UtshovChapter 108
108.1
लोमश उवाच
भगीरथवचः श्रुत्वा प्रियार्थं च दिवौकसाम्
एवमस्त्विति राजानं भगवान्प्रत्यभाषत
Lomasha uvacha
Bhagirathavachah shrutva priyartham cha divaukasam
Evamastviti rajanam bhagavanpratyabhashata
108.2
धारयिष्ये महाबाहो गगनात्प्रच्युतां शिवाम्
दिव्यां देवनदीं पुण्यां त्वत्कृते नृपसत्तम
Dharayishye mahabaho gaganatprachyutam shivam
Divyam devanadim punyam tvatkrite nripasattama
108.3
एवमुक्त्वा महाबाहो हिमवन्तमुपागमत्
संवृतः पार्षदैर्घोरैर्नानाप्रहरणोद्यतैः
Evamuktva mahabaho himavantamupagamat
Sanvritah parshadairghorairnanapraharanodyataih
108.4
ततः स्थित्वा नरश्रेष्ठं भगीरथमुवाच ह
प्रयाचस्व महाबाहो शैलराजसुतां नदीम्
पतमानां सरिच्छ्रेष्ठां धारयिष्ये त्रिविष्टपात्
Tatah sthitva narashreshtham bhagirathamuvacha ha
Prayachasva mahabaho shailarajasutam nadim
Patamanam sarichchhreshtham dharayishye trivishtapat
108.5
एतच्छ्रुत्वा वचो राजा शर्वेण समुदाहृतम्
प्रयतः प्रणतो भूत्वा गङ्गां समनुचिन्तयत्
Etachchhrutva vacho raja sharvena samudahritam
Prayatah pranato bhutva gangam samanuchintayat
108.6
ततः पुण्यजला रम्या राज्ञा समनुचिन्तिता
ईशानं च स्थितं दृष्ट्वा गगनात्सहसा च्युता
Tatah punyajala ramya ragya samanuchintita
Ishanam cha sthitam drishtva gaganatsahasa chyuta
108.7
तां प्रच्युतां ततो दृष्ट्वा देवाः सार्धं महर्षिभिः
गन्धर्वोरगरक्षांसि समाजग्मुर्दिदृक्षया
Tam prachyutam tato drishtva devah sardham maharshibhih
Gandharvoragarakshansi samajagmurdidrikshaya
108.8
ततः पपात गगनाद्गङ्गा हिमवतः सुता
समुद्भ्रान्तमहावर्ता मीनग्राहसमाकुला
Tatah papata gaganadganga himavatah suta
Samudbhrantamahavarta minagrahasamakula
108.9
तां दधार हरो राजन्गङ्गां गगनमेखलाम्
ललाटदेशे पतितां मालां मुक्तामयीमिव
Tam dadhara haro rajangangam gaganamekhalam
Lalatadeshe patitam malam muktamayimiva
108.10
सा बभूव विसर्पन्ती त्रिधा राजन्समुद्रगा
फेनपुञ्जाकुलजला हंसानामिव पङ्क्तयः
Sa babhuva visarpanti tridha rajansamudraga
Phenapunjakulajala hansanamiva panktayah
108.11
क्वचिदाभोगकुटिला प्रस्खलन्ती क्वचित्क्वचित्
स्वफेनपटसंवीता मत्तेव प्रमदाव्रजत्
क्वचित्सा तोयनिनदैर्नदन्ती नादमुत्तमम्
Kvachidabhogakutila praskhalanti kvachitkvachit
Svaphenapatasanvita matteva pramadavrajat
Kvachitsa toyaninadairnadanti nadamuttamam
108.12
एवं प्रकारान्सुबहून्कुर्वन्ती गगनाच्च्युता
पृथिवीतलमासाद्य भगीरथमथाब्रवीत्
Evam prakaransubahunkurvanti gaganachchyuta
Prithivitalamasadya bhagirathamathabravit
108.13
दर्शयस्व महाराज मार्गं केन व्रजाम्यहम्
त्वदर्थमवतीर्णास्मि पृथिवीं पृथिवीपते
Darshayasva maharaja margam kena vrajamyaham
Tvadarthamavatirnasmi prithivim prithivipate
108.14
एतच्छ्रुत्वा वचो राजा प्रातिष्ठत भगीरथः
यत्र तानि शरीराणि सागराणां महात्मनाम्
पावनार्थं नरश्रेष्ठ पुण्येन सलिलेन ह
Etachchhrutva vacho raja pratishthata bhagirathah
Yatra tani sharirani sagaranam mahatmanam
Pavanartham narashreshtha punyena salilena ha
108.15
गङ्गाया धारणं कृत्वा हरो लोकनमस्कृतः
कैलासं पर्वतश्रेष्ठं जगाम त्रिदशैः सह
Gangaya dharanam kritva haro lokanamaskritah
Kailasam parvatashreshtham jagama tridashaih saha
108.16
समुद्रं च समासाद्य गङ्गया सहितो नृपः
पूरयामास वेगेन समुद्रं वरुणालयम्
Samudram cha samasadya gangaya sahito nripah
Purayamasa vegena samudram varunalayam
108.17
दुहितृत्वे च नृपतिर्गङ्गां समनुकल्पयत्
पितॄणां चोदकं तत्र ददौ पूर्णमनोरथः
Duhitritve cha nripatirgangam samanukalpayat
Pitrinam chodakam tatra dadau purnamanorathah
108.18
एतत्ते सर्वमाख्यातं गङ्गा त्रिपथगा यथा
पूरणार्थं समुद्रस्य पृथिवीमवतारिता
Etatte sarvamakhyatam ganga tripathaga yatha
Puranartham samudrasya prithivimavatarita
108.19
समुद्रश्च यथा पीतः कारणार्थे महात्मना
वातापिश्च यथा नीतः क्षयं स ब्रह्महा प्रभो
अगस्त्येन महाराज यन्मां त्वं परिपृच्छसि
Samudrashcha yatha pitah karanarthe mahatmana
Vatapishcha yatha nitah kshayam sa brahmaha prabho
Agastyena maharaja yanmam tvam pariprichchhasi