Utshovঅধ্যায় 110
110.1
লোমশ উবাচ
এষা দেবনদী পুণ্যা কৌশিকী ভরতর্ষভ
বিশ্বামিত্রাশ্রমো রম্য এষ চাত্র প্রকাশতে
110.2
আশ্রমশ্চৈব পুণ্যাখ্যঃ কাশ্যপস্য মহাত্মনঃ
ঋশ্যশৃঙ্গঃ সুতো যস্য তপস্বী সংয়তেন্দ্রিয়ঃ
110.3
তপসো যঃ প্রভাবেন বর্ষয়ামাস বাসবম্
অনাবৃষ্ট্যাং ভয়াদ্যস্য ববর্ষ বলবৃত্রহা
110.4
মৃগ্যাং জাতঃ স তেজস্বী কাশ্যপস্য সুতঃ প্রভুঃ
বিষয়ে লোমপাদস্য যশ্চকারাদ্ভুতং মহৎ
110.5
নিবর্তিতেষু সস্যেষু যস্মৈ শান্তাং দদৌ নৃপঃ
লোমপাদো দুহিতরং সাবিত্রীং সবিতা যথা
110.6
যুধিষ্ঠির উবাচ
ঋশ্যশৃঙ্গঃ কথং মৃগ্যামুত্পন্নঃ কাশ্যপাত্মজঃ
বিরুদ্ধে যোনিসংসর্গে কথং চ তপসা যুতঃ
110.7
কিমর্থং চ ভয়াচ্ছক্রস্তস্য বালস্য ধীমতঃ
অনাবৃষ্ট্যাং প্রবৃত্তায়াং ববর্ষ বলবৃত্রহা
110.8
কথংরূপা চ শান্তাভূদ্রাজপুত্রী যতব্রতা
লোভয়ামাস যা চেতো মৃগভূতস্য তস্য বৈ
110.9
লোমপাদশ্চ রাজর্ষির্যদাশ্রূয়ত ধার্মিকঃ
কথং বৈ বিষয়ে তস্য নাবর্ষত্পাকশাসনঃ
110.10
এতন্মে ভগবন্সর্বং বিস্তরেণ যথাতথম্
বক্তুমর্হসি শুশ্রূষোরৃশ্যশৃঙ্গস্য চেষ্টিতম্
110.11
লোমশ উবাচ
বিভাণ্ডকস্য ব্রহ্মর্ষেস্তপসা ভাবিতাত্মনঃ
অমোঘবীর্যস্য সতঃ প্রজাপতিসমদ্যুতেঃ
110.12
শৃণু পুত্রো যথা জাত ঋশ্যশৃঙ্গঃ প্রতাপবান্
মহাহ্রদে মহাতেজা বালঃ স্থবিরসংমতঃ
110.13
মহাহ্রদং সমাসাদ্য কাশ্যপস্তপসি স্থিতঃ
দীর্ঘকালং পরিশ্রান্ত ঋষির্দেবর্ষিসংমতঃ
110.14
তস্য রেতঃ প্রচস্কন্দ দৃষ্ট্বাপ্সরসমুর্বশীম্
অপ্সূপস্পৃশতো রাজন্মৃগী তচ্চাপিবত্তদা
110.15
সহ তোয়েন তৃষিতা সা গর্ভিণ্যভবন্নৃপ
অমোঘত্বাদ্বিধেশ্চৈব ভাবিত্বাদ্দৈবনির্মিতাৎ
110.16
তস্যাং মৃগ্যাং সমভবত্তস্য পুত্রো মহানৃষিঃ
ঋশ্যশৃঙ্গস্তপোনিত্যো বন এব ব্যবর্ধত
110.17
তস্যর্শ্যশৃঙ্গং শিরসি রাজন্নাসীন্মহাত্মনঃ
তেনর্শ্যশৃঙ্গ ইত্যেবং তদা স প্রথিতোঽভবৎ
110.18
ন তেন দৃষ্টপূর্বোঽন্যঃ পিতুরন্যত্র মানুষঃ
তস্মাত্তস্য মনো নিত্যং ব্রহ্মচর্যেঽভবন্নৃপ
