Utshovঅধ্যায় 106
106.1
লোমশ উবাচ
তে তং দৃষ্ট্বা হয়ং রাজন্সংপ্রহৃষ্টতনূরুহাঃ
অনাদৃত্য মহাত্মানং কপিলং কালচোদিতাঃ
সংক্রুদ্ধাঃ সমধাবন্ত অশ্বগ্রহণকাঙ্ক্ষিণঃ
106.2
ততঃ ক্রুদ্ধো মহারাজ কপিলো মুনিসত্তমঃ
বাসুদেবেতি যং প্রাহুঃ কপিলং মুনিসত্তমম্
106.3
স চক্ষুর্বিবৃতং কৃত্বা তেজস্তেষু সমুত্সৃজন্
দদাহ সুমহাতেজা মন্দবুদ্ধীন্স সাগরান্
106.4
তান্দৃষ্ট্বা ভস্মসাদ্ভূতান্নারদঃ সুমহাতপাঃ
সগরান্তিকমাগচ্ছত্তচ্চ তস্মৈ ন্যবেদয়ৎ
106.5
স তচ্ছ্রুত্বা বচো ঘোরং রাজা মুনিমুখোদ্গতম্
মুহূর্তং বিমনা ভূত্বা স্থাণোর্বাক্যমচিন্তয়ৎ
আত্মানমাত্মনাশ্বাস্য হয়মেবান্বচিন্তয়ৎ
106.6
অংশুমন্তং সমাহূয় অসমঞ্জঃসুতং তদা
পৌত্রং ভরতশার্দূল ইদং বচনমব্রবীৎ
106.7
ষষ্টিস্তানি সহস্রাণি পুত্রাণামমিতৌজসাম্
কাপিলং তেজ আসাদ্য মত্কৃতে নিধনং গতাঃ
106.8
তব চাপি পিতা তাত পরিত্যক্তো ময়ানঘ
ধর্মং সংরক্ষমাণেন পৌরাণাং হিতমিচ্ছতা
106.9
যুধিষ্ঠির উবাচ
কিমর্থং রাজশার্দূলঃ সগরঃ পুত্রমাত্মজম্
ত্যক্তবান্দুস্ত্যজং বীরং তন্মে ব্রূহি তপোধন
106.10
লোমশ উবাচ
অসমঞ্জা ইতি খ্যাতঃ সগরস্য সুতো হ্যভূৎ
যং শৈব্যা জনয়ামাস পৌরাণাং স হি দারকান্
খুরেষু ক্রোশতো গৃহ্য নদ্যাং চিক্ষেপ দুর্বলান্
106.11
ততঃ পৌরাঃ সমাজগ্মুর্ভয়শোকপরিপ্লুতাঃ
সগরং চাভ্যয়াচন্ত সর্বে প্রাঞ্জলয়ঃ স্থিতাঃ
106.12
ত্বং নস্ত্রাতা মহারাজ পরচক্রাদিভির্ভয়ৈঃ
অসমঞ্জোভয়াদ্ঘোরাত্ততো নস্ত্রাতুমর্হসি
106.13
পৌরাণাং বচনং শ্রুত্বা ঘোরং নৃপতিসত্তমঃ
মুহূর্তং বিমনা ভূত্বা সচিবানিদমব্রবীৎ
106.14
অসমঞ্জাঃ পুরাদদ্য সুতো মে বিপ্রবাস্যতাম্
যদি বো মত্প্রিয়ং কার্যমেতচ্ছীঘ্রং বিধীয়তাম্
106.15
এবমুক্তা নরেন্দ্রেণ সচিবাস্তে নরাধিপ
যথোক্তং ত্বরিতাশ্চক্রুর্যথাজ্ঞাপিতবান্নৃপঃ
106.16
এতত্তে সর্বমাখ্যাতং যথা পুত্রো মহাত্মনা
পৌরাণাং হিতকামেন সগরেণ বিবাসিতঃ
106.17
অংশুমাংস্তু মহেষ্বাসো যদুক্তঃ সগরেণ হ
তত্তে সর্বং প্রবক্ষ্যামি কীর্ত্যমানং নিবোধ মে
106.18
সগর উবাচ
পিতুশ্চ তেঽহং ত্যাগেন পুত্রাণাং নিধনেন চ
অলাভেন তথাশ্বস্য পরিতপ্যামি পুত্রক
106.19
তস্মাদ্দুঃখাভিসংতপ্তং যজ্ঞবিঘ্নাচ্চ মোহিতম্
হয়স্যানয়নাত্পৌত্র নরকান্মাং সমুদ্ধর
106.20
