Utshovঅধ্যায় 113
113.1
বিভাণ্ডক উবাচ
রক্ষাংসি চৈতানি চরন্তি পুত্র; রূপেণ তেনাদ্ভুতদর্শনেন
অতুল্যরূপাণ্যতিঘোরবন্তি; বিঘ্নং সদা তপসশ্চিন্তয়ন্তি
113.2
সুরূপরূপাণি চ তানি তাত; প্রলোভয়ন্তে বিবিধৈরুপায়ৈঃ
সুখাচ্চ লোকাচ্চ নিপাতয়ন্তি; তান্যুগ্রকর্মাণি মুনীন্বনেষু
113.3
ন তানি সেবেত মুনির্যতাত্মা; সতাং লোকান্প্রার্থয়ানঃ কথংচিৎ
কৃত্বা বিঘ্নং তাপসানাং রমন্তে; পাপাচারাস্তপসস্তান্যপাপ
113.4
অসজ্জনেনাচরিতানি পুত্র; পাপান্যপেয়ানি মধূনি তানি
মাল্যানি চৈতানি ন বৈ মুনীনাং; স্মৃতানি চিত্রোজ্জ্বলগন্ধবন্তি
113.5
লোমশ উবাচ
রক্ষাংসি তানীতি নিবার্য পুত্রং; বিভাণ্ডকস্তাং মৃগয়াং বভূব
নাসাদয়ামাস যদা ত্র্যহেণ; তদা স পর্যাববৃতেঽঽশ্রমায়
113.6
যদা পুনঃ কাশ্যপো বৈ জগাম; ফলান্যাহর্তুং বিধিনা শ্রামণেন
তদা পুনর্লোভয়িতুং জগাম; সা বেশয়োষা মুনিমৃশ্যশৃঙ্গম্
113.7
দৃষ্ট্বৈব তামৃশ্যশৃঙ্গঃ প্রহৃষ্টঃ; সংভ্রান্তরূপোঽভ্যপতত্তদানীম্
প্রোবাচ চৈনাং ভবতোঽঽশ্রমায়; গচ্ছাব যাবন্ন পিতা মমৈতি
113.8
ততো রাজন্কাশ্যপস্যৈকপুত্রং; প্রবেশ্য যোগেন বিমুচ্য নাবম্
প্রলোভয়ন্ত্যো বিবিধৈরুপায়ৈ;রাজগ্মুরঙ্গাধিপতেঃ সমীপম্
113.9
সংস্থাপ্য তামাশ্রমদর্শনে তু; সংতারিতাং নাবমতীব শুভ্রাম্
তীরাদুপাদায় তথৈব চক্রে; রাজাশ্রমং নাম বনং বিচিত্রম্
113.10
অন্তঃপুরে তং তু নিবেশ্য রাজা; বিভাণ্ডকস্যাত্মজমেকপুত্রম্
দদর্শ দেবং সহসা প্রবৃষ্ট;মাপূর্যমাণং চ জগজ্জলেন
113.11
স লোমপাদঃ পরিপূর্ণকামঃ; সুতাং দদাবৃশ্যশৃঙ্গায় শান্তাম্
ক্রোধপ্রতীকারকরং চ চক্রে; গোভিশ্চ মার্গেষ্বভিকর্ষণং চ
113.12
বিভাণ্ডকস্যাব্রজতঃ স রাজা; পশূন্প্রভূতান্পশুপাংশ্চ বীরান্
সমাদিশত্পুত্রগৃদ্ধী মহর্ষি;র্বিভাণ্ডকঃ পরিপৃচ্ছেদ্যদা বঃ
113.13
স বক্তব্যঃ প্রাঞ্জলিভির্ভবদ্ভিঃ; পুত্রস্য তে পশবঃ কর্ষণং চ
কিং তে প্রিয়ং বৈ ক্রিয়তাং মহর্ষে; দাসাঃ স্ম সর্বে তব বাচি বদ্ধাঃ
113.14
অথোপায়াত্স মুনিশ্চণ্ডকোপঃ; স্বমাশ্রমং মূলফলানি গৃহ্য
অন্বেষমাণশ্চ ন তত্র পুত্রং; দদর্শ চুক্রোধ ততো ভৃশং সঃ
113.15
ততঃ স কোপেন বিদীর্যমাণ; আশঙ্কমানো নৃপতের্বিধানম্
জগাম চম্পাং প্রদিধক্ষমাণ;স্তমঙ্গরাজং বিষয়ং চ তস্য
113.16
স বৈ শ্রান্তঃ ক্ষুধিতঃ কাশ্যপস্তা;ন্ঘোষান্সমাসাদিতবান্সমৃদ্ধান্
গোপৈশ্চ তৈর্বিধিবত্পূজ্যমানো; রাজেব তাং রাত্রিমুবাস তত্র
113.17
সংপ্রাপ্য সত্কারমতীব তেভ্যঃ; প্রোবাচ কস্য প্রথিতাঃ স্থ সৌম্যাঃ
ঊচুস্ততস্তেঽভ্যুপগম্য সর্বে; ধনং তবেদং বিহিতং সুতস্য
113.18
দেশে তু দেশে তু স পূজ্যমান;স্তাংশ্চৈব শৃণ্বন্মধুরান্প্রলাপান্
প্রশান্তভূয়িষ্ঠরজাঃ প্রহৃষ্টঃ; সমাসসাদাঙ্গপতিং পুরস্থম্
113.19
সংপূজিতস্তেন নরর্ষভেণ; দদর্শ পুত্রং দিবি দেবং যথেন্দ্রম্
শান্তাং স্নুষাং চৈব দদর্শ তত্র; সৌদামিনীমুচ্চরন্তীং যথৈব
113.20
গ্রামাংশ্চ ঘোষাংশ্চ সুতং চ দৃষ্ট্বা; শান্তাং চ শান্তোঽস্য পরঃ স কোপঃ
চকার তস্মৈ পরমং প্রসাদং; বিভাণ্ডকো ভূমিপতের্নরেন্দ্র
113.21
স তত্র নিক্ষিপ্য সুতং মহর্ষি;রুবাচ সূর্যাগ্নিসমপ্রভাবম্
জাতে পুত্রে বনমেবাব্রজেথা; রাজ্ঞঃ প্রিয়াণ্যস্য সর্বাণি কৃত্বা
113.22
স তদ্বচঃ কৃতবানৃশ্যশৃঙ্গো; যয়ৌ চ যত্রাস্য পিতা বভূব
শান্তা চৈনং পর্যচরদ্যথাব;ত্খে রোহিণী সোমমিবানুকূলা
113.23
অরুন্ধতী বা সুভগা বসিষ্ঠং; লোপামুদ্রা বাপি যথা হ্যগস্ত্যম্
নলস্য বা দময়ন্তী যথাভূ;দ্যথা শচী বজ্রধরস্য চৈব
113.24
নাডায়নী চেন্দ্রসেনা যথৈব; বশ্যা নিত্যং মুদ্গলস্যাজমীঢ
তথা শান্তা ঋশ্যশৃঙ্গং বনস্থং; প্রীত্যা যুক্তা পর্যচরন্নরেন্দ্র
113.25
তস্যাশ্রমঃ পুণ্য এষো বিভাতি; মহাহ্রদং শোভয়ন্পুণ্যকীর্তেঃ
অত্র স্নাতঃ কৃতকৃত্যো বিশুদ্ধ;স্তীর্থান্যন্যান্যনুসংয়াহি রাজন্