Utshovঅধ্যায় 114
114.1
বৈশংপায়ন উবাচ
ততঃ প্রয়াতঃ কৌশিক্যাঃ পাণ্ডবো জনমেজয়
আনুপূর্ব্যেণ সর্বাণি জগামায়তনান্যুত
114.2
স সাগরং সমাসাদ্য গঙ্গায়াঃ সংগমে নৃপ
নদীশতানাং পঞ্চানাং মধ্যে চক্রে সমাপ্লবম্
114.3
ততঃ সমুদ্রতীরেণ জগাম বসুধাধিপঃ
ভ্রাতৃভিঃ সহিতো বীরঃ কলিঙ্গান্প্রতি ভারত
114.4
লোমশ উবাচ
এতে কলিঙ্গাঃ কৌন্তেয় যত্র বৈতরণী নদী
যত্রায়জত ধর্মোঽপি দেবাঞ্শরণমেত্য বৈ
114.5
ঋষিভিঃ সমুপায়ুক্তং যজ্ঞিয়ং গিরিশোভিতম্
উত্তরং তীরমেতদ্ধি সততং দ্বিজসেবিতম্
114.6
সমেন দেবয়ানেন পথা স্বর্গমুপেয়ুষঃ
অত্র বৈ ঋষয়োঽন্যেঽপি পুরা ক্রতুভিরীজিরে
114.7
অত্রৈব রুদ্রো রাজেন্দ্র পশুমাদত্তবান্মখে
রুদ্রঃ পশুং মানবেন্দ্র ভাগোঽয়মিতি চাব্রবীৎ
114.8
হৃতে পশৌ তদা দেবাস্তমূচুর্ভরতর্ষভ
মা পরস্বমভিদ্রোগ্ধা মা ধর্মান্সকলান্নশীঃ
114.9
ততঃ কল্যাণরূপাভির্বাগ্ভিস্তে রুদ্রমস্তুবন্
ইষ্ট্যা চৈনং তর্পয়িত্বা মানয়াং চক্রিরে তদা
114.10
ততঃ স পশুমুত্সৃজ্য দেবয়ানেন জগ্মিবান্
অত্রানুবংশো রুদ্রস্য তং নিবোধ যুধিষ্ঠির
114.11
অয়াতয়ামং সর্বেভ্যো ভাগেভ্যো ভাগমুত্তমম্
দেবাঃ সংকল্পয়ামাসুর্ভয়াদ্রুদ্রস্য শাশ্বতম্
114.12
ইমাং গাথামত্র গায়ন্নপঃ স্পৃশতি যো নরঃ
দেবয়ানস্তস্য পন্থাশ্চক্ষুশ্চৈব প্রকাশতে
114.13
বৈশংপায়ন উবাচ
ততো বৈতরণীং সর্বে পাণ্ডবা দ্রৌপদী তথা
অবতীর্য মহাভাগা তর্পয়াং চক্রিরে পিতৄন্
114.14
যুধিষ্ঠির উবাচ
উপস্পৃশ্যৈব ভগবন্নস্যাং নদ্যাং তপোধন
মানুষাদস্মি বিষয়াদপেতঃ পশ্য লোমশ
114.15
সর্বাঁল্লোকান্প্রপশ্যামি প্রসাদাত্তব সুব্রত
বৈখানসানাং জপতামেষ শব্দো মহাত্মনাম্
114.16
লোমশ উবাচ
ত্রিশতং বৈ সহস্রাণি যোজনানাং যুধিষ্ঠির
যত্র ধ্বনিং শৃণোষ্যেনং তূষ্ণীমাস্স্ব বিশাং পতে
114.17
এতত্স্বয়ংভুবো রাজন্বনং রম্যং প্রকাশতে
যত্রায়জত কৌন্তেয় বিশ্বকর্মা প্রতাপবান্
114.18
যস্মিন্যজ্ঞে হি ভূর্দত্তা কশ্যপায় মহাত্মনে
সপর্বতবনোদ্দেশা দক্ষিণা বৈ স্বয়ংভুবা
114.19
অবাসীদচ্চ কৌন্তেয় দত্তমাত্রা মহী তদা
উবাচ চাপি কুপিতা লোকেশ্বরমিদং প্রভুম্
114.20
ন মাং মর্ত্যায় ভগবন্কস্মৈচিদ্দাতুমর্হসি
প্রদানং মোঘমেতত্তে যাস্যাম্যেষা রসাতলম্
114.21
বিষীদন্তীং তু তাং দৃষ্ট্বা কশ্যপো ভগবানৃষিঃ
প্রসাদয়াং বভূবাথ ততো ভূমিং বিশাং পতে
114.22
ততঃ প্রসন্না পৃথিবী তপসা তস্য পাণ্ডব
পুনরুন্মজ্জ্য সলিলাদ্বেদীরূপা স্থিতা বভৌ
114.23
সৈষা প্রকাশতে রাজন্বেদী সংস্থানলক্ষণা
আরুহ্যাত্র মহারাজ বীর্যবান্বৈ ভবিষ্যসি
114.24
অহং চ তে স্বস্ত্যয়নং প্রয়োক্ষ্যে; যথা ত্বমেনামধিরোক্ষ্যসেঽদ্য
স্পৃষ্টা হি মর্ত্যেন ততঃ সমুদ্র;মেষা বেদী প্রবিশত্যাজমীঢ
114.25
অগ্নির্মিত্রো যোনিরাপোঽথ দেব্যো; বিষ্ণো রেতস্ত্বমমৃতস্য নাভিঃ
এবং ব্রুবন্পাণ্ডব সত্যবাক্যং; বেদীমিমাং ত্বং তরসাধিরোহ
114.26
বৈশংপায়ন উবাচ
ততঃ কৃতস্বস্ত্যয়নো মহাত্মা; যুধিষ্ঠিরঃ সাগরগামগচ্ছৎ
কৃত্বা চ তচ্ছাসনমস্য সর্বং; মহেন্দ্রমাসাদ্য নিশামুবাস