110.19
এতস্মিন্নেব কালে তু সখা দশরথস্য বৈ
লোমপাদ ইতি খ্যাতো অঙ্গানামীশ্বরোঽভবৎ
110.20
তেন কামঃ কৃতো মিথ্যা ব্রাহ্মণেভ্য ইতি শ্রুতিঃ
স ব্রাহ্মণৈঃ পরিত্যক্তস্তদা বৈ জগতীপতিঃ
110.21
পুরোহিতাপচারাচ্চ তস্য রাজ্ঞো যদৃচ্ছয়া
ন ববর্ষ সহস্রাক্ষস্ততোঽপীড্যন্ত বৈ প্রজাঃ
110.22
স ব্রাহ্মণান্পর্যপৃচ্ছত্তপোয়ুক্তান্মনীষিণঃ
প্রবর্ষণে সুরেন্দ্রস্য সমর্থান্পৃথিবীপতিঃ
110.23
কথং প্রবর্ষেত্পর্জন্য উপায়ঃ পরিদৃশ্যতাম্
তমূচুশ্চোদিতাস্তেন স্বমতানি মনীষিণঃ
110.24
তত্র ত্বেকো মুনিবরস্তং রাজানমুবাচ হ
কুপিতাস্তব রাজেন্দ্র ব্রাহ্মণা নিষ্কৃতিং চর
110.25
ঋশ্যশৃঙ্গং মুনিসুতমানয়স্ব চ পার্থিব
বানেয়মনভিজ্ঞং চ নারীণামার্জবে রতম্
110.26
স চেদবতরেদ্রাজন্বিষয়ং তে মহাতপাঃ
সদ্যঃ প্রবর্ষেত্পর্জন্য ইতি মে নাত্র সংশয়ঃ
110.27
এতচ্ছ্রুত্বা বচো রাজন্কৃত্বা নিষ্কৃতিমাত্মনঃ
স গত্বা পুনরাগচ্ছত্প্রসন্নেষু দ্বিজাতিষু
রাজানমাগতং দৃষ্ট্বা প্রতিসংজগৃহুঃ প্রজাঃ
110.28
ততোঽঙ্গপতিরাহূয় সচিবান্মন্ত্রকোবিদান্
ঋশ্যশৃঙ্গাগমে যত্নমকরোন্মন্ত্রনিশ্চয়ে
110.29
সোঽধ্যগচ্ছদুপায়ং তু তৈরমাত্যৈঃ সহাচ্যুতঃ
শাস্ত্রজ্ঞৈরলমর্থজ্ঞৈর্নীত্যাং চ পরিনিষ্ঠিতৈঃ
110.30
তত আনায়য়ামাস বারমুখ্যা মহীপতিঃ
বেশ্যাঃ সর্বত্র নিষ্ণাতাস্তা উবাচ স পার্থিবঃ
110.31
ঋশ্যশৃঙ্গমৃষেঃ পুত্রমানয়ধ্বমুপায়তঃ
লোভয়িত্বাভিবিশ্বাস্য বিষয়ং মম শোভনাঃ
110.32
তা রাজভয়ভীতাশ্চ শাপভীতাশ্চ যোষিতঃ
অশক্যমূচুস্তত্কার্যং বিবর্ণা গতচেতসঃ
110.33
তত্র ত্বেকা জরদ্যোষা রাজানমিদমব্রবীৎ
প্রয়তিষ্যে মহারাজ তমানেতুং তপোধনম্
110.34
অভিপ্রেতাংস্তু মে কামান্সমনুজ্ঞাতুমর্হসি
ততঃ শক্ষ্যে লোভয়িতুমৃশ্যশৃঙ্গমৃষেঃ সুতম্
110.35
তস্যাঃ সর্বমভিপ্রায়মন্বজানাত্স পার্থিবঃ
ধনং চ প্রদদৌ ভূরি রত্নানি বিবিধানি চ
110.36
ততো রূপেণ সংপন্না বয়সা চ মহীপতে
স্ত্রিয় আদায় কাশ্চিত্সা জগাম বনমঞ্জসা