Utshovঅধ্যায় 120
120.1
সাত্যকিরুবাচ
ন রাম কালঃ পরিদেবনায়; যদুত্তরং তত্র তদেব সর্বে
সমাচরামো হ্যনতীতকালং; যুধিষ্ঠিরো যদ্যপি নাহ কিংচিৎ
120.2
যে নাথবন্তো হি ভবন্তি লোকে; তে নাত্মনা কর্ম সমারভন্তে
তেষাং তু কার্যেষু ভবন্তি নাথাঃ; শৈব্যাদয়ো রাম যথা যয়াতেঃ
120.3
যেষাং তথা রাম সমারভন্তে; কার্যাণি নাথাঃ স্বমতেন লোকে
তে নাথবন্তঃ পুরুষপ্রবীরা; নানাথবত্কৃচ্ছ্রমবাপ্নুবন্তি
120.4
কস্মাদয়ং রামজনার্দনৌ চ; প্রদ্যুম্নসাম্বৌ চ ময়া সমেতৌ
বসত্যরণ্যে সহ সোদরীয়ৈ;স্ত্রৈলোক্যনাথানধিগম্য নাথান্
120.5
নির্যাতু সাধ্বদ্য দশার্হসেনা; প্রভূতনানায়ুধচিত্রবর্মা
যমক্ষয়ং গচ্ছতু ধার্তরাষ্ট্রঃ; সবান্ধবো বৃষ্ণিবলাভিভূতঃ
120.6
ত্বং হ্যেব কোপাত্পৃথিবীমপীমাং; সংবেষ্টয়েস্তিষ্ঠতু শার্ঙ্গধন্বা
স ধার্তরাষ্ট্রং জহি সানুবন্ধং; বৃত্রং যথা দেবপতির্মহেন্দ্রঃ
120.7
ভ্রাতা চ মে যশ্চ সখা গুরুশ্চ; জনার্দনস্যাত্মসমশ্চ পার্থঃ
যদর্থমভ্যুদ্যতমুত্তমং ত;ত্করোতি কর্মাগ্র্যমপারণীয়ম্
120.8
তস্যাস্ত্রবর্ষাণ্যহমুত্তমাস্ত্রৈ;র্বিহত্য সর্বাণি রণেঽভিভূয়
কায়াচ্ছিরঃ সর্পবিষাগ্নিকল্পৈঃ; শরোত্তমৈরুন্মথিতাস্মি রাম
120.9
খড্গেন চাহং নিশিতেন সংখ্যে; কায়াচ্ছিরস্তস্য বলাত্প্রমথ্য
ততোঽস্য সর্বাননুগান্হনিষ্যে; দুর্যোধনং চাপি কুরূংশ্চ সর্বান্
120.10
আত্তায়ুধং মামিহ রৌহিণেয়; পশ্যন্তু ভৌমা যুধি জাতহর্ষাঃ
নিঘ্নন্তমেকং কুরুয়োধমুখ্যা;ন্কালে মহাকক্ষমিবান্তকাগ্নিঃ
120.11
প্রদ্যুম্নমুক্তান্নিশিতান্ন শক্তাঃ; সোঢুং কৃপদ্রোণবিকর্ণকর্ণাঃ
জানামি বীর্যং চ তবাত্মজস্য; কার্ষ্ণির্ভবত্যেষ যথা রণস্থঃ
120.12
সাম্বঃ সসূতং সরথং ভুজাভ্যাং; দুঃশাসনং শাস্তু বলাত্প্রমথ্য
ন বিদ্যতে জাম্ববতীসুতস্য; রণেঽবিষহ্যং হি রণোত্কটস্য
120.13
এতেন বালেন হি শম্বরস্য; দৈত্যস্য সৈন্যং সহসা প্রণুন্নম্
বৃত্তোরুরত্যায়তপীনবাহু;রেতেন সংখ্যে নিহতোঽশ্বচক্রঃ
কো নাম সাম্বস্য রণে মনুষ্যো; গত্বান্তরং বৈ ভুজয়োর্ধরেত
120.14
যথা প্রবিশ্যান্তরমন্তকস্য; কালে মনুষ্যো ন বিনিষ্ক্রমেত
তথা প্রবিশ্যান্তরমস্য সংখ্যে; কো নাম জীবন্পুনরাব্রজেত
120.15
দ্রোণং চ ভীষ্মং চ মহারথৌ তৌ; সুতৈর্বৃতং চাপ্যথ সোমদত্তম্
সর্বাণি সৈন্যানি চ বাসুদেবঃ; প্রধক্ষ্যতে সায়কবহ্নিজালৈঃ
120.16
