অধ্যায় 119

119.1

জনমেজয় উবাচ
প্রভাসতীর্থং সংপ্রাপ্য বৃষ্ণয়ঃ পাণ্ডবাস্তথা
কিমকুর্বন্কথাশ্চৈষাং কাস্তত্রাসংস্তপোধন

তে হি সর্বে মহাত্মানঃ সর্বশাস্ত্রবিশারদাঃ
বৃষ্ণয়ঃ পাণ্ডবাশ্চৈব সুহৃদশ্চ পরস্পরম্

বৈশংপায়ন উবাচ
প্রভাসতীর্থং সংপ্রাপ্য পুণ্যং তীর্থং মহোদধেঃ
বৃষ্ণয়ঃ পাণ্ডবান্বীরান্পরিবার্যোপতস্থিরে

ততো গোক্ষীরকুন্দেন্দুমৃণালরজতপ্রভঃ
বনমালী হলী রামো বভাষে পুষ্করেক্ষণম্

ন কৃষ্ণ ধর্মশ্চরিতো ভবায়; জন্তোরধর্মশ্চ পরাভবায়
যুধিষ্ঠিরো যত্র জটী মহাত্মা; বনাশ্রয়ঃ ক্লিশ্যতি চীরবাসাঃ

দুর্যোধনশ্চাপি মহীং প্রশাস্তি; ন চাস্য ভূমির্বিবরং দদাতি
ধর্মাদধর্মশ্চরিতো গরীয়া;নিতীব মন্যেত নরোঽল্পবুদ্ধিঃ

দুর্যোধনে চাপি বিবর্ধমানে; যুধিষ্ঠিরে চাসুখ আত্তরাজ্যে
কিং ন্বদ্য কর্তব্যমিতি প্রজাভিঃ; শঙ্কা মিথঃ সংজনিতা নরাণাম্

অয়ং হি ধর্মপ্রভবো নরেন্দ্রো; ধর্মে রতঃ সত্যধৃতিঃ প্রদাতা
চলেদ্ধি রাজ্যাচ্চ সুখাচ্চ পার্থো; ধর্মাদপেতশ্চ কথং বিবর্ধেৎ

কথং নু ভীষ্মশ্চ কৃপশ্চ বিপ্রো; দ্রোণশ্চ রাজা চ কুলস্য বৃদ্ধঃ
প্রব্রাজ্য পার্থান্সুখমাপ্নুবন্তি; ধিক্পাপবুদ্ধীন্ভরতপ্রধানান্

কিং নাম বক্ষ্যত্যবনিপ্রধানঃ; পিতৄন্সমাগম্য পরত্র পাপঃ
পুত্রেষু সম্যক্চরিতং ময়েতি; পুত্রানপাপানবরোপ্য রাজ্যাৎ

নাসৌ ধিয়া সংপ্রতিপশ্যতি স্ম; কিং নাম কৃত্বাহমচক্ষুরেবম্
জাতঃ পৃথিব্যামিতি পার্থিবেষু; প্রব্রাজ্য কৌন্তেয়মথাপি রাজ্যাৎ

নূনং সমৃদ্ধান্পিতৃলোকভূমৌ; চামীকরাভান্ক্ষিতিজান্প্রফুল্লান্
বিচিত্রবীর্যস্য সুতঃ সপুত্রঃ; কৃত্বা নৃশংসং বত পশ্যতি স্ম

ব্যূঢোত্তরাংসান্পৃথুলোহিতাক্ষা;ন্নেমান্স্ম পৃচ্ছন্স শৃণোতি নূনম্
প্রস্থাপয়দ্যত্স বনং হ্যশঙ্কো; যুধিষ্ঠিরং সানুজমাত্তশস্ত্রম্

যোঽয়ং পরেষাং পৃতনাং সমৃদ্ধাং; নিরায়ুধো দীর্ঘভুজো নিহন্যাৎ
শ্রুত্বৈব শব্দং হি বৃকোদরস্য; মুঞ্চন্তি সৈন্যানি শকৃত্সমূত্রম্

স ক্ষুত্পিপাসাধ্বকৃশস্তরস্বী; সমেত্য নানায়ুধবাণপাণিঃ
বনে স্মরন্বাসমিমং সুঘোরং; শেষং ন কুর্যাদিতি নিশ্চিতং মে

ন হ্যস্য বীর্যেণ বলেন কশ্চি;ত্সমঃ পৃথিব্যাং ভবিতা নরেষু
শীতোষ্ণবাতাতপকর্শিতাঙ্গো; ন শেষমাজাবসুহৃত্সু কুর্যাৎ

প্রাচ্যাং নৃপানেকরথেন জিত্বা; বৃকোদরঃ সানুচরান্রণেষু
স্বস্ত্যাগমদ্যোঽতিরথস্তরস্বী; সোঽয়ং বনে ক্লিশ্যতি চীরবাসাঃ

যো দন্তকূরে ব্যজয়ন্নৃদেবা;ন্সমাগতান্দাক্ষিণাত্যান্মহীপান্
তং পশ্যতেমং সহদেবমদ্য; তপস্বিনং তাপসবেষরূপম্

যঃ পার্থিবানেকরথেন বীরো; দিশং প্রতীচীং প্রতি যুদ্ধশৌণ্ডঃ
সোঽয়ং বনে মূলফলেন জীব;ঞ্জটী চরত্যদ্য মলাচিতাঙ্গঃ

সত্রে সমৃদ্ধেঽতি রথস্য রাজ্ঞো; বেদীতলাদুত্পতিতা সুতা যা
সেয়ং বনে বাসমিমং সুদুঃখং; কথং সহত্যদ্য সতী সুখার্হা

ত্রিবর্গমুখ্যস্য সমীরণস্য; দেবেশ্বরস্যাপ্যথ বাশ্বিনোশ্চ
এষাং সুরাণাং তনয়াঃ কথং নু; বনে চরন্ত্যল্পসুখাঃ সুখার্হাঃ

জিতে হি ধর্মস্য সুতে সভার্যে; সভ্রাতৃকে সানুচরে নিরস্তে
দুর্যোধনে চাপি বিবর্ধমানে; কথং ন সীদত্যবনিঃ সশৈলা