অধ্যায় 112

112.1

ঋশ্যশৃঙ্গ উবাচ
ইহাগতো জটিলো ব্রহ্মচারী; ন বৈ হ্রস্বো নাতিদীর্ঘো মনস্বী
সুবর্ণবর্ণঃ কমলায়তাক্ষঃ; সুতঃ সুরাণামিব শোভমানঃ

সমৃদ্ধরূপঃ সবিতেব দীপ্তঃ; সুশুক্লকৃষ্ণাক্ষতরশ্চকোরৈঃ
নীলাঃ প্রসন্নাশ্চ জটাঃ সুগন্ধা; হিরণ্যরজ্জুগ্রথিতাঃ সুদীর্ঘাঃ

আধাররূপা পুনরস্য কণ্ঠে; বিভ্রাজতে বিদ্যুদিবান্তরিক্ষে
দ্বৌ চাস্য পিণ্ডাবধরেণ কণ্ঠ;মজাতরোমৌ সুমনোহরৌ চ

বিলগ্নমধ্যশ্চ স নাভিদেশে; কটিশ্চ তস্যাতিকৃতপ্রমাণা
তথাস্য চীরান্তরিতা প্রভাতি; হিরণ্ময়ী মেখলা মে যথেয়ম্

অন্যচ্চ তস্যাদ্ভুতদর্শনীয়ং; বিকূজিতং পাদয়োঃ সংপ্রভাতি
পাণ্যোশ্চ তদ্বত্স্বনবন্নিবদ্ধৌ; কলাপকাবক্ষমালা যথেয়ম্

বিচেষ্টমানস্য চ তস্য তানি; কূজন্তি হংসা সরসীব মত্তাঃ
চীরাণি তস্যাদ্ভুতদর্শনানি; নেমানি তদ্বন্মম রূপবন্তি

বক্ত্রং চ তস্যাদ্ভুতদর্শনীয়ং; প্রব্যাহৃতং হ্লাদয়তীব চেতঃ
পুংস্কোকিলস্যেব চ তস্য বাণী; তাং শৃণ্বতো মে ব্যথিতোঽন্তরাত্মা

যথা বনং মাধবমাসি মধ্যে; সমীরিতং শ্বসনেনাভিবাতি
তথা স বাত্যুত্তমপুণ্যগন্ধী; নিষেব্যমাণঃ পবনেন তাত

সুসংয়তাশ্চাপি জটা বিভক্তা; দ্বৈধীকৃতা ভান্তি সমা ললাটে
কর্ণৌ চ চিত্রৈরিব চক্রবালৈঃ; সমাবৃতৌ তস্য সুরূপবদ্ভিঃ

তথা ফলং বৃত্তমথো বিচিত্রং; সমাহনত্পাণিনা দক্ষিণেন
তদ্ভূমিমাসাদ্য পুনঃ পুনশ্চ; সমুত্পতত্যদ্ভুতরূপমুচ্চৈঃ

তচ্চাপি হত্বা পরিবর্ততেঽসৌ; বাতেরিতো বৃক্ষ ইবাবঘূর্ণঃ
তং প্রেক্ষ্য মে পুত্রমিবামরাণাং; প্রীতিঃ পরা তাত রতিশ্চ জাতা

স মে সমাশ্লিষ্য পুনঃ শরীরং; জটাসু গৃহ্যাভ্যবনাম্য বক্ত্রম্
বক্ত্রেণ বক্ত্রং প্রণিধায় শব্দং; চকার তন্মেঽজনয়ত্প্রহর্ষম্

ন চাপি পাদ্যং বহু মন্যতেঽসৌ; ফলানি চেমানি ময়াহৃতানি
এবংব্রতোঽস্মীতি চ মামবোচ;ত্ফলানি চান্যানি নবান্যদান্মে

ময়োপয়ুক্তানি ফলানি তানি; নেমানি তুল্যানি রসেন তেষাম্
ন চাপি তেষাং ত্বগিয়ং যথৈষাং; সারাণি নৈষামিব সন্তি তেষাম্

তোয়ানি চৈবাতিরসানি মহ্যং; প্রাদাত্স বৈ পাতুমুদাররূপঃ
পীত্বৈব যান্যভ্যধিকঃ প্রহর্ষো; মমাভবদ্ভূশ্চলিতেব চাসীৎ

ইমানি চিত্রাণি চ গন্ধবন্তি; মাল্যানি তস্যোদ্গ্রথিতানি পট্টৈঃ
যানি প্রকীর্যেহ গতঃ স্বমেব; স আশ্রমং তপসা দ্যোতমানঃ

গতেন তেনাস্মি কৃতো বিচেতা; গাত্রং চ মে সংপরিতপ্যতীব
ইচ্ছামি তস্যান্তিকমাশু গন্তুং; তং চেহ নিত্যং পরিবর্তমানম্

গচ্ছামি তস্যান্তিকমেব তাত; কা নাম সা ব্রতচর্যা চ তস্য
ইচ্ছাম্যহং চরিতুং তেন সার্ধং; যথা তপঃ স চরত্যুগ্রকর্মা