অধ্যায় 117

117.1

রাম উবাচ
মমাপরাধাত্তৈঃ ক্ষুদ্রৈর্হতস্ত্বং তাত বালিশৈঃ
কার্তবীর্যস্য দায়াদৈর্বনে মৃগ ইবেষুভিঃ

ধর্মজ্ঞস্য কথং তাত বর্তমানস্য সত্পথে
মৃত্যুরেবংবিধো যুক্তঃ সর্বভূতেষ্বনাগসঃ

কিং নু তৈর্ন কৃতং পাপং যৈর্ভবাংস্তপসি স্থিতঃ
অয়ুধ্যমানো বৃদ্ধঃ সন্হতঃ শরশতৈঃ শিতৈঃ

কিং নু তে তত্র বক্ষ্যন্তি সচিবেষু সুহৃত্সু চ
অয়ুধ্যমানং ধর্মজ্ঞমেকং হত্বানপত্রপাঃ

অকৃতব্রণ উবাচ
বিলপ্যৈবং স করুণং বহু নানাবিধং নৃপ
প্রেতকার্যাণি সর্বাণি পিতুশ্চক্রে মহাতপাঃ

দদাহ পিতরং চাগ্নৌ রামঃ পরপুরংজয়ঃ
প্রতিজজ্ঞে বধং চাপি সর্বক্ষত্রস্য ভারত

সংক্রুদ্ধোঽতিবলঃ শূরঃ শস্ত্রমাদায় বীর্যবান্
জঘ্নিবান্কার্তবীর্যস্য সুতানেকোঽন্তকোপমঃ

তেষাং চানুগতা যে চ ক্ষত্রিয়াঃ ক্ষত্রিয়র্ষভ
তাংশ্চ সর্বানবামৃদ্নাদ্রামঃ প্রহরতাং বরঃ

ত্রিঃসপ্তকৃত্বঃ পৃথিবীং কৃত্বা নিঃক্ষত্রিয়াং প্রভুঃ
সমন্তপঞ্চকে পঞ্চ চকার রুধিরহ্রদান্

স তেষু তর্পয়ামাস পিতৄন্ভৃগুকুলোদ্বহঃ
সাক্ষাদ্দদর্শ চর্চীকং স চ রামং ন্যবারয়ৎ

ততো যজ্ঞেন মহতা জামদগ্ন্যঃ প্রতাপবান্
তর্পয়ামাস দেবেন্দ্রমৃত্বিগ্ভ্যশ্চ মহীং দদৌ

বেদীং চাপ্যদদদ্ধৈমীং কশ্যপায় মহাত্মনে
দশব্যামায়তাং কৃত্বা নবোত্সেধাং বিশাং পতে

তাং কশ্যপস্যানুমতে ব্রাহ্মণাঃ খণ্ডশস্তদা
ব্যভজংস্তেন তে রাজন্প্রখ্যাতাঃ খাণ্ডবায়নাঃ

স প্রদায় মহীং তস্মৈ কশ্যপায় মহাত্মনে
অস্মিন্মহেন্দ্রে শৈলেন্দ্রে বসত্যমিতবিক্রমঃ

এবং বৈরমভূত্তস্য ক্ষত্রিয়ৈর্লোকবাসিভিঃ
পৃথিবী চাপি বিজিতা রামেণামিততেজসা

বৈশংপায়ন উবাচ
ততশ্চতুর্দশীং রামঃ সময়েন মহামনাঃ
দর্শয়ামাস তান্বিপ্রান্ধর্মরাজং চ সানুজম্

স তমানর্চ রাজেন্দ্রো ভ্রাতৃভিঃ সহিতঃ প্রভুঃ
দ্বিজানাং চ পরাং পূজাং চক্রে নৃপতিসত্তমঃ

অর্চয়িত্বা জামদগ্ন্যং পূজিতস্তেন চাভিভূঃ
মহেন্দ্র উষ্য তাং রাত্রিং প্রয়য়ৌ দক্ষিণামুখঃ