অধ্যায় 111

111.1

লোমশ উবাচ
সা তু নাব্যাশ্রমং চক্রে রাজকার্যার্থসিদ্ধয়ে
সংদেশাচ্চৈব নৃপতেঃ স্ববুদ্ধ্যা চৈব ভারত

নানাপুষ্পফলৈর্বৃক্ষৈঃ কৃত্রিমৈরুপশোভিতম্
নানাগুল্মলতোপেতৈঃ স্বাদুকামফলপ্রদৈঃ

অতীব রমণীয়ং তদতীব চ মনোহরম্
চক্রে নাব্যাশ্রমং রম্যমদ্ভুতোপমদর্শনম্

ততো নিবধ্য তাং নাবমদূরে কাশ্যপাশ্রমাৎ
চারয়ামাস পুরুষৈর্বিহারং তস্য বৈ মুনেঃ

ততো দুহিতরং বেশ্যা সমাধায়েতিকৃত্যতাম্
দৃষ্ট্বান্তরং কাশ্যপস্য প্রাহিণোদ্বুদ্ধিসংমতাম্

সা তত্র গত্বা কুশলা তপোনিত্যস্য সংনিধৌ
আশ্রমং তং সমাসাদ্য দদর্শ তমৃষেঃ সুতম্

বেশ্যোবাচ
কচ্চিন্মুনে কুশলং তাপসানাং; কচ্চিচ্চ বো মূলফলং প্রভূতম্
কচ্চিদ্ভবান্রমতে চাশ্রমেঽস্মিং;স্ত্বাং বৈ দ্রষ্টুং সাংপ্রতমাগতোঽস্মি

কচ্চিত্তপো বর্ধতে তাপসানাং; পিতা চ তে কচ্চিদহীনতেজাঃ
কচ্চিত্ত্বয়া প্রীয়তে চৈব বিপ্র; কচ্চিত্স্বাধ্যায়ঃ ক্রিয়তে ঋশ্যশৃঙ্গ

ঋশ্যশৃঙ্গ উবাচ
ঋদ্ধো ভবাঞ্জ্যোতিরিব প্রকাশতে; মন্যে চাহং ত্বামভিবাদনীয়ম্
পাদ্যং বৈ তে সংপ্রদাস্যামি কামা;দ্যথাধর্মং ফলমূলানি চৈব

কৌশ্যাং বৃস্যামাস্স্ব যথোপজোষং; কৃষ্ণাজিনেনাবৃতায়াং সুখায়াম্
ক্ব চাশ্রমস্তব কিং নাম চেদং; ব্রতং ব্রহ্মংশ্চরসি হি দেববত্ত্বম্

বেশ্যোবাচ
মমাশ্রমঃ কাশ্যপপুত্র রম্য;স্ত্রিয়োজনং শৈলমিমং পরেণ
তত্র স্বধর্মোঽনভিবাদনং নো; ন চোদকং পাদ্যমুপস্পৃশামঃ

ঋশ্যশৃঙ্গ উবাচ
ফলানি পক্বানি দদানি তেঽহং; ভল্লাতকান্যামলকানি চৈব
পরূষকানীঙ্গুদধন্বনানি; প্রিয়ালানাং কামকারং কুরুষ্ব

লোমশ উবাচ
সা তানি সর্বাণি বিসর্জয়িত্বা; ভক্ষান্মহার্হান্প্রদদৌ ততোঽস্মৈ
তান্যৃশ্যশৃঙ্গস্য মহারসানি; ভৃশং সুরূপাণি রুচিং দদুর্হি

দদৌ চ মাল্যানি সুগন্ধবন্তি; চিত্রাণি বাসাংসি চ ভানুমন্তি
পানানি চাগ্র্যাণি ততো মুমোদ; চিক্রীড চৈব প্রজহাস চৈব

সা কন্দুকেনারমতাস্য মূলে; বিভজ্যমানা ফলিতা লতেব
গাত্রৈশ্চ গাত্রাণি নিষেবমাণা; সমাশ্লিষচ্চাসকৃদৃশ্যশৃঙ্গম্

সর্জানশোকাংস্তিলকাংশ্চ বৃক্ষা;ন্প্রপুষ্পিতানবনাম্যাবভজ্য
বিলজ্জমানেব মদাভিভূতা; প্রলোভয়ামাস সুতং মহর্ষেঃ

অথর্শ্যশৃঙ্গং বিকৃতং সমীক্ষ্য; পুনঃ পুনঃ পীড্য চ কায়মস্য
অবেক্ষমাণা শনকৈর্জগাম; কৃত্বাগ্নিহোত্রস্য তদাপদেশম্

তস্যাং গতায়াং মদনেন মত্তো; বিচেতনশ্চাভবদৃশ্যশৃঙ্গঃ
তামেব ভাবেন গতেন শূন্যো; বিনিঃশ্বসন্নার্তরূপো বভূব

ততো মুহূর্তাদ্ধরিপিঙ্গলাক্ষঃ; প্রবেষ্টিতো রোমভিরা নখাগ্রাৎ
স্বাধ্যায়বান্বৃত্তসমাধিয়ুক্তো; বিভাণ্ডকঃ কাশ্যপঃ প্রাদুরাসীৎ

সোঽপশ্যদাসীনমুপেত্য পুত্রং; ধ্যায়ন্তমেকং বিপরীতচিত্তম্
বিনিঃশ্বসন্তং মুহুরূর্ধ্বদৃষ্টিং; বিভাণ্ডকঃ পুত্রমুবাচ দীনম্

ন কল্প্যন্তে সমিধঃ কিং নু তাত; কচ্চিদ্ধুতং চাগ্নিহোত্রং ত্বয়াদ্য
সুনির্ণিক্তং স্রুক্স্রুবং হোমধেনুঃ; কচ্চিত্সবত্সা চ কৃতা ত্বয়াদ্য

ন বৈ যথাপূর্বমিবাসি পুত্র; চিন্তাপরশ্চাসি বিচেতনশ্চ
দীনোঽতিমাত্রং ত্বমিহাদ্য কিং নু; পৃচ্ছামি ত্বাং ক ইহাদ্যাগতোঽভূৎ