অধ্যায় 109

109.1

বৈশংপায়ন উবাচ
ততঃ প্রয়াতঃ কৌন্তেয়ঃ ক্রমেণ ভরতর্ষভ
নন্দামপরনন্দাং চ নদ্যৌ পাপভয়াপহে

স পর্বতং সমাসাদ্য হেমকূটমনাময়ম্
অচিন্ত্যানদ্ভুতান্ভাবান্দদর্শ সুবহূন্নৃপঃ

বাচো যত্রাভবন্মেঘা উপলাশ্চ সহস্রশঃ
নাশক্নুবংস্তমারোঢুং বিষণ্ণমনসো জনাঃ

বায়ুর্নিত্যং ববৌ যত্র নিত্যং দেবশ্চ বর্ষতি
সায়ং প্রাতশ্চ ভগবান্দৃশ্যতে হব্যবাহনঃ

এবং বহুবিধান্ভাবানদ্ভুতান্বীক্ষ্য পাণ্ডবঃ
লোমশং পুনরেব স্ম পর্যপৃচ্ছত্তদদ্ভুতম্

লোমশ উবাচ
যথাশ্রুতমিদং পূর্বমস্মাভিররিকর্শন
তদেকাগ্রমনা রাজন্নিবোধ গদতো মম

অস্মিন্নৃষভকূটেঽভূদৃষভো নাম তাপসঃ
অনেকশতবর্ষায়ুস্তপস্বী কোপনো ভৃশম্

স বৈ সংভাষ্যমাণোঽন্যৈঃ কোপাদ্গিরিমুবাচ হ
য ইহ ব্যাহরেত্কশ্চিদুপলানুত্সৃজেস্তদা

বাতং চাহূয় মা শব্দমিত্যুবাচ স তাপসঃ
ব্যাহরংশ্চৈব পুরুষো মেঘেন বিনিবার্যতে

এবমেতানি কর্মাণি রাজংস্তেন মহর্ষিণা
কৃতানি কানিচিত্কোপাত্প্রতিষিদ্ধানি কানিচিৎ

নন্দামভিগতান্দেবান্পুরা রাজন্নিতি শ্রুতিঃ
অন্বপদ্যন্ত সহসা পুরুষা দেবদর্শিনঃ

তে দর্শনমনিচ্ছন্তো দেবাঃ শক্রপুরোগমাঃ
দুর্গং চক্রুরিমং দেশং গিরিপ্রত্যূহরূপকম্

তদা প্রভৃতি কৌন্তেয় নরা গিরিমিমং সদা
নাশক্নুবনভিদ্রষ্টুং কুত এবাধিরোহিতুম্

নাতপ্ততপসা শক্যো দ্রষ্টুমেষ মহাগিরিঃ
আরোঢুং বাপি কৌন্তেয় তস্মান্নিয়তবাগ্ভব

ইহ দেবাঃ সদা সর্বে যজ্ঞানাজহ্রুরুত্তমান্
তেষামেতানি লিঙ্গানি দৃশ্যন্তেঽদ্যাপি ভারত

কুশাকারেব দূর্বেয়ং সংস্তীর্ণেব চ ভূরিয়ম্
যূপপ্রকারা বহবো বৃক্ষাশ্চেমে বিশাং পতে

দেবাশ্চ ঋষয়শ্চৈব বসন্ত্যদ্যাপি ভারত
তেষাং সায়ং তথা প্রাতর্দৃশ্যতে হব্যবাহনঃ

ইহাপ্লুতানাং কৌন্তেয় সদ্যঃ পাপ্মা বিহন্যতে
কুরুশ্রেষ্ঠাভিষেকং বৈ তস্মাত্কুরু সহানুজঃ

ততো নন্দাপ্লুতাঙ্গস্ত্বং কৌশিকীমভিয়াস্যসি
বিশ্বামিত্রেণ যত্রোগ্রং তপস্তপ্তমনুত্তমম্

বৈশংপায়ন উবাচ
ততস্তত্র সমাপ্লুত্য গাত্রাণি সগণো নৃপঃ
জগাম কৌশিকীং পুণ্যাং রম্যাং শিবজলাং নদীম্