অধ্যায় 108

108.1

লোমশ উবাচ
ভগীরথবচঃ শ্রুত্বা প্রিয়ার্থং চ দিবৌকসাম্
এবমস্ত্বিতি রাজানং ভগবান্প্রত্যভাষত

ধারয়িষ্যে মহাবাহো গগনাত্প্রচ্যুতাং শিবাম্
দিব্যাং দেবনদীং পুণ্যাং ত্বত্কৃতে নৃপসত্তম

এবমুক্ত্বা মহাবাহো হিমবন্তমুপাগমৎ
সংবৃতঃ পার্ষদৈর্ঘোরৈর্নানাপ্রহরণোদ্যতৈঃ

ততঃ স্থিত্বা নরশ্রেষ্ঠং ভগীরথমুবাচ হ
প্রয়াচস্ব মহাবাহো শৈলরাজসুতাং নদীম্
পতমানাং সরিচ্ছ্রেষ্ঠাং ধারয়িষ্যে ত্রিবিষ্টপাৎ

এতচ্ছ্রুত্বা বচো রাজা শর্বেণ সমুদাহৃতম্
প্রয়তঃ প্রণতো ভূত্বা গঙ্গাং সমনুচিন্তয়ৎ

ততঃ পুণ্যজলা রম্যা রাজ্ঞা সমনুচিন্তিতা
ঈশানং চ স্থিতং দৃষ্ট্বা গগনাত্সহসা চ্যুতা

তাং প্রচ্যুতাং ততো দৃষ্ট্বা দেবাঃ সার্ধং মহর্ষিভিঃ
গন্ধর্বোরগরক্ষাংসি সমাজগ্মুর্দিদৃক্ষয়া

ততঃ পপাত গগনাদ্গঙ্গা হিমবতঃ সুতা
সমুদ্ভ্রান্তমহাবর্তা মীনগ্রাহসমাকুলা

তাং দধার হরো রাজন্গঙ্গাং গগনমেখলাম্
ললাটদেশে পতিতাং মালাং মুক্তাময়ীমিব

সা বভূব বিসর্পন্তী ত্রিধা রাজন্সমুদ্রগা
ফেনপুঞ্জাকুলজলা হংসানামিব পঙ্ক্তয়ঃ

ক্বচিদাভোগকুটিলা প্রস্খলন্তী ক্বচিত্ক্বচিৎ
স্বফেনপটসংবীতা মত্তেব প্রমদাব্রজৎ
ক্বচিত্সা তোয়নিনদৈর্নদন্তী নাদমুত্তমম্

এবং প্রকারান্সুবহূন্কুর্বন্তী গগনাচ্চ্যুতা
পৃথিবীতলমাসাদ্য ভগীরথমথাব্রবীৎ

দর্শয়স্ব মহারাজ মার্গং কেন ব্রজাম্যহম্
ত্বদর্থমবতীর্ণাস্মি পৃথিবীং পৃথিবীপতে

এতচ্ছ্রুত্বা বচো রাজা প্রাতিষ্ঠত ভগীরথঃ
যত্র তানি শরীরাণি সাগরাণাং মহাত্মনাম্
পাবনার্থং নরশ্রেষ্ঠ পুণ্যেন সলিলেন হ

গঙ্গায়া ধারণং কৃত্বা হরো লোকনমস্কৃতঃ
কৈলাসং পর্বতশ্রেষ্ঠং জগাম ত্রিদশৈঃ সহ

সমুদ্রং চ সমাসাদ্য গঙ্গয়া সহিতো নৃপঃ
পূরয়ামাস বেগেন সমুদ্রং বরুণালয়ম্

দুহিতৃত্বে চ নৃপতির্গঙ্গাং সমনুকল্পয়ৎ
পিতৄণাং চোদকং তত্র দদৌ পূর্ণমনোরথঃ

এতত্তে সর্বমাখ্যাতং গঙ্গা ত্রিপথগা যথা
পূরণার্থং সমুদ্রস্য পৃথিবীমবতারিতা

সমুদ্রশ্চ যথা পীতঃ কারণার্থে মহাত্মনা
বাতাপিশ্চ যথা নীতঃ ক্ষয়ং স ব্রহ্মহা প্রভো
অগস্ত্যেন মহারাজ যন্মাং ত্বং পরিপৃচ্ছসি