লোমশ উবাচ
অংশুমানেবমুক্তস্তু সগরেণ মহাত্মনা
জগাম দুঃখাত্তং দেশং যত্র বৈ দারিতা মহী
106.21
স তু তেনৈব মার্গেণ সমুদ্রং প্রবিবেশ হ
অপশ্যচ্চ মহাত্মানং কপিলং তুরগং চ তম্
106.22
স দৃষ্ট্বা তেজসো রাশিং পুরাণমৃষিসত্তমম্
প্রণম্য শিরসা ভূমৌ কার্যমস্মৈ ন্যবেদয়ৎ
106.23
ততঃ প্রীতো মহাতেজাঃ কলিপোংঽশুমতোঽভবৎ
উবাচ চৈনং ধর্মাত্মা বরদোঽস্মীতি ভারত
106.24
স বব্রে তুরগং তত্র প্রথমং যজ্ঞকারণাৎ
দ্বিতীয়মুদকং বব্রে পিতৄণাং পাবনেপ্সয়া
106.25
তমুবাচ মহাতেজাঃ কপিলো মুনিপুংগবঃ
দদানি তব ভদ্রং তে যদ্যত্প্রার্থয়সেঽনঘ
106.26
ত্বয়ি ক্ষমা চ ধর্মশ্চ সত্যং চাপি প্রতিষ্ঠিতম্
ত্বয়া কৃতার্থঃ সগরঃ পুত্রবাংশ্চ ত্বয়া পিতা
106.27
তব চৈব প্রভাবেন স্বর্গং যাস্যন্তি সাগরাঃ
পৌত্রশ্চ তে ত্রিপথগাং ত্রিদিবাদানয়িষ্যতি
পাবনার্থং সাগরাণাং তোষয়িত্বা মহেশ্বরম্
106.28
হয়ং নয়স্ব ভদ্রং তে যজ্ঞিয়ং নরপুংগব
যজ্ঞঃ সমাপ্যতাং তাত সগরস্য মহাত্মনঃ
106.29
অংশুমানেবমুক্তস্তু কপিলেন মহাত্মনা
আজগাম হয়ং গৃহ্য যজ্ঞবাটং মহাত্মনঃ
106.30
সোঽভিবাদ্য ততঃ পাদৌ সগরস্য মহাত্মনঃ
মূর্ধ্নি তেনাপ্যুপাঘ্রাতস্তস্মৈ সর্বং ন্যবেদয়ৎ
106.31
যথা দৃষ্টং শ্রুতং চাপি সাগরাণাং ক্ষয়ং তথা
তং চাস্মৈ হয়মাচষ্ট যজ্ঞবাটমুপাগতম্
106.32
তচ্ছ্রুত্বা সগরো রাজা পুত্রজং দুঃখমত্যজৎ
অংশুমন্তং চ সংপূজ্য সমাপয়ত তং ক্রতুম্
106.33
সমাপ্তয়জ্ঞঃ সগরো দেবৈঃ সর্বৈঃ সভাজিতঃ
পুত্রত্বে কল্পয়ামাস সমুদ্রং বরুণালয়ম্
106.34
প্রশাস্য সুচিরং কালং রাজ্যং রাজীবলোচনঃ
পৌত্রে ভারং সমাবেশ্য জগাম ত্রিদিবং তদা
106.35
অংশুমানপি ধর্মাত্মা মহীং সাগরমেখলাম্
প্রশশাস মহারাজ যথৈবাস্য পিতামহঃ
106.36
তস্য পুত্রঃ সমভবদ্দিলীপো নাম ধর্মবিৎ
তস্মৈ রাজ্যং সমাধায় অংশুমানপি সংস্থিতঃ
106.37
দিলীপস্তু ততঃ শ্রুত্বা পিতৄণাং নিধনং মহৎ
পর্যতপ্যত দুঃখেন তেষাং গতিমচিন্তয়ৎ
106.38
গঙ্গাবতরণে যত্নং সুমহচ্চাকরোন্নৃপঃ
ন চাবতারয়ামাস চেষ্টমানো যথাবলম্
106.39
তস্য পুত্রঃ সমভবচ্ছ্রীমান্ধর্মপরায়ণঃ
ভগীরথ ইতি খ্যাতঃ সত্যবাগনসূয়কঃ
106.40
অভিষিচ্য তু তং রাজ্যে দিলীপো বনমাশ্রিতঃ
তপঃসিদ্ধিসমায়োগাত্স রাজা ভরতর্ষভ
বনাজ্জগাম ত্রিদিবং কালয়োগেন ভারত