Utshovঅধ্যায় 116
116.1
অকৃতব্রণ উবাচ
স বেদাধ্যয়নে যুক্তো জমদগ্নির্মহাতপাঃ
তপস্তেপে ততো দেবান্নিয়মাদ্বশমানয়ৎ
116.2
স প্রসেনজিতং রাজন্নধিগম্য নরাধিপম্
রেণুকাং বরয়ামাস স চ তস্মৈ দদৌ নৃপঃ
116.3
রেণুকাং ত্বথ সংপ্রাপ্য ভার্যাং ভার্গবনন্দনঃ
আশ্রমস্থস্তয়া সার্ধং তপস্তেপেঽনুকূলয়া
116.4
তস্যাঃ কুমারাশ্চত্বারো জজ্ঞিরে রামপঞ্চমাঃ
সর্বেষামজঘন্যস্তু রাম আসীজ্জঘন্যজঃ
116.5
ফলাহারেষু সর্বেষু গতেষ্বথ সুতেষু বৈ
রেণুকা স্নাতুমগমত্কদাচিন্নিয়তব্রতা
116.6
সা তু চিত্ররথং নাম মার্ত্তিকাবতকং নৃপম্
দদর্শ রেণুকা রাজন্নাগচ্ছন্তী যদৃচ্ছয়া
116.7
ক্রীডন্তং সলিলে দৃষ্ট্বা সভার্যং পদ্মমালিনম্
ঋদ্ধিমন্তং ততস্তস্য স্পৃহয়ামাস রেণুকা
116.8
ব্যভিচারাত্তু সা তস্মাত্ক্লিন্নাম্ভসি বিচেতনা
প্রবিবেশাশ্রমং ত্রস্তা তাং বৈ ভর্তান্ববুধ্যত
116.9
স তাং দৃষ্ট্বা চ্যুতাং ধৈর্যাদ্ব্রাহ্ম্যা লক্ষ্ম্যা বিবর্জিতাম্
ধিক্শব্দেন মহাতেজা গর্হয়ামাস বীর্যবান্
116.10
ততো জ্যেষ্ঠো জামদগ্ন্যো রুমণ্বান্নাম নামতঃ
আজগাম সুষেণশ্চ বসুর্বিশ্বাবসুস্তথা
116.11
তানানুপূর্ব্যাদ্ভগবান্বধে মাতুরচোদয়ৎ
ন চ তে জাতসংমোহাঃ কিংচিদূচুর্বিচেতসঃ
116.12
ততঃ শশাপ তান্কোপাত্তে শপ্তাশ্চেতনাং জহুঃ
মৃগপক্ষিসধর্মাণঃ ক্ষিপ্রমাসঞ্জডোপমাঃ
116.13
ততো রামোঽভ্যগাত্পশ্চাদাশ্রমং পরবীরহা
তমুবাচ মহামন্যুর্জমদগ্নির্মহাতপাঃ
116.14
জহীমাং মাতরং পাপাং মা চ পুত্র ব্যথাং কৃথাঃ
তত আদায় পরশুং রামো মাতুঃ শিরোঽহরৎ
116.15
ততস্তস্য মহারাজ জমদগ্নের্মহাত্মনঃ
কোপো অগচ্ছত্সহসা প্রসন্নশ্চাব্রবীদিদম্
116.16
মমেদং বচনাত্তাত কৃতং তে কর্ম দুষ্করম্
বৃণীষ্ব কামান্ধর্মজ্ঞ যাবতো বাঞ্ছসে হৃদা
116.17
স বব্রে মাতুরুত্থানমস্মৃতিং চ বধস্য বৈ
পাপেন তেন চাস্পর্শং ভ্রাতৄণাং প্রকৃতিং তথা
116.18
অপ্রতিদ্বন্দ্বতাং যুদ্ধে দীর্ঘমায়ুশ্চ ভারত
দদৌ চ সর্বান্কামাংস্তাঞ্জমদগ্নির্মহাতপাঃ
116.19
কদাচিত্তু তথৈবাস্য বিনিষ্ক্রান্তাঃ সুতাঃ প্রভো
অথানূপপতির্বীরঃ কার্তবীর্যোঽভ্যবর্তত
116.20
তমাশ্রমপদং প্রাপ্তমৃষের্ভার্যা সমর্চয়ৎ
স যুদ্ধমদসংমত্তো নাভ্যনন্দত্তথার্চনম্
116.21
প্রমথ্য চাশ্রমাত্তস্মাদ্ধোমধেন্বাস্তদা বলাৎ
জহার বত্সং ক্রোশন্ত্যা বভঞ্জ চ মহাদ্রুমান্
116.22
আগতায় চ রামায় তদাচষ্ট পিতা স্বয়ম্
গাং চ রোরূয়তীং দৃষ্ট্বা কোপো রামং সমাবিশৎ
116.23
স মন্যুবশমাপন্নঃ কার্তবীর্যমুপাদ্রবৎ
তস্যাথ যুধি বিক্রম্য ভার্গবঃ পরবীরহা
116.24
চিচ্ছেদ নিশিতৈর্ভল্লৈর্বাহূন্পরিঘসংনিভান্
সহস্রসংমিতান্রাজন্প্রগৃহ্য রুচিরং ধনুঃ
116.25
অর্জুনস্যাথ দায়াদা রামেণ কৃতমন্যবঃ
আশ্রমস্থং বিনা রামং জমদগ্নিমুপাদ্রবন্
116.26
তে তং জঘ্নুর্মহাবীর্যময়ুধ্যন্তং তপস্বিনম্
অসকৃদ্রাম রামেতি বিক্রোশন্তমনাথবৎ
116.27
কার্তবীর্যস্য পুত্রাস্তু জমদগ্নিং যুধিষ্ঠির
ঘাতয়িত্বা শরৈর্জগ্মুর্যথাগতমরিংদমাঃ
116.28
অপক্রান্তেষু চৈতেষু জমদগ্নৌ তথাগতে
সমিত্পাণিরুপাগচ্ছদাশ্রমং ভৃগুনন্দনঃ
116.29
স দৃষ্ট্বা পিতরং বীরস্তথা মৃত্যুবশং গতম্
অনর্হন্তং তথাভূতং বিললাপ সুদুঃখিতঃ