কিং নাম লোকেষ্ববিষহ্যমস্তি; কৃষ্ণস্য সর্বেষু সদৈবতেষু
আত্তায়ুধস্যোত্তমবাণপাণে;শ্চক্রায়ুধস্যাপ্রতিমস্য যুদ্ধে
120.17
ততোঽনিরুদ্ধোঽপ্যসিচর্মপাণি;র্মহীমিমাং ধার্তরাষ্ট্রৈর্বিসংজ্ঞৈঃ
হৃতোত্তমাঙ্গৈর্নিহতৈঃ করোতু; কীর্ণাং কুশৈর্বেদিমিবাধ্বরেষু
120.18
গদোল্মুকৌ বাহুকভানুনীথাঃ; শূরশ্চ সংখ্যে নিশঠঃ কুমারঃ
রণোত্কটৌ সারণচারুদেষ্ণৌ; কুলোচিতং বিপ্রথয়ন্তু কর্ম
120.19
সবৃষ্ণিভোজান্ধকয়োধমুখ্যা; সমাগতা ক্ষত্রিয়শূরসেনা
হত্বা রণে তান্ধৃতরাষ্ট্রপুত্রাঁ;ল্লোকে যশঃ স্ফীতমুপাকরোতু
120.20
ততোঽভিমন্যুঃ পৃথিবীং প্রশাস্তু; যাবদ্ব্রতং ধর্মভৃতাং বরিষ্ঠঃ
যুধিষ্ঠিরঃ পারয়তে মহাত্মা; দ্যূতে যথোক্তং কুরুসত্তমেন
120.21
অস্মত্প্রমুক্তৈর্বিশিখৈর্জিতারি;স্ততো মহীং ভোক্ষ্যতি ধর্মরাজঃ
নির্ধার্তরাষ্ট্রাং হতসূতপুত্রা;মেতদ্ধি নঃ কৃত্যতমং যশস্যম্
120.22
বাসুদেব উবাচ
অসংশয়ং মাধব সত্যমেত;দ্গৃহ্ণীম তে বাক্যমদীনসত্ত্ব
স্বাভ্যাং ভুজাভ্যামজিতাং তু ভূমিং; নেচ্ছেত্কুরূণামৃষভঃ কথংচিৎ
120.23
ন হ্যেষ কামান্ন ভয়ান্ন লোভা;দ্যুধিষ্ঠিরো জাতু জহ্যাত্স্বধর্মম্
ভীমার্জুনৌ চাতিরথৌ যমৌ বা; তথৈব কৃষ্ণা দ্রুপদাত্মজেয়ম্
120.24
উভৌ হি যুদ্ধেঽপ্রতিমৌ পৃথিব্যাং; বৃকোদরশ্চৈব ধনংজয়শ্চ
কস্মান্ন কৃত্স্নাং পৃথিবীং প্রশাসে;ন্মাদ্রীসুতাভ্যাং চ পুরস্কৃতোঽয়ম্
120.25
যদা তু পাঞ্চালপতির্মহাত্মা; সকেকয়শ্চেদিপতির্বয়ং চ
যোত্স্যাম বিক্রম্য পরাংস্তদা বৈ; সুয়োধনস্ত্যক্ষ্যতি জীবলোকম্
120.26
যুধিষ্ঠির উবাচ
নৈতচ্চিত্রং মাধব যদ্ব্রবীষি; সত্যং তু মে রক্ষ্যতমং ন রাজ্যম্
কৃষ্ণস্তু মাং বেদ যথাবদেকঃ; কৃষ্ণং চ বেদাহমথো যথাবৎ
120.27
যদৈব কালং পুরুষপ্রবীরো; বেত্স্যত্যয়ং মাধব বিক্রমস্য
তদা রণে ত্বং চ শিনিপ্রবীর; সুয়োধনং জেষ্যসি কেশবশ্চ
120.28
প্রতিপ্রয়ান্ত্বদ্য দশার্হবীরা; দৃঢোঽস্মি নাথৈর্নরলোকনাথৈঃ
ধর্মেঽপ্রমাদং কুরুতাপ্রমেয়া; দ্রষ্টাস্মি ভূয়ঃ সুখিনঃ সমেতান্
120.29
বৈশংপায়ন উবাচ
তেঽন্যোন্যমামন্ত্র্য তথাভিবাদ্য; বৃদ্ধান্পরিষ্বজ্য শিশূংশ্চ সর্বান্
যদুপ্রবীরাঃ স্বগৃহাণি জগ্মূ; রাজাপি তীর্থান্যনুসংচচার
120.30
বিসৃজ্য কৃষ্ণং ত্বথ ধর্মরাজো; বিদর্ভরাজোপচিতাং সুতীর্থাম্
সুতেন সোমেন বিমিশ্রিতোদাং; ততঃ পয়োষ্ণীং প্রতি স হ্যুবাস