Utshovঅধ্যায় 115
115.1
বৈশংপায়ন উবাচ
স তত্র তামুষিত্বৈকাং রজনীং পৃথিবীপতিঃ
তাপসানাং পরং চক্রে সত্কারং ভ্রাতৃভিঃ সহ
115.2
লোমশশ্চাস্য তান্সর্বানাচখ্যৌ তত্র তাপসান্
ভৃগূনঙ্গিরসশ্চৈব বাসিষ্ঠানথ কাশ্যপান্
115.3
তান্সমেত্য স রাজর্ষিরভিবাদ্য কৃতাঞ্জলিঃ
রামস্যানুচরং বীরমপৃচ্ছদকৃতব্রণম্
115.4
কদা নু রামো ভগবাংস্তাপসান্দর্শয়িষ্যতি
তেনৈবাহং প্রসঙ্গেন দ্রষ্টুমিচ্ছামি ভার্গবম্
115.5
অকৃতব্রণ উবাচ
আয়ানেবাসি বিদিতো রামস্য বিদিতাত্মনঃ
প্রীতিস্ত্বয়ি চ রামস্য ক্ষিপ্রং ত্বাং দর্শয়িষ্যতি
115.6
চতুর্দশীমষ্টমীং চ রামং পশ্যন্তি তাপসাঃ
অস্যাং রাত্র্যাং ব্যতীতায়াং ভবিত্রী চ চতুর্দশী
115.7
যুধিষ্ঠির উবাচ
ভবাননুগতো বীরং জামদগ্ন্যং মহাবলম্
প্রত্যক্ষদর্শী সর্বস্য পূর্ববৃত্তস্য কর্মণঃ
115.8
স ভবান্কথয়ত্বেতদ্যথা রামেণ নির্জিতাঃ
আহবে ক্ষত্রিয়াঃ সর্বে কথং কেন চ হেতুনা
115.9
অকৃতব্রণ উবাচ
কন্যকুব্জে মহানাসীত্পার্থিবঃ সুমহাবলঃ
গাধীতি বিশ্রুতো লোকে বনবাসং জগাম সঃ
115.10
বনে তু তস্য বসতঃ কন্যা জজ্ঞেঽপ্সরঃসমা
ঋচীকো ভার্গবস্তাং চ বরয়ামাস ভারত
115.11
তমুবাচ ততো রাজা ব্রাহ্মণং সংশিতব্রতম্
উচিতং নঃ কুলে কিংচিত্পূর্বৈর্যত্সংপ্রবর্তিতম্
115.12
একতঃশ্যামকর্ণানাং পাণ্ডুরাণাং তরস্বিনাম্
সহস্রং বাজিনাং শুল্কমিতি বিদ্ধি দ্বিজোত্তম
115.13
ন চাপি ভগবান্বাচ্যো দীয়তামিতি ভার্গব
দেয়া মে দুহিতা চেয়ং ত্বদ্বিধায় মহাত্মনে
115.14
ঋচীক উবাচ
একতঃশ্যামকর্ণানাং পাণ্ডুরাণাং তরস্বিনাম্
দাস্যাম্যশ্বসহস্রং তে মম ভার্যা সুতাস্তু তে
115.15
অকৃতব্রণ উবাচ
স তথেতি প্রতিজ্ঞায় রাজন্বরুণমব্রবীৎ
একতঃশ্যামকর্ণানাং পাণ্ডুরাণাং তরস্বিনাম্
সহস্রং বাজিনামেকং শুল্কার্থং মে প্রদীয়তাম্
115.16
তস্মৈ প্রাদাত্সহস্রং বৈ বাজিনাং বরুণস্তদা
তদশ্বতীর্থং বিখ্যাতমুত্থিতা যত্র তে হয়াঃ
115.17
গঙ্গায়াং কন্যকুব্জে বৈ দদৌ সত্যবতীং তদা
ততো গাধিঃ সুতাং তস্মৈ জন্যাশ্চাসন্সুরাস্তদা
লব্ধ্বা হয়সহস্রং তু তাংশ্চ দৃষ্ট্বা দিবৌকসঃ
115.18
ধর্মেণ লব্ধ্বা তাং ভার্যামৃচীকো দ্বিজসত্তমঃ
যথাকামং যথাজোষং তয়া রেমে সুমধ্যয়া
115.19
তং বিবাহে কৃতে রাজন্সভার্যমবলোককঃ
আজগাম ভৃগুশ্রেষ্ঠঃ পুত্রং দৃষ্ট্বা ননন্দ চ
115.20
ভার্যাপতী তমাসীনং গুরুং সুরগণার্চিতম্
অর্চিত্বা পর্যুপাসীনৌ প্রাঞ্জলী তস্থতুস্তদা
115.21
ততঃ স্নুষাং স ভগবান্প্রহৃষ্টো ভৃগুরব্রবীৎ
বরং বৃণীষ্ব সুভগে দাতা হ্যস্মি তবেপ্সিতম্
115.22
সা বৈ প্রসাদয়ামাস তং গুরুং পুত্রকারণাৎ
আত্মনশ্চৈব মাতুশ্চ প্রসাদং চ চকার সঃ
115.23
ভৃগুরুবাচ
ঋতৌ ত্বং চৈব মাতা চ স্নাতে পুংসবনায় বৈ
আলিঙ্গেতাং পৃথগ্বৃক্ষৌ সাশ্বত্থং ত্বমুদুম্বরম্
115.24
আলিঙ্গনে তু তে রাজংশ্চক্রতুঃ স্ম বিপর্যয়ম্
কদাচিদ্ভৃগুরাগচ্ছত্তং চ বেদ বিপর্যয়ম্
115.25
অথোবাচ মহাতেজা ভৃগুঃ সত্যবতীং স্নুষাম্
ব্রাহ্মণঃ ক্ষত্রবৃত্তির্বৈ তব পুত্রো ভবিষ্যতি
115.26
ক্ষত্রিয়ো ব্রাহ্মণাচারো মাতুস্তব সুতো মহান্
ভবিষ্যতি মহাবীর্যঃ সাধূনাং মার্গমাস্থিতঃ
115.27
ততঃ প্রসাদয়ামাস শ্বশুরং সা পুনঃ পুনঃ
ন মে পুত্রো ভবেদীদৃক্কামং পৌত্রো ভবেদিতি
115.28
এবমস্ত্বিতি সা তেন পাণ্ডব প্রতিনন্দিতা
জমদগ্নিং ততঃ পুত্রং সা জজ্ঞে কাল আগতে
তেজসা বর্চসা চৈব যুক্তং ভার্গবনন্দনম্
115.29
স বর্ধমানস্তেজস্বী বেদস্যাধ্যয়নেন বৈ
বহূনৃষীন্মহাতেজাঃ পাণ্ডবেয়াত্যবর্তত
115.30
তং তু কৃত্স্নো ধনুর্বেদঃ প্রত্যভাদ্ভরতর্ষভ
চতুর্বিধানি চাস্ত্রাণি ভাস্করোপমবর্চসম্