Utshovঅধ্যায় 107
107.1
লোমশ উবাচ
স তু রাজা মহেষ্বাসশ্চক্রবর্তী মহারথঃ
বভূব সর্বলোকস্য মনোনয়ননন্দনঃ
107.2
স শুশ্রাব মহাবাহুঃ কপিলেন মহাত্মনা
পিতৄণাং নিধনং ঘোরমপ্রাপ্তিং ত্রিদিবস্য চ
107.3
স রাজ্যং সচিবে ন্যস্য হৃদয়েন বিদূয়তা
জগাম হিমবত্পার্শ্বং তপস্তপ্তুং নরেশ্বরঃ
107.4
আরিরাধয়িষুর্গঙ্গাং তপসা দগ্ধকিল্বিষঃ
সোঽপশ্যত নরশ্রেষ্ঠ হিমবন্তং নগোত্তমম্
107.5
শৃঙ্গৈর্বহুবিধাকারৈর্ধাতুমদ্ভিরলংকৃতম্
পবনালম্বিভির্মেঘৈঃ পরিষ্বক্তং সমন্ততঃ
107.6
নদীকুঞ্জনিতম্বৈশ্চ সোদকৈরুপশোভিতম্
গুহাকন্দরসংলীনৈঃ সিংহব্যাঘ্রৈর্নিষেবিতম্
107.7
শকুনৈশ্চ বিচিত্রাঙ্গৈঃ কূজদ্ভির্বিবিধা গিরঃ
ভৃঙ্গরাজৈস্তথা হংসৈর্দাত্যূহৈর্জলকুক্কুটৈঃ
107.8
ময়ূরৈঃ শতপত্রৈশ্চ কোকিলৈর্জীবজীবকৈঃ
চকোরৈরসিতাপাঙ্গৈস্তথা পুত্রপ্রিয়ৈরপি
107.9
জলস্থানেষু রম্যেষু পদ্মিনীভিশ্চ সংকুলম্
সারসানাং চ মধুরৈর্ব্যাহৃতৈঃ সমলংকৃতম্
107.10
কিংনরৈরপ্সরোভিশ্চ নিষেবিতশিলাতলম্
দিশাগজবিষাণাগ্রৈঃ সমন্তাদ্ঘৃষ্টপাদপম্
107.11
বিদ্যাধরানুচরিতং নানারত্নসমাকুলম্
বিষোল্বণৈর্ভুজংগৈশ্চ দীপ্তজিহ্বৈর্নিষেবিতম্
107.12
ক্বচিত্কনকসংকাশং ক্বচিদ্রজতসংনিভম্
ক্বচিদঞ্জনপুঞ্জাভং হিমবন্তমুপাগমৎ
107.13
স তু তত্র নরশ্রেষ্ঠস্তপো ঘোরং সমাশ্রিতঃ
ফলমূলাম্বুভক্ষোঽভূত্সহস্রং পরিবত্সরান্
107.14
সংবত্সরসহস্রে তু গতে দিব্যে মহানদী
দর্শয়ামাস তং গঙ্গা তদা মূর্তিমতী স্বয়ম্
107.15
গঙ্গোবাচ
কিমিচ্ছসি মহারাজ মত্তঃ কিং চ দদানি তে
তদ্ব্রবীহি নরশ্রেষ্ঠ করিষ্যামি বচস্তব
107.16
লোমশ উবাচ
এবমুক্তঃ প্রত্যুবাচ রাজা হৈমবতীং তদা
পিতামহা মে বরদে কপিলেন মহানদি
অন্বেষমাণাস্তুরগং নীতা বৈবস্বতক্ষয়ম্
107.17
ষষ্টিস্তানি সহস্রাণি সাগরাণাং মহাত্মনাম্
কাপিলং তেজ আসাদ্য ক্ষণেন নিধনং গতাঃ
107.18
তেষামেবং বিনষ্টানাং স্বর্গে বাসো ন বিদ্যতে
যাবত্তানি শরীরাণি ত্বং জলৈর্নাভিষিঞ্চসি
107.19
স্বর্গং নয় মহাভাগে মত্পিতৄন্সগরাত্মজান্
তেষামর্থেঽভিয়াচামি ত্বামহং বৈ মহানদি
107.20
এতচ্ছ্রুত্বা বচো রাজ্ঞো গঙ্গা লোকনমস্কৃতা
ভগীরথমিদং বাক্যং সুপ্রীতা সমভাষত
107.21
করিষ্যামি মহারাজ বচস্তে নাত্র সংশয়ঃ
বেগং তু মম দুর্ধার্যং পতন্ত্যা গগনাচ্চ্যুতম্
107.22
ন শক্তস্ত্রিষু লোকেষু কশ্চিদ্ধারয়িতুং নৃপ
অন্যত্র বিবুধশ্রেষ্ঠান্নীলকণ্ঠান্মহেশ্বরাৎ
107.23
তং তোষয় মহাবাহো তপসা বরদং হরম্
স তু মাং প্রচ্যুতাং দেবঃ শিরসা ধারয়িষ্যতি
করিষ্যতি চ তে কামং পিতৄণাং হিতকাম্যয়া
107.24
এতচ্ছ্রুত্বা বচো রাজন্মহারাজো ভগীরথঃ
কৈলাসং পর্বতং গত্বা তোষয়ামাস শংকরম্
107.25
ততস্তেন সমাগম্য কালয়োগেন কেনচিৎ
অগৃহ্ণাচ্চ বরং তস্মাদ্গঙ্গায়া ধারণং নৃপ
স্বর্গবাসং সমুদ্দিশ্য পিতৄণাং স নরোত্তমঃ