অধ্যায় 118

118.1

বৈশংপায়ন উবাচ
গচ্ছন্স তীর্থানি মহানুভাবঃ; পুণ্যানি রম্যাণি দদর্শ রাজা
সর্বাণি বিপ্রৈরুপশোভিতানি; ক্বচিত্ক্বচিদ্ভারত সাগরস্য

স বৃত্তবাংস্তেষু কৃতাভিষেকঃ; সহানুজঃ পার্থিবপুত্রপৌত্রঃ
সমুদ্রগাং পুণ্যতমাং প্রশস্তাং; জগাম পারিক্ষিত পাণ্ডুপুত্রঃ

তত্রাপি চাপ্লুত্য মহানুভাবঃ; সংতর্পয়ামাস পিতৄন্সুরাংশ্চ
দ্বিজাতিমুখ্যেষু ধনং বিসৃজ্য; গোদাবরীং সাগরগামগচ্ছৎ

ততো বিপাপ্মা দ্রবিডেষু রাজ;ন্সমুদ্রমাসাদ্য চ লোকপুণ্যম্
অগস্ত্যতীর্থং চ পবিত্রপুণ্যং; নারীতীর্থান্যথ বীরো দদর্শ

তত্রার্জুনস্যাগ্র্যধনুর্ধরস্য; নিশম্য তত্কর্ম পরৈরসহ্যম্
সংপূজ্যমানঃ পরমর্ষিসংঘৈঃ; পরাং মুদং পাণ্ডুসুতঃ স লেভে

স তেষু তীর্থেষ্বভিষিক্তগাত্রঃ; কৃষ্ণাসহায়ঃ সহিতোঽনুজৈশ্চ
সংপূজয়ন্বিক্রমমর্জুনস্য; রেমে মহীপালপতিঃ পৃথিব্যাম্

ততঃ সহস্রাণি গবাং প্রদায়; তীর্থেষু তেষ্বম্বুধরোত্তমস্য
হৃষ্টঃ সহ ভ্রাতৃভিরর্জুনস্য; সংকীর্তয়ামাস গবাং প্রদানম্

স তানি তীর্থানি চ সাগরস্য; পুণ্যানি চান্যানি বহূনি রাজন্
ক্রমেণ গচ্ছন্পরিপূর্ণকামঃ; শূর্পারকং পুণ্যতমং দদর্শ

তত্রোদধেঃ কংচিদতীত্য দেশং; খ্যাতং পৃথিব্যাং বনমাসসাদ
তপ্তং সুরৈর্যত্র তপঃ পুরস্তা;দিষ্টং তথা পুণ্যতমৈর্নরেন্দ্রৈঃ

স তত্র তামগ্র্যধনুর্ধরস্য; বেদীং দদর্শায়তপীনবাহুঃ
ঋচীকপুত্রস্য তপস্বিসংঘৈঃ; সমাবৃতাং পুণ্যকৃদর্চনীয়াম্

ততো বসূনাং বসুধাধিপঃ স; মরুদ্গণানাং চ তথাশ্বিনোশ্চ
বৈবস্বতাদিত্যধনেশ্বরাণা;মিন্দ্রস্য বিষ্ণোঃ সবিতুর্বিভোশ্চ

ভগস্য চন্দ্রস্য দিবাকরস্য; পতেরপাং সাধ্যগণস্য চৈব
ধাতুঃ পিতৄণাং চ তথা মহাত্মা; রুদ্রস্য রাজন্সগণস্য চৈব

সরস্বত্যাঃ সিদ্ধগণস্য চৈব; পূষ্ণশ্চ যে চাপ্যমরাস্তথান্যে
পুণ্যানি চাপ্যায়তনানি তেষাং; দদর্শ রাজা সুমনোহরাণি

তেষূপবাসান্বিবিধানুপোষ্য; দত্ত্বা চ রত্নানি মহাধনানি
তীর্থেষু সর্বেষু পরিপ্লুতাঙ্গঃ; পুনঃ স শূর্পারকমাজগাম

স তেন তীর্থেন তু সাগরস্য; পুনঃ প্রয়াতঃ সহ সোদরীয়ৈঃ
দ্বিজৈঃ পৃথিব্যাং প্রথিতং মহদ্ভি;স্তীর্থং প্রভাসং সমুপাজগাম

তত্রাভিষিক্তঃ পৃথুলোহিতাক্ষঃ; সহানুজৈর্দেবগণান্পিতৄংশ্চ
সংতর্পয়ামাস তথৈব কৃষ্ণা; তে চাপি বিপ্রাঃ সহ লোমশেন

স দ্বাদশাহং জলবায়ুভক্ষঃ; কুর্বন্ক্ষপাহঃসু তদাভিষেকম্
সমন্ততোঽগ্নীনুপদীপয়িত্বা; তেপে তপো ধর্মভৃতাং বরিষ্ঠঃ

তমুগ্রমাস্থায় তপশ্চরন্তং; শুশ্রাব রামশ্চ জনার্দনশ্চ
তৌ সর্ববৃষ্ণিপ্রবরৌ সসৈন্যৌ; যুধিষ্ঠিরং জগ্মতুরাজমীঢম্

তে বৃষ্ণয়ঃ পাণ্ডুসুতান্সমীক্ষ্য; ভূমৌ শয়ানান্মলদিগ্ধগাত্রান্
অনর্হতীং দ্রৌপদীং চাপি দৃষ্ট্বা; সুদুঃখিতাশ্চুক্রুশুরার্তনাদম্

ততঃ স রামং চ জনার্দনং চ; কার্ষ্ণিং চ সাম্বং চ শিনেশ্চ পৌত্রম্
অন্যাংশ্চ বৃষ্ণীনুপগম্য পূজাং; চক্রে যথাধর্মমদীনসত্ত্বঃ

তে চাপি সর্বান্প্রতিপূজ্য পার্থাং;স্তৈঃ সত্কৃতাঃ পাণ্ডুসুতৈস্তথৈব
যুধিষ্ঠিরং সংপরিবার্য রাজ;ন্নুপাবিশন্দেবগণা যথেন্দ্রম্

তেষাং স সর্বং চরিতং পরেষাং; বনে চ বাসং পরমপ্রতীতঃ
অস্ত্রার্থমিন্দ্রস্য গতং চ পার্থং; কৃষ্ণে শশংসামররাজপুত্রম্

শ্রুত্বা তু তে তস্য বচঃ প্রতীতা;স্তাংশ্চাপি দৃষ্ট্বা সুকৃশানতীব
নেত্রোদ্ভবং সংমুমুচুর্দশার্হা; দুঃখার্তিজং বারি মহানুভাবাঃ