ্রাজমানান্হিরণ্ময়ান্
স্বয়মুত্থাপয়ামাসুর্দেবাঃ সেন্দ্রা যুধিষ্ঠির

তেষু তস্য মখাগ্র্যেষু গয়স্য পৃথিবীপতেঃ
অমাদ্যদিন্দ্রঃ সোমেন দক্ষিণাভির্দ্বিজাতয়ঃ

সিকতা বা যথা লোকে যথা বা দিবি তারকাঃ
যথা বা বর্ষতো ধারা অসংখ্যেয়াশ্চ কেনচিৎ

তথৈব তদসংখ্যেয়ং ধনং যত্প্রদদৌ গয়ঃ
সদস্যেভ্যো মহারাজ তেষু যজ্ঞেষু সপ্তসু

ভবেত্সংখ্যেয়মেতদ্বৈ যদেতত্পরিকীর্তিতম্
ন সা শক্যা তু সংখ্যাতুং দক্ষিণা দক্ষিণাবতঃ

হিরণ্ময়ীভির্গোভিশ্চ কৃতাভির্বিশ্বকর্মণা
ব্রাহ্মণাংস্তর্পয়ামাস নানাদিগ্ভ্যঃ সমাগতান্

অল্পাবশেষা পৃথিবী চৈত্যৈরাসীন্মহাত্মনঃ
গয়স্য যজমানস্য তত্র তত্র বিশাং পতে

স লোকান্প্রাপ্তবানৈন্দ্রান্কর্মণা তেন ভারত
সলোকতাং তস্য গচ্ছেত্পয়োষ্ণ্যাং য উপস্পৃশেৎ

তস্মাত্ত্বমত্র রাজেন্দ্র ভ্রাতৃভিঃ সহিতোঽনঘ
উপস্পৃশ্য মহীপাল ধূতপাপ্মা ভবিষ্যসি

বৈশংপায়ন উবাচ
স পয়োষ্ণ্যাং নরশ্রেষ্ঠঃ স্নাত্বা বৈ ভ্রাতৃভিঃ সহ
বৈডূর্যপর্বতং চৈব নর্মদাং চ মহানদীম্
সমাজগাম তেজস্বী ভ্রাতৃভিঃ সহিতোঽনঘঃ

ততোঽস্য সর্বাণ্যাচখ্যৌ লোমশো ভগবানৃষিঃ
তীর্থানি রমণীয়ানি তত্র তত্র বিশাং পতে

যথায়োগং যথাপ্রীতি প্রয়য়ৌ ভ্রাতৃভিঃ সহ
দদমানোঽসকৃদ্বিত্তং ব্রাহ্মণেভ্যঃ সহস্রশঃ

লোমশ উবাচ
দেবানামেতি কৌন্তেয় তথা রাজ্ঞাং সলোকতাম্
বৈডূর্যপর্বতং দৃষ্ট্বা নর্মদামবতীর্য চ

সংধিরেষ নরশ্রেষ্ঠ ত্রেতায়া দ্বাপরস্য চ
এতমাসাদ্য কৌন্তেয় সর্বপাপৈঃ প্রমুচ্যতে

এষ শর্যাতিয়জ্ঞস্য দেশস্তাত প্রকাশতে
সাক্ষাদ্যত্রাপিবত্সোমমশ্বিভ্যাং সহ কৌশিকঃ

চুকোপ ভার্গবশ্চাপি মহেন্দ্রস্য মহাতপাঃ
সংস্তম্ভয়ামাস চ তং বাসবং চ্যবনঃ প্রভুঃ
সুকন্যাং চাপি ভার্যাং স রাজপুত্রীমিবাপ্তবান্

যুধিষ্ঠির উবাচ
কথং বিষ্টম্ভিতস্তেন ভগবান্পাকশাসনঃ
কিমর্থং ভার্গবশ্চাপি কোপং চক্রে মহাতপাঃ

নাসত্যৌ চ কথং ব্রহ্মন্কৃতবান্সোমপীথিনৌ
এতত্সর্বং যথাবৃত্তমাখ্যাতু ভগবান